All for Joomla All for Webmasters

ने.सं. ११३६ यंलागा अष्टमी

गठबन्धनय् सिट बाँडफाँड, नयाँ शक्तिपाखें १५ प्रतिशत सिटय् दावी

चुनावया लागिं तालमेल यायेगु घोषणा लिपा थौं एमाले–माओवादी गठबन्धन दथुइ सिट बाँडफाँड बारे बैठक च्वंगु दु । निगू दल दथुइ एमालेयात ६० व माओवादीयात ४० प्रतिशत सिट बीगु सहमति जूगु दु ।थ्व सहमति कथं गन गन एमालें कायेगु गन गन माओवादीं कायेगु धकाः निर्णय यायेत थौं बैठक च्वंगु खः । सूत्रं धाः कथं थ्व बाँडफाँडया लागिं उकुन्हु जूगु स्थानीय निकायया चुनाव व व स्वयां न्ह्यः जूगु संविधानसभा चुनावया लिच्वःयात आधार दयेकाः सिट इनेगु जुइ । थुकिया लागिं माओवादीपाखें दलीय ल्याःचाः सम्बन्धी छगू धलः तयार याना हःगु दु । थौंया बैठक वहे धलखय् केन्द्रित जुइगु खँ धाःगु दु । 

निगू दल दथुइ ६०–४० सिट इना कायेगु सहमति जू कथं प्रतिनिधि सभाया कुल १६५ सिट मध्ये एमालें ९९ व माओवादीं ६६ सिट उम्मेदवारी थने खनी । अथे हे न्हय्गुलिं प्रदेशया कुल ३३० सिट मध्ये एमालें १९८ व माओवादीं १३२ सिटय् उम्मेदवार थने खनी । समानुपातिक उम्मेदवारतय् धलः धाःसा थःथःगु हे अलग अलग जुइ । थ्वहे वाम गठबन्धनय् दुथ्याःगु मेगु दल नयाँ शक्तिं थःपिंत १५ प्रतिशत सिट माः धकाः दावी याःगु खँ सीदुगु दु ।

तर एमाले व माओवादी थुलि बीत धाःसा तयार जूगु मदुनि । थ्व निगू पार्टीं मेमेगु दलयात थःथःगु भागं समायोजन यानाः थाय् त्वःतेगु खँ धाःगु दु । एमालें सुद्र्यः चिं कयाः चुनाव ल्वाइपिं मेमेगु दलया नेतातय्त नं थःगु भागं सिट बीत्यंगु दु ।थ्वहे झ्वलय् थौं सुथय् च्वंगु एमाले स्थायी समितिया बैठकं सरकारय् च्वनाच्वंपिं माओवादी मन्त्रीतय्त लिकया हये दइ मखु धकाः सरकारयात सचेत याःगु दु । चुनावया माहौल शुरु जुइधुंकूगुलिं मन्त्री हिलाबुला यायेगु चलखेलपाखे सरकार वने मते धकाः एमालें सचेत याःगु खः ।

फोरम–राजपापाखें निखें वार्ता

मिले जुयाः चुनाव ल्वायेगु सहमति सहित न्ह्यःने वःगु संघीय समाजवादी फोरम व राष्ट्रिय जनता पार्टीया गठबन्धनं थौं कांग्रेस नेतृत्वया लोकतान्त्रिक गठबन्धनलिसे सिट बाँडबाँड बारे वार्ता याइगु जूगु दु । थःपिंत गन गुलि सिट बीगु धकाः थ्व निगुलिं दलं मंकाः रुपं दावी पेश यायेगु खँ धाःगु दु ।
लोकतान्त्रिक गठबन्धन धुंकाः अज्याःगु हे तालमेलया प्रस्ताव एमाले व माओवादी दुथ्याःगु वाम गठबन्धनय् नं तयेगु खँ धाःगु दु । थःगु लागाय् फयांफछि गुलि अप्वः सिट त्याके फइ उलि हे कुतः यायेगु रणनीति कथं फोरम व राजपापाखें थ्व कुतः यायेत्यंगु खः । मेखे थौं कांग्रेस नेतृत्वया लोकतान्त्रिक गठबन्धनया नं चुनावी तालमेल बारे सहलह जू ।

Rate this item
(0 votes)
Login to post comments
Go to top

Copyright © 2016  nepalbhasa.com. All rights reserved.