All for Joomla All for Webmasters

ने.सं. ११३६ यंलागा अष्टमी

सुयां हे तालमेल ताःमलाःनि ,वार्ता न्ह्याना हे च्वंगुलिं उम्मेदवार घोषणा अन्यौल

मंसिरं जुइगु प्रतिनिधिसभा व प्रदेश सभाया चुनावय् ब्वति काइपिं उम्मेदवारतय् नां घोषणा यायेगु न्हि न्ह्यःने थ्यनेधुंकूसां नं फुक्क धइथें दलतय् दथुइ तालमेलया वार्ता नं न्ह्यानाच्वंगु जुयाः सुनां हे औपचारिक रुपं नां सार्वजनिक याये फयाच्वंगु मदुनि । एमाले व माओवादी दथुइ जुयाच्वंगु तालमेल वार्तायात याकनं हे क्वचायेकेत दबाब वयाच्वंसां छुं निर्णय धाःसा याये फयाच्वंगु मदुनि । अथे खःसां एमालें २७ व २८ गते च्वनीगु स्थायी समितिया बैठकं थुकियात अन्तिम रुप बीगु खँ धाःगु दु । एमाले दुने माओवादीलिसे जुयाच्वंगु तालमेल जक मखु थः दुने तक नं गुलिखे सिटय् विवाद जुयाच्वंगु दनि । खास यानाः राजधानी येँय् माओवादीयात म्हो जक सिट त्वःतीगु खँ जूगुलिं येँया थीथी सिटय् दनेगु लागिं एमाले दुने हे आन्तरिक प्रतिस्पर्धा जुयाच्वंगु दनि ।

यँेया ९ नम्बर क्षेत्रय् अष्टलक्ष्मी शाक्यं दनेगु निर्णय याःगुलिं अन नां वयाच्वंम्ह कृष्णगोपाल श्रेष्ठं ८ नम्बरय् दावी यानादीगु दु । तर ८ या जीवनराम श्रेष्ठं नं दावी मत्वःतूगुलिं अन विवाद जुयाच्वंगु दनि । येँया ६ नम्बरय् माओवादीया हिमाल शर्मा दनीगु सम्भावना अप्वःगु दु । १० नम्बरय् न्हापा पुष्पकमल दाहाल स्वयां अप्वः मत हःम्ह सुरेन्द्र मानन्धर हे दनीगु निश्चित जूगु दु । थ्व तालमेलय् नयाँ शक्तियात धाःसा सिट दइगु सम्भावना म्हो जक दु धाःगु दु ।उखे नेपाली कांग्रेस व संसफो लगायत राजपालिसे जुयाच्वंगु तालमेल ताःमलाःगु कारणं कांग्रेसं नं उम्मेदवार आः तक क्वःछी फयाच्वंगु मदुनि ।

चुनाव छगू हे चरणय् याकेगु कुतः

एकीकरणपाखे वंगु वामपन्थीत सिटया तालमेलपाखे व्यस्त जुयाच्वंगु इलय् नेपाली कांग्रेस नेतृत्वया सरकार धाःसा निगू चरणय् जुइगु धकाः घोषणा हे जुइधुंकूगु चुनाव आः छगू हे चरणय् याकेगु तयारीपाखे लगे जूगु दु । थ्व ज्याय् स्वयम् प्रधानमन्त्री शेरबहादुर देउवा हे सक्रिय जुया च्वनादीगु खँ सीदुगु दु । मंसिरय् निगू चरणय् चुनाव यायेगु धकाः निर्वाचन आयोगं फुक्क तयारी यायेधुंकूगु अवस्थाय् नेपाली कांग्रेस आः छगू हे चरणय् चुनाव याकेमाः धकाः न्ह्यःने न्ह्याः वःगु खः । प्रम देउवां थ्व प्रस्ताव राष्ट्रपति विद्यादेवी भण्डारीयाथाय् समेत तयादीधुंकूगु खँ नं सीदुगु दु ।

आःयात दुनें दुनें जक यंकाच्वंगु थ्व प्रस्तावयात आः कांग्रेसं सार्वजनिक रुपं हे न्ह्यःने हये फुगु खँ नं धाःगु दु । तर कांग्रेसया थ्व प्रस्तावयात निर्वाचन आयोगं धाःसा अस्वीकार यायेधुंकूगु दु । स्वयम् कांग्रेस दुने हे नं प्रकाशमान सिंह लगायत मेपिं नेतातय्सं आःया इलय् थज्याःगु ज्या याये मते धकाः प्रतिवाद याःगु खँ सीदुगु दु ।

Rate this item
(0 votes)
Login to post comments
Go to top

Copyright © 2016  nepalbhasa.com. All rights reserved.