All for Joomla All for Webmasters

ने.सं. ११३६ यंलागा अष्टमी

कन्हय् व्यवस्थापिका संसद भंग,बन्द सूची लःल्हायेगु म्याद थपे यायेगु कुतः

वर्तमान व्यवस्थापिका संसदया अन्तिम बैठक कन्हय् च्वनीगु जूगु दु । कन्हय् लिपा थ्व संसद भंग जुइ । मंसिरं जुइगु प्रतिनिधिसभा व प्रदेश सभा चुनावया लागिं कन्हय् बन्द सूची लःल्हाइगु जूगुलिं संसद नं कन्हय् हे भंग जुइत्यंगु खः । कन्हय् संसदया अन्तिम बैठक जूगुलिं थौं पारित याये मानिगु फुक्क हे विधेयक पारित याना छ्वयेगु तयारी जुयाच्वंगु खँ सीदुगु दु । कन्हय् जुइगु अन्तिम बैठकय् फुक्क हे दलया शीर्ष नेतातय्सं सम्बोधन याइगु ज्याझ्वः दयेकातःगु दु । थ्वहे झ्वलय् कन्हय् अन्तिम बैठक धाःसां आपालं सांसदतय्सं धाःसा कन्हय्या बैठक अन्तिम जुइ धकाः थौं तक मसिउनिगु खनेदु । संसद सचिवालयं थौं तक नं कन्हय्या बैठक अन्तिम जुइ धकाः मधाःनिगु कारणं नं सांसदत अन्यौलय् लानाच्वंगु खः ।

केन्द्र व प्रदेश चुनावया बन्द सूची कन्हय् लःल्हायेमाःगु जूगुलिं जक कन्हय् संसद भंग याये माःगु खः । छुं जुयाः बन्द सूची लःल्हायेगु म्याद थपे याना बिल धाःसा संसदया म्याद नं स्वतः थप जू वनीगु खनेदु । थौंकन्हय् गुगुं हे तःधंगु पार्टीतय् बन्द सूची तयार मजूनिगु कारणं बन्द सूची बुझे यायेगु म्याद थपे यायेगु बारे नं दलतय् दथुइ सहलह जुयाच्वंगु खँ सूत्रं कंगु दु । छुं जुयाः दलतय् दथुइ बन्द सूची बुझे यायेगु म्याद लिछ्यायेगु सहमति जुल धाःसा संसद कन्हय् भंग मजुइ नं फुगु खँ नं सूत्रं धाःगु दु ।

समानुपातिकया बन्द सूची बुझे यायेगु म्याद लिछ्यायेगु बारे प्रधानमन्त्री शेरबहादुर देउवां प्रस्ताव नापं तयादी धुंकूगु दु । तर वय्कःया नियतय् शंका जुयाः मेपिंसं उकी सहमति मक्यंनि । उकिं तःधंगु फुक्कं दलतय्गु सहमति कयाः थ्व मिति लिछ्यायेगु बारे सहलह न्ह्यानाच्वंगु खँ सीदुगु दु । थ्व बारे खँ ल्हायेगु थौं न्हिनय् स्वंगू तःधंगु दलया शीर्ष नेतातय् बैठक सःतातःगु दु । छुं महत्वपूर्ण विधेयकत पारित याये मानिगु जुयाः नं लिछ्यायेफुगु खँ धाःगु दु ।

संसद मदुगु इलय् गडबड जूसा ?

चुनावया मिति घोषणा जुइधुंकूगुलिं कन्हय् संसद ला भंग जुइ । तर संसद भंग जुइधुंकाः प्रधानमन्त्री शेरबहादुर देउवां चुनाव प्रभावित जुइ कथं छुं गडबड यात धाःसा छु यायेगु ? थौंकन्हय् एमाले व माओवादी नेतातय् नुगलय् थ्व न्ह्यसलं नं बाय् कयाच्वंगु दु । प्रधानमन्त्री देउवां उकुन्हु वामपन्थी पार्टीत छप्पँ जुइवं हे चुनाव लिछ्यायेगु कुतः याःगु कारणं आः संसद भंग जुइधुंकाः वय्कलं छुं गडबड जकं याइगु खः लाकि धइगु ग्याःचिकु ब्वलंगु खः ।संसद भंग जुइधुंकल कि देशय् सरकार निर्माण याइगु व भंग याइगु मेगु निकाय नं दइ मखु । अज्याःगु इलय् प्रधानमन्त्रीं छुं मखुगु ज्या यात धाःसा वयात चीकेगु लँपु नं दइ मखु । उकिं संसद मदुगु इलय् देउवां छुं गडबड जकं याइगु खः लाकि धइगु ग्याःचिकु एमाले व माओवादी नेतातय्त जुयाच्वंगु खँ सूत्रं धाःगु दु ।

मेखे वामपन्थी गठबन्धन जुइवं नेपाःस्थित भारत व अमेरिकी राजदूतपिं सतर्क जुया वःगु कारणं उमिसं देउवायात उक्से याइगु खः लाकि धकाः नं एमाले व माओवादी नेतात सचेत जूगु सूत्रया दावी दु । वामपन्थी गठबन्धन जुइवं चुनाव लिछ्याये माली धकाः भारत व अमेरिकाया राजदूतपिंसं परोक्ष रुपं बिचाः तया हःगु खँ सार्वजनिक जुयाच्वंगु दु । थज्याःगु पृष्ठभूमिइ प्रधानमन्त्रीयात प्रयोग यानाः उमिसं हे चुनाव लिछ्यायेगु खेल म्हितीगु जकं खः लाकि धइगु चिउताः नं वाम वृत्तय् जुयाच्वंगु खँ सूत्रं कंगु दु ।

Rate this item
(0 votes)
Login to post comments
Go to top

Copyright © 2016  nepalbhasa.com. All rights reserved.