All for Joomla All for Webmasters

ने.सं. ११३६ यंलागा अष्टमी

कवि नुगः

कविया नुगः मेपिं मनूतय् नुगः स्वयाः पाइ । मेपिं मनूतय् नुगः न्ह्यपुलिसे स्वानाच्वनी । कविया नुगलं न्ह्यपुयात वास्ता याइमखु । न्ह्यपु मदुपिं मनूत धाथेंयापिं कवि जुइ धयातःगु धात्थें हे खःगु जुयाच्वन । मनोविज्ञ काउलिन्सं धयातःगु दु, ‘कवि धइपिं ब्रेन चाइल्ड मखु, बरु माइन्द चाइल्ड खः ।’


नुगः धइगु न्ह्यपु थें वस्तु मखु । न्ह्यपु धइगु छ्यंया दुने धकाः सिउ थें नुगः म्हया गुगु थासय् दु धकाः सीके फइमखु । हर्टया अर्थय् नुगः मखु लाकि माइन्डया अर्थय् नुगः धइगु थनथाय् लाक्क थुइके माः । नुगः धइगु भौतिक मखु अभौतिक खः, पराभौतिक खः । आब्स्ट्राक खः, सार खः, भाव जक खः । नुगः धइगु । उकिं कविया नुगलं कविता जक पिकाइ अर्थात भाव व सार जक पिकाइ, दुकुलुगु छुं नं पिकाइमखु । न्ह्यपु विज्ञ अल्फ्रेड स्पेन्सरं थःगु सफुलिइ च्वयातःगु दु, ‘कवितसें न्ह्यपुयात छ्यलकि उपिं वेँय् जुइ, उँइ जुइ ।’


कवियात पुलांगु फार्सी भासं पागल धाइ । पागल धाःगु वेँय् धाःगु खः । वेँय् जूपिं कवित फुक्क न्ह्यपु मदुपिं खः वाय् न्ह्यपुं ज्या मयाःपिं खः । मेम्ह छम्ह मनोविज्ञ क्रिस्टोफर जोन्सनया धापू कथं वैज्ञानिकतय् कल्पना दुकुलाक साकार जू थें कवितय् नुगःया कल्पना गुबलें साकार जुइमखु ।


कविया नुगः क्यातुइ मखु । क्यातु नुगःपिं कवितसें क्रान्तिया, विद्रोहया, आन्दोलनया, विरोधया, परिवर्तनया, कविता च्वयेफइमखु । कविया नुगः क्वातुइ नं मखु, ख्वातुइ नं मखु । कवियानुगःदुरु थें, लःथें, अय्लाःथें छ्वालुयाच्वनी । कविं थःगु नुगः त्वनी । नुगः त्वनेगु मंत कि वं अय्लाः त्वनी, दुरु त्वनीमखु । मेम्ह नुगःविद् प्रो. एन्ड्रयु मार्शलया लोकंह्वाःगु धापू दु ‘कवितय् नुगः ह्विस्कि खः, हनि मखु ।’ अर्थ, कविया नुगः छ्वालु खः ताकु मखु ।


जियोर्दानो बुखारिन धइम्ह छम्ह रुसी वैज्ञानिक. कवितय् नुगः धइगु दकलय् सकलय् अप्वः स्पीड दुगु यान् खःधकाः पुष्टि याःगु दु । कवि नुगःया ब्वां वनेगु स्पीडयात थौंतक सुनानं नापय् याये फुगु मदुनि ।
कवि नुगः बारे थुइके हे माःगु छता खँ छु धाःसां कवित फुक्कं वेँय् जुइमखु, वेँय्त फुकं कवि जुइमखु । कवित फुक्क वेँय् व वेँय्त फुक कवि धकाः थुइकल धाःसा थ्व कवितय्त अनादर यायेगु जुइ । कालिदासं थःत वेँय् मखु धाःथें सुं नं कविं थःत वेँय् धाइमखु ।

नांजाःम्ह मनोवैज्ञानिक प्रो. इलियट दियो दोरसया दावा कथं कवितय् नुगः वेँय् जुल मजुल सीकेत उमि नुगः प्रयोगशालाय् मनोवैज्ञानिक चिरफार यानाः सीके फु । कवि नुगः विशाल खः । विशाल नुगः दुपिं जक कवि नुगः घानाः म्वाये फइ । कविया नुगलं अमृत त्वनी, अले व अमर जुइ 

Rate this item
(0 votes)
Login to post comments
Go to top

Copyright © 2016  nepalbhasa.com. All rights reserved.