All for Joomla All for Webmasters

ने.सं. ११३६ यंलागा अष्टमी

समानुपातिक धलः दयेकेत नं समस्या

केन्द्र व प्रदेश चुनावया लागिं समानुपातिकपाखेया बन्द धलः बुझे यायेगु म्याद आः स्वन्हु तक ल्यं दनि । तर नं आः तक गुगुं हे दलं समानुपातिकया बन्द धलः तयार धाःसा याये फयाच्वंगु मदुनि । कांग्रेस, एमाले, माओवादी लगायत मेगु चीधंगु दलतय्त तकं बन्द धलः तयार यायेत थाकुयाच्वंगु खँ सूत्रं धाःगु दु । धलः तयार यायेत दकलय् तःधंगु सकस ला न्यागू मधेसवादी पार्टी जानाः गठन याःगु राष्ट्रिय जनता पार्टीयात जुयाच्वंगु दु । थ्व पार्टीयात बन्द धलःया लागिं यक्व हे मनूतय् नां सिफारिस जुयाः वःगु कारणं धलः तयार यायेत हे थाकुयाच्वंगु खः । सूत्रं धाः कथं राजपाय् छगू हे जिल्लां ६८ म्ह तक मनूतय् नां सिफारिस जुयाः वःगु दु ।

एमाले दुने नं समानुपातिकया धलः तयार यायेत तसकं थाकुगुलिं कन्हय् स्थायी समितिया बैठक हे च्वनाः थ्व धलः तयार यायेगु खँ धाःगु दु । एमालें कन्हय् थ्व धलः याये फइगु आशा याःगु दु । अथे हे कांग्रेसय् नं नां धलः तयार यायेत थाकुगुलिं आः तक छुं हे याये फुगु मदुनि । कांग्रेसं नं कन्हय् बैठक च्वनाः नां धलः दयेकेगु खँ धाःगु दु । माओवादी नं अन्तिम चरणय् थ्यनाच्वंसां धलः तयार हे धाःसा याःगु मदुनि । माओवादीं नं कन्हय् थ्व धलः तयार यायेगु खँ धाःगु दु ।

माओवादी व एमाले दथुइ तालमेल यायेगु धाःगुलिं प्रत्यक्ष पाखेया नां नं आः तक तयार याये फुगु मदुनि । एमाले व माओवादी तालेमलय् नयाँ शक्तियात खास हे वास्ता मयाः धकाः डा. भट्टराईं यदि थथे हे जुइगु खःसा थःपिं वाम गठबन्धनय् हे च्वने मखु धकाः तकं ख्याच्वः बियाहःगु दु । बाबुरामया गृहजिल्ला गोरखाया निगुलिं सिटय् माओवादीं थः उम्मेदवार थनेगु जुइ धायेवं बाबुराम तम्वःगु खः । गोरखाय् माओवादीं नारायणकाजी श्रेष्ठयात थनेगु निर्णय यायेधुंकूगु दु । बाबुरामयात गोरखा त्वःताः येँय् वा धकाः माओवादीं आह्वान यायेवं बाबुरामं थ्व थःत अपमान याःगु खः धासें गठबन्धन त्वःता वनेगु ख्याच्वः बिउगु खः । समानुपातिक उम्मेदवारतय् बन्द धलः असोज २९ गते बुझे यायेमाः ।

Rate this item
(0 votes)
Login to post comments
Go to top

Copyright © 2016  nepalbhasa.com. All rights reserved.