All for Joomla All for Webmasters

ने.सं. ११३६ यंलागा अष्टमी

कांग्रेस बैठकय् पुनर्निर्माणया सीईओ

राष्ट्रिय पुनर्निर्माण प्राधिकरणया सीईओ डा. गोविन्दराज पोखरेल नेपाली कांग्रेसया पार्टीगत गतिविधिइ संलग्न जूगु धासें विवादय् लाःगु दु । छुं न्हि वय्कः प्यूठान चाःहिउ वंगु इलय् अन जुयाच्वंगु नेपाली कांग्रेसया थीथी ज्याझ्वलय् ब्वति काःगु खँ सीवं निर्वाचन आयोगं वय्कःयात तुरुन्त हे प्यूठान त्वःताः येँय् लिहां वा धकाः निर्देशन बिया छ्वःगु खः ।प्यूठानया कांग्रेस जिल्ला समितिं वय्कःया नां नं प्रत्यक्ष उम्मेदवार कथं सिफारिस याना हःगु दु । पार्टीपाखें थःगु नां हे सिफारिस याना हयेधुंकुसेंलि आः पदय् च्वनेगु पाय्छि जू ला धइगु न्ह्यसः नं पिहां वःगु दु । तर वय्कलं धाःसा नां सिफारिस याःसां थःत टिकट वल धइगु खँ आधिकारिक रुपं जानकारी मवःतले नां सिफारिस जूगु हे आधारय् राजीनामा बीम्वाः धकाः तर्क तयादीगु दु ।

नापं वय्कलं प्यूठानय् कांग्रेसया ध्वाँय्, ब्यानर आदि तयाः जूगु छुं हे कार्यक्रमय् थम्हं ब्वति मकयागु दावी नं यानादीगु दु । तर प्यूठानया जिल्ला प्रशासन कार्यालयं धाःसा वय्कलं कांग्रेसया आपालं आन्तरिक भेला व बैठकय् ब्वति काःगु खः धकाः रिपोर्ट छ्वया हःगु खँ सीदुगु दु । लुमंकेबहः जू, भारतया लागिं नेपाःया राजदूत दीपकुमार उपाध्यायं थः नं चुनावय् उम्मेदवार जुइगु निश्चित जुइवं राजदूत पदं राजीनामा बियादीगु खः । पोखरेलं धाःसा टिकट ल्हातय् मलाःतले राजीनामा मबीगु बिचाः यानाच्वंगु अनुमान याःगु दु । पुनर्निर्माण प्राधिकरणया ज्या ढिला जूगु खँय् नं वय्कःया आपालं आलोचना जुयाच्वंगु दु ।

Rate this item
(0 votes)
Login to post comments
Go to top

Copyright © 2016  nepalbhasa.com. All rights reserved.