All for Joomla All for Webmasters

ने.सं. ११३६ यंलागा अष्टमी

वाम गठबन्धनया उम्मेदवार ल्यज्या

छगू