All for Joomla All for Webmasters

ने.सं. ११३६ यंलागा अष्टमी

पुलांम्ह कुमारी मतिनाया स्कुलय् न्हापांगु न्हि

पुलांम्ह कुमारी मतिनाया स्कुलय् न्हापांगु न्हि किपा फुक्क्ं- तेजनारायण महर्जन

तेजनारायण महर्जन

वाउँगु स्कुल ड्रेस, हाकुगु मोजा, हाकुगु हे लाकां न्ह्यानाः, हाकुगु ब्याग पाछायाः पूर्वकुमारी मतिना शाक्य थौं न्हापांखुसी स्कूल वनेत छेँनं पिहां झाःबलय् कुमारी जुयाः पिहां वइबलय् थें हे देशीविदेशी पत्रकारतय् क्यामराया ‘क्लिक क्लिक’या सलं लसकुस यात । थौं सुथय् पौने १० बजेपाखे स्कूल वनेत वय्कः अबु प्रतापमानया ल्हाः ज्वनाः छेँनं पिहां झाःगु खः ।

वय्कः स्कूल ड्रेसय् पिहां झाःगु न्हापांगु किपा कायेगु निंतिं थीथी टेलिभिजन च्यालन, पत्रपत्रिकाया क्यामराम्यानत वय्कःया छेँया लुखा न्ह्यःने हे तयार जुयाच्वंगु खः । छेँनं पिहां झायेवं मां सुनितां लुखाय् च्वनाः ‘बाई’ यानादिलसा, लिसलय् वय्कलं नं ‘बाई’ हे यासें अबु प्रतापमान व तता मिजलाया ल्हाः ज्वनाः इतुंबहालं भोटेबहालय् च्वंगु ग्रीनपिस को–एडतक न्यासि हे झाल । चोखाछेँ गल्लि, वंघः, न्हूसतक, ओमबहाः जुयाः न्यासि झाःम्ह वय्कःया किपा कायेगु निंतिं क्यामराम्यानत नं लिउलिउ न्ह्यः न्ह्यः जुया हे च्वन । स्कूल थ्यनेवं प्रिन्सिपल, शिक्षक शिक्षिका, विद्यार्थीपिंसं लापा थानाः, वाउँगु म्हासुगु झण्डा ब्वयेकाः वय्कःयात लसकुस यात ।


स्कूल न्ह्यःने थ्यनेवं प्रिन्सिपल पेमा योञ्जन लिसें शिक्षकशिक्षिकापिंसं वय्कःया ल्हाः भागि यानाः लसकुस यात । वय्कःयात लसकुस यायेत स्कूलय् चिकिचाधंगु ज्याझ्वः हे तयातःगु खः । दबुली वय्कःया लिसें उगु हे स्कूलय् ब्वनाबिज्याइम्ह श्री गणेश नापं फ्यतुकाः खादां क्वखायेकाः लसकुस यात । स्कूलया विद्यार्थीपिंसं राष्ट्रिय गान व स्कूलया म्येँ न्यंकल । लसकुस ज्याझ्वः क्वचायेवं वय्कःयात कक्षा क्वथाय् यंकल । वय्कः न्हय्गूगु तगिंया ‘बी’ सेक्सनया न्हापांगु बेञ्चय् हे च्वनादिल । नापं च्वंम्ह ‘क्लासमेटं’ याःगु ‘वेलकम’यात ‘थ्यांक्यु’ धासें पासा म्हसीकादिल । न्हापांखुसी स्कूल झाःम्ह वय्कलं सफू ज्वना मझाःगुलिं पासाया सफू छ्यलादिल ।


वंगु मोहनिया कूछिभ्वय् कुन्हु कुमारी आसनं कुहां झायाः सर्वसाधारण जीवन सुरु यानादीम्ह पूर्वकुमारी मतिना थौं न्हापांखुसी स्कूल झाःगु खः । थौं न्हापांगु न्हि जूगुलिं छगू निगू कक्षा जक कयाः लित ब्वना यंकेगु खँ वय्कःया अबु प्रतापमान शाक्यं कनादिल । स्कूलय् लसकुस यासें प्रिन्सिपल पेमा योञ्जनं वय्कःयात आः सामान्य मचा सरह हे व्यवहार यानाः सहज वातावरण दयेकाः ब्वंकेगु खँ कनादिल । कुमारी जुयाच्वंगु इलय् नं वय्कःयात थुगु हे स्कूलं शिक्षिका छ्वयाः ब्वंका वयाच्वंगु खः ।

कुमारी जुइधुंकाः बँय् पलाः तकं नयेम्वाःम्ह कुमारी माजुयात थःगु स्कूलय् लसकुस याये दयाः थःपिं तसकं उत्साहित जुयागु खँ धासें वय्कःया निंतिं स्कूलपाखें माःकथं अतिरिक्त कक्षा कयाः ब्वंकेगु व्यवस्था यायेगु, अतिरिक्त क्रियाकलापय् ब्वति कायेत ग्वाहालि यायेगु खँ प्रिन्सिपल योञ्जनं धयादिल ।

 

 

 

Rate this item
(0 votes)
Login to post comments
Go to top

Copyright © 2016  nepalbhasa.com. All rights reserved.