All for Joomla All for Webmasters

ने.सं. ११३६ यंलागा अष्टमी

चीन–नेपाः–भारत आर्थिक मार्ग समृद्धिया सम्वाहक

चीन–नेपाः–भारत आर्थिक मार्ग समृद्धिया सम्वाहक स्केच साभार- my republica

चीन व नेपाःया विज्ञपिंसं चीन–नेपाः–भारत आर्थिक मार्ग दक्षिण एसियाया निंतिं जक मखु समग्र महाद्वीपया निंतिं हे समृद्धिया संवाहक जुइगु बिचाः प्वंकूगु दु । नेपाल विश्व सम्बन्ध परिषद व चीन अध्ययन केन्द्रया मंकाः ग्वसालय् बुधवाः जूगु ‘चीन–नेपाः–भारत आर्थिक मार्ग ः सम्भावना व दृष्टिकोण’ विषयय् जूगु कार्यशालाय् सहभागीपिंसं थ्व बिचाः प्वंकूगु खः ।


क्षेत्रीय विकास व समृद्धिया निंतिं चीनं न्ह्यःने हःगु ‘छगू क्षेत्र छगू मार्ग’ (वान बेल्ट वान रोड) अवधारणा ज्वनाः चीन–नेपाल–भारत आर्थिक मार्ग दयेकेफइगु सम्भावना यक्व दुगु खँ न्ह्यथँसें उमिसं थ्व विषय त्रिपक्षीय मामिला जूगुलिं थुकी स्वंगुलिं देय्या बराबर साझेदारी आवश्यक जूगु बिचाः प्वंकूगु खः ।

पुलांम्ह परराष्ट्रमन्त्री भेषबहादुर थापां चीन व भारत थेंज्याःगु विशाल जःलाखःला देय् दथुइ च्वंगु नेपाःया निंतिं थ्व मार्ग आर्थिक उन्नतिया दुगःक्वँय् जुइ धयादिसें धयादिल, ‘आर्थिक मार्ग दयेकेत त्रिदेशीय सहमति न्हापांगु आवश्यक्ता खः ।’
नीछगूगु शताब्दीया वर्तमान विश्वयात एसियां नेतृत्व यायेगु न्हि तापा मजूगु बिचाः प्वंकुसें वय्कलं ‘चीन व भारतं लिपांगु इलय् चूलाकूगु आर्थिक समृद्धि थुकिया दसू खः’ धयादिल ।

स्वंगुलिं देय्या सरकार व जनता दथुइ सहकार्य, एकतां जक चीन–नेपाः–भारत आर्थिक मार्ग सम्भव दुगु बिचाः प्वंकुसें वय्कलं त्रिदेशीय समन्वय, सहकार्य व साझेदारीइ थ्व लँ दयेकेगु खँ निर्भर जुइगु बिचाः प्वंकादिल ।
अथेहे नेपाःया निंतिं चीनिया राजदूत उ छुन्थाइं त्रिदेशीय आर्थिक मार्ग दयेकेत हिमालय पर्वत श्रृंखलां पंगः थनेफइमखु धासें प्राचीन कालय् नं चीन, नेपाः व भारत दथुइ व्यापार दुगु खँ कनादिल ।

नेपालय् दिगो शान्ति, प्रगति व राजनीतिक स्थायीत्व दयेमा धयागु चीनया इच्छा दुगु व थुकिया निंतिं थःगु देशं सम्भव दुगु ग्वाहालि बीगु खँ न्ह्यथँसें वय्कलं भौतिक पूर्वाधार दयेकेगु निंतिं चीनं पुँजी व प्रविधि चूलाकाबीगु प्रतिबद्धता प्वंकादिल ।
आर्थिक मार्ग दयेकेगु खँय् भारतय् कुटनीतिक ख्यलय् लिसें जनसाधारणय् नं अभिरुचि थःम्हं खंगु न्ह्यथँसें राजदूत उन्थाइनं नेपाःया राजनीतिक, व्यापारिक व समाजया फुक्कं तहलं थ्व लँ दयेकेगु खँय् असहमत जूगु थःम्हं मखना धयादिल ।
ज्याझ्वलय् चिनिया राजदूत उन्थाइ न्हापालिपा स्वयां खुले जुयाः सार्वजनिक सभाय् थःगु बिचाः प्वंकादीगु खः । थ्व झ्वलय् वय्कलं न्हूदिल्ली व येँय् लिसे चीनया सरकारी व जनस्तरं स्वापू तसकं क्वातुगु खँ कनादिल ।

