All for Joomla All for Webmasters

ने.सं. ११३६ यंलागा अष्टमी

तुसि सयेकेत चा हे म्वाः


छिं गुबलें पत्या जुयादी लाकि छुं नं कृषि उत्पादन चा मदयेक हे जुइ धकाः । काभ्रेपलाञ्चोकया छम्ह किसानं चा मदयेक हे तुसि सयेकाः सकसितं अजू चायेकाबिउगु दु ।काभ्रेया उग्रचण्डी नाला गाविस १य् नेपाल इन्ट्रिग्रेटेड मोडेल एग्रो फार्म प्रालिया सिंहबहादुर कर्माचार्यं थथे चा हे म्वायेक गमलाय् हे तुसि सयेकूगु खः ।


चाय् सयेकूगु थें तग्वः मजुइगु थ्व तुसि जैविक सा व नैंक्याःया जटां दयेकातःगु कोकोपिटया मिश्रणय् सयेकूगु खः । स्वयेबलय् प्वलचा थेंच्वंगु थ्व तुसि नयेबलय् नं स्वादय् पाः । थ्व तुसिया तौल अप्वलय् बागू किलो जक दइ ।


भाजु कर्माचार्यं इजरायलं हःगु अत्याधुनिक प्रविधिपाखें परीक्षण कथं थुकथं तुसि सयेकूगु खः । थुकिया निंतिं राष्ट्रिय कृषि अनुसन्धान विकास कोष –नाडेफ) ३० लाखया अनुदान नं बिउगु खः । थुकिं फार्मय् ६५० गः गमलाय् ‘इंग्लिस कुकम्बर’ सयेकूगु खः ।
प्लाष्टिकया गामया्२५ प्रतिशत जैविक साः व ७५ प्रतिशत नैंक्याया जटा तयाः कोकोपिट दयेकूगु खः । थ्व प्रविधि नेपालय् सफल जूगु खँ न्ह्यथँसें वय्कलं फय् सनीथाय् न्ह्याथाय् नं थ्व प्रविधिपाखें तुसि सयेकेफइगु खँ कनादिल ।


वय्कलं थ्यंमथ्यं निगू रोपनी लागाय् टनेल दुने तुसि पिउगु खः । थ्व टनेलय् वय्कलं खुलाया दुने निक्वः तुसि सयेकेधुंकूगु दु । पिउगु ३५ न्हु दुने हे तुसि नयेजिइ कथं सइगु खँ कँसें वय्कलं थुकी छुं विषादी नं छ्यलेम्वाःगु खँ कनादिल ।
बजाःया माग कथं थुकियात अझ विस्तार यायेगु लक्ष्य वय्कःया दु । अर्गानिक उत्पादन बारे उपभोक्ता हे सचेत मजूगुलिं बजारय् धाःसा अझं समस्या दुगु वय्कलं कनादिल । थ्व तुसि किलोया ७० तकां मियाच्वंगु दु ।


येँया माछापोखरीइ च्वंगु सलोम एग्रिकल्चर प्रालिया संचालक श्रीकृष्ण अधिकारीं नेपालय् न्हापांखुसी चा म्वायेक तुसि सयेकेगु इजरायली प्रविधि हःगु खः । थौं स्वनिगलय् अप्वःसिनं छेँया कसिइ हे थ्व प्रविधिपाखें तुसि सयेकाच्वंगु खँ वय्कलं कनादिल ।
गुदँ तक इजरायलय् गमला फार्मिङ्गय् ज्या याना वयेधुंकूम्ह अधिकारीं विश्वय् यक्व देसय् चा म्वायेक हे बुँज्या याना वयेधुंकूगु खँ न्ह्यथँसें थज्याःगु कृषिइ सुरुइ यक्व लगानी माःसां लिपा थुकिं दिगो लाभ जुइगु खँ कनादिल ।


चा छगू माध्यम खः, खाद्य तत्व माय् थ्यनेधाःसा लखय् नं कृषि उत्पादन यायेफइगु तर्क तयादिसें वय्कलं थ्व प्रविधिया खेती नेपालय् स्वदँ न्ह्यवंनिसें सुरुजूगु खँ कनादिल । येँय् बाहेक पोखरा, पाँचथर व लमजुङ्गय् नं थ्व प्रविधिपाखें कृषि ज्या जुया वयाच्वंगु दु ।
थ्व प्रविधिं तुसि पिइबलय् झाःपाः वइगु समस्या मदइगु, तुसि पिइत छ्यलीगु कोकोपिट प्यदँ तक छ्यलेफइगु व छमा तुसिया निंतिं सछितका लगानी यायेमाः ।

Rate this item
(0 votes)
Login to post comments
Go to top

Copyright © 2016  nepalbhasa.com. All rights reserved.