All for Joomla All for Webmasters

ने.सं. ११३६ यंलागा अष्टमी

स्वनिगःव्यापी धिमे कासाय् नासंचा धिमे खलः न्हाप

मानन्धर ब्यायाम मन्दिर ख्वपया ग्वसालय् जूगु निक्वःगु स्वनिगःव्यापी धिमे धेंधेंबल्लाः कासाय् ख्वपया हे क्वाथन्डौं त्वाःया नासंचा धिमे खलः न्हाप लाःगु दु । अथे हे किपूया नगामय् च्वंगु बालकुमारि धिमे खलः लिउ व मध्यपुर थिमिया सिवाः साय्मि खलः मचा पुचः लियांलिउ लाःगु दु ।
ब्यायाम मन्दिर नीन्यादँ क्यंगु वह दँ बुन्हिया लसताय् जूगु धिमे धेंधेंबल्लाः कासाय् विजयी जुयादीपिंत नेपाल मजदुर किसान पार्टीया नायः नारायणमान बिजुक्छें सिरपाःकथं सिजःया धिमय् लःल्हानादीगु खः । ख्वपया दत्तात्रयय् जूगु ज्याझ्वः निगू चरणय् न्ह्याःगु खः । येँ, यल व ख्वपया निर्णायकपिंसं कासाय् ब्वति कायेत वःपिंसं थाःगु धिमय् बोललिसें ताल, शैली व वसःयात नं आधार कयाः उत्कृष्टताया मूल्यांकन याःगु खः ।

ख्वपया हे जीवन्त सांस्कृतिक धरोहरकथं कयातःम्ह श्रीगोपाल प्रजापति प्रमुख निर्णायक व मेपिं निर्णायक मण्डलय् मोहन व्यञ्जनकार, शेषनारायण महर्जन, विष्णुबहादुर मानन्धरपिं च्वनादीगु खः ।थ्व स्वयां न्ह्यः जूगु औपचारिक ज्याझ्वलय् पुलांम्ह सांसदलिसें उद्योगपति लक्ष्मीदास मानन्धरं संस्कृति संरक्षणय् सक्रिय संघसंस्थायात ग्वाहालि यायेगु नापं प्रोत्साहन बीमाःगु खँय् बः बियादीगु खः । लिसें वय्कलं साहित्य, कला, भाषा, संस्कृतिनापं बाजनं समुदायया मौलिकता न्ह्यब्वइगु जूगुलिं उकिया ल्यंका तयेत आह्वान यानादिल ।

अथे हे इतिहासविद पुरुषोत्तमलोचन श्रेष्ठं तत्कालिन नेपालमण्डलया राजधानी ख्वपयात सांस्कृतिक सहरया रुपय् विकास याना वनेमाःगु धयादिल । वय्कलं ऐतिहासिक पहिचान कुबिनाच्वंगु ख्वप देसय् सांस्कृतिक गतिविधि संचालन याःगु धासें संस्थायात सुभाय् देछानादिल । म्युजिकल अर्केष्ट्राया निर्देशक विष्णुबहादुर मानन्धरं मेमेगु बाजंलिसें लोपोन्मुख बाजं व नगरा थाना थःगु प्रस्तुति न्ह्यब्वयादीगु ज्याझ्वलय् नाटक, ख्यालः लिसें सांगीतिक प्रस्तुति नं न्ह्यब्वःगु खः । स्थानीय समाजसेवी तुल्सीकाजी मानन्धरया सभापतित्वय् ज्याझ्वः जूगु खःसा धिमय् कासाय् स्वनिगःया थीथी संस्थाया नीनिगू धिमे पुचलं ब्वति काःगु खः ।

Rate this item
(0 votes)
Login to post comments
Go to top

Copyright © 2016  nepalbhasa.com. All rights reserved.