समसामयिक अन्तर्राष्ट्रि सम्बन्ध सम्बन्धी चिनिया विद्वत् वर्गया संस्था (सिआइसिआइआर)या अध्यक्ष प्रा. जी झेइं चीनया ‘वान बेल्ट वान रोड’ अवधारणा छिमेकी देय्या विकासया रणनीतिलिसे सामञ्जस्य कायम यायेत हःगु खः धासें थुकीया मू उद्देश्य क्षेत्रीय शान्ति, स्थायित्व व समृद्धि जूगु स्पष्ट यानादिल ।

वय्कलं धयादिल, ‘वान बेल्ट वान रोड’ राष्ट्रिय रणनीति मखु । चीनया नियत सफा दु, थःलिसें थः जःखः देय्या नं दिगो आर्थिक विकास सुनश्चित जुइमाः धयागु ल्याखं हे वान बेल्ट वान रोड अवधारणा न्ह्यःने वःगु खः ।’
नेपाः व भारतया जनतां पूर्वाधार विकासया लिसें आर्थिक प्रगति चाहे जूगुलिं उमिगु म्हगस पूवंकेत आर्थिक मार्ग बरदान सावित जुइगु विश्वास प्वंकादिसें वय्कलं स्वंगुलिं देय् जानाः थ्व लँ दयेकेत अग्रसर जुइमाः धयादिल ।

नेपाल विश्व सम्बन्ध परिषदया अध्यक्ष राजेन्द्र बहादुर श्रेष्ठं आर्थिक, राजनीतिक व सैन्य शक्तिया दृष्टिं विश्वया शक्ति केन्द्र जुयाच्वंगु चीनया प्रगति नेपाः व भारतया प्रेरणा जुयाच्वंगु खँ न्ह्यथँसें विश्वया न्हय्गूगु अर्थतन्त्र कथं न्ह्याः वयाच्वंगु भारतयात नं आर्थिक गतिविधि अप्वयेकेत थ्व लँपु तसकं उपयोगी जुइ धयादिल ।

चीन अध्ययन कन्द्रया कार्यबाहक अध्यक्ष सुन्दरनाथ भट्टराइनं त्रिदेशीय आर्थिक मार्गं स्वंगुलिं देय्यात पारस्परिक लाभ दइगु अवधारणा कथं वःगु जूगुलिं थुकी सहभागी जुइगु ईया माग खः धयादिल ।
ज्याझ्वलय् भारतीय राजदूत रणजित रेयात नं ब्वनातःगु खःसां वय्कः धाःसा ज्या दुगुलिं वयेमफुगु जानकारी ग्वसाः खलकं बिउगु खः । तर वय्कःया प्रतिनिधि  तकं ज्याझ्वलय् मवःगुलिं सिआइसिआइआरया अध्यक्ष प्रा. जीं सहानुभूतिं प्वंकादिल ।

ज्याझ्वलय् पुलांम्ह मुख्यसचिव लीलामणि पौड्यालं आर्थिक मार्ग दयेकेगु निंतिं विकासया पक्ष, कानुन व्यवसायी युवराज संग्रौलां कानुनी दृष्टिकोण, प्रा. मदनकुमार दाहालं आर्थिक , पुलांम्ह अर्थमन्त्री मधुकर शम्शेर जबरां त्रिपक्षीय सहयोगया सम्भावना, पुलांपिं राजदूतपिं हिरण्यलाल श्रेष्ठ व शम्भुराम सिम्खडां छसिकथं क्षेत्रीय दृष्टिकोण व नीछगूगु शताब्दीइ चीन–नेपाः–भारत सम्बन्ध बारे थःपिनि ज्यापौ न्ह्यब्वःगु खः ।

 

Rate this item
(0 votes)
Login to post comments
Go to top

Copyright © 2016  nepalbhasa.com. All rights reserved.