All for Joomla All for Webmasters

ने.सं. ११३६ यंलागा अष्टमी

थ्री स्टारया एएफसी कपय क्वालिफाइङ आज्जु

घरेलु फुटबलय् आः थथें छु जुइगु खः, उकिया छुं निश्चितता मदयाच्वंगु इलय् थ्री स्टारं छताः आ“ट याःगु दु । एएफसी कपया ‘क्वालिफाइङ प्ले अफ’ म्हितेगु । दछिं मयाये धुंकल यलया थ्व क्लबं फुटबलया राष्ट्रिय लिग त्याकूगु । थ्व हे उपाधि त्याकूगु हैसियतं थ्री स्टारं क्वालिफाइङ प्ले अफ म्हिते त्यंगु खः । क्वालिफाइङ प्ले अफ जक म्हितेत नं लखौंलख दां माः । दां लगानी याःसां उकिया प्रतिफल लिहां वइगु सम्भावना नं यक्व मदु ।


अय्नं थ्री स्टारं क्वालिफाइङ प्ले अफ म्हिते त्यंगु दु, व नं क्लबया भविष्ययात कयाः यक्वं न्ह्यसः दनाच्वंगु इलय् । सायद क्वालिफाइङ प्ले अफ म्हितेगु थ्री स्टारया थुकिया हे लिसः जकं खः कि ? न्ह्याथे जुइमाः थ्री स्टार एएफसी क्वालिफाइङ प्ले अफ म्हितेत्यंगु नेपाःया न्हापांगु क्लब जुइ । संयोग हे धायेमाः थ्री स्टार हे ‘एएफसी प्रेसिडेन्ट्स कप’ म्हितूगु नेपाःया न्हापांगु क्लब नं खः । आः एएफसी कपया पाः वःगु दु ।


अथेला एसियाली फुटबल महासंघ (एएफसीं) आयोजना याइगु क्लब फुटबलया स्वंगूगु दर्जाया ‘एएफसी प्रेसिडेन्ट कप’ निद“ न्ह्यः हे स्थगित जुइ धुंकूगु दु । थुकिया थासय् प्रेसिडेन्ट्स कप म्हितीपिं टिमतय्त एएफसी कप म्हितेगु अवसर बिउगु खः । थ्व निगूगु दर्जाया च्याम्पियनसिप नं खः । थुकी ब्वति काइगु ३२ गू टिम मध्ये सकसियां तप्यंक ब्वति धाःसा कायेखनी मखु । थुकिया निंतिं छनोट कासा म्हितेमाः ।


आः थ्री स्टारं थ्व छनोट म्हिते न्ह्यःया ‘प्ले अफ’ निं म्हिते त्यंगु खः । सन् २०१७ या एएफसी कपया छनोटय् स्वंगू टिम प्ले अफपाखें म्हितेखनी । थ्व ल्याखं थ्री स्टारं आः ज्वंगु लँपु ताःहाकः जक मखु, उतिकं कठिन नं । अले धाये म्वाःकि, उतिकं खर्च याये माःगु नं । थनथाय् लाक हे थ्री स्टारं बहादुरी नं क्यंगु खः । थौं हे तिनि थ्री स्टार मंगोलिया वने त्यंगु दु, थ्व हे क्वालिफाइङ प्ले अफ म्हितेत । क्वालिफाइङ प्ले अफय् थ्री स्टार ग्रुप ‘बी’इ दु ।


थुकि दुथ्याःगु मेगु टिमत खः, मंगोलियाया एरचिम एफसी व कम्बोडियाया नागावल्र्ड एफसी । थ्री स्टारं अगस्ट २१ य् एरचिमविरुद्ध म्हिती, अले अगस्ट २३ य् नागावल्र्डविरुद्ध । क्वालिफाइङ प्ले अफया स्वंगू ग्रुपमध्ये प्रत्येकय् विजयी टिम छनोट म्हितेत योग्य जुइ । थ्व हे क्वालिफाइङ प्ले अफया नितिं प्रशिक्षकय् हाकनं मेघराज केसीयात हे हःगु दु । मेघराज न्हापा नं थ्री स्टारया प्रशिक्षक जुइ धुंकूम्ह खः ।


मेघराजया नेतृत्वय् थ्री स्टारं थ्यंमथ्यं लछिया अभ्यास याःगु दु, अले क्वालिफाइङ प्ले अफय् थःगु बांलाःगु सम्भावना नं खनाच्वंगु दु । प्रशिक्षकया दावी दु, ‘जिमिगु आज्जु निश्चित ल्याखं थःगु ग्रुपय् न्हापांगु थाय् त्याकेगु हे खः । जिमित विश्वास दु, जिपिं थुकिया हकदार नं खः, अले थुकिया निंतिं जिमिसं माःगु तयारी नं यानागु दु ।’ वया बिचाः खः, थ्वपालय् थः निम्ह प्रतिद्वन्द्वी उथेंउथें खः, अर्थात थः बराबर ।


घरेलु फुटबल अनिश्चित जुयाच्वंगु इलय् थ्री स्टारं २० म्ह कासामियात व्यवसायिक अनुबन्ध नं याःगु दु, अथे धयाःगु उमित पारिश्रमिक बियाः लहित तयार नं जूगु दु । आःया ल्याखं धायेगु खःसा थ्व टिमय् छगू कथं न्हूपिं व पुलापिं कासामिया मिश्रण दु । खुम्ह ला नेपाःया राष्ट्रिय टिमया दुजः खः । मेपिं छुं पुलापिं राष्ट्रिय टिमया दुजः खःसा मेपिं धाःसा न्हूपिं कासामित । ‘जित विश्वास दु, थ्व टिमं विश्वास याना कथं म्हितिगु जुइ,’ प्रशिक्षक मेघराजया धापू दु ।

Rate this item
(0 votes)
Login to post comments
Go to top

Copyright © 2016  nepalbhasa.com. All rights reserved.