All for Joomla All for Webmasters

ने.सं. ११३६ यंलागा अष्टमी

चुनाव लिछ्यायेगु देउवाया कुतः

राष्ट्रपति व सभामुख माने मजुइवं सर्वोच्चया प्रयोग ?

संसदया निगूगु तःधंगु दल एमाले व स्वंगूगु तःधंगु दल माओवादी दथुइ एकता यानाः चुनावय् ल्वायेगु तयारी यायेवं नेपाली कांग्रेसयात चुनाव हे घाघः थें जूगु दु । उकिं कांग्रेसया सभापति शेरबहादुर देउवा व वय्कः पक्षया छुं नेतात जिउसा मंसिरय् जुइगु थ्व चुनाव हे लिछ्यायेगु तयारीपाखे लगे जूगु खँ सीदुगु दु । प्रम देउवां थुकिया लागिं यानादीगु थीथी कुतःत आः तक नं सफल मजूनिसां वय्कःया कुतः धाःसा जारी हे जुयाच्वंगु खँ सूत्रं धाःगु दु ।निर्वाचन आयोगं मंसिर १० व मंसिर ३१ यानाः निगू चरणय् चुनाव यायेगु धकाः कार्यक्रम घोषणा याना तयेधुंकूगु दु । प्रम देउवां जिउसा मंसिरय् जुइगु थ्व चुनाव हे लिछ्यायेगु बिचाः यानादीगु खँ सूत्रं धाःगु दु ।

मजिउसा मंसिर १० गतेया मतदान नं ३१ गते हे यानाः छगू हे चरणय् चुनाव क्वचायेकेगु प्रस्ताव हयादीगु खँ नं सूत्रं कंगु दु । थुकिया लागिं वय्कलं दकलय् न्हापा कांग्रेस पक्षधर कानून व्यवसायीतय्गु बैठक सःताः राय कयादीगु खः । कानून व्यवसायीतय्सं थ्व ज्या याये जिउ तर उकिया लागिं राष्ट्रपति माने जुइमाः धइगु सुझाव बिउगु जुयाच्वन । उकिं प्रम देउवा थ्वहे प्रस्ताव ज्वनाः राष्ट्रपति विद्या भण्डारीयाथाय् झाल । तर राष्ट्रपति भण्डारी धाःसा थुकी सहमत जुया मदी । राष्ट्रपति भण्डारी एमाले पक्षधर व मेखे संसद सभामुख ओनसरी घर्ती नं माओवादी पक्षधर जूगु कारणं देउवाया थ्व प्रस्ताव पारित जुइगु सम्भावना खने मदु । 

उकिं आः देउवां सर्वोच्च अदालतया लँपु लिनाः जूसां थ्व ज्या यायेगु कुतः यानाच्वंगु खँ सूत्रं धाःगु दु । थुकिया लागिं देउवा पक्षं सर्वोच्चय् छगू मुद्दा दर्ता यानाः चुनावया मिति लिछ्यायेगु पहल यायेत स्वयाच्वंगु खँ सूत्रं धाःगु दु । देउवा पक्षं मेगु मखुसा उम्मेदवारतय् नां दर्ता यायेगु मिति छगू जक जूसां लिछ्याये माली धइगु प्रस्ताव नं हयाच्वंगु सूत्रया दावी दु ।

अथे हे मेगु छगू सूत्रं धाः कथं आः संसद भंग जुइवं थःपिंसं नं राजीनामा बियाः सरकारया नेतृत्व न्हापा थें सर्वोच्च अदालतया प्रधानन्यायाधीशयात बिया वन धाःसा गय् जुइ धइगु खँ नं देउवां सःतूगु कानून व्यवसायीतय् बैठकय् दना वःगु खः । न्हापा माओवादी अध्यक्ष पुष्पकमल दाहालं खिलराज रेग्मीयात मन्त्रिमण्डलया अध्यक्ष दयेकाः चुनाव याकू थें आः प्रधानन्यायाधीश गोपाल पराजुलीयात मन्त्रिमण्डलया अध्यक्ष दयेकाः चुनाव यायेगु तर मिति धाःसा लिछ्यायेगु रणनीति बारे नं चर्चा जूगु खः ।
प्रम देउवां यानाच्वंगु थ्व कुतःयात कांग्रेसया हे गुलिखे नेतातय्सं धाःसा समर्थन यानाच्वंगु मदुनि ।

Rate this item
(0 votes)
Login to post comments
Go to top

Copyright © 2016  nepalbhasa.com. All rights reserved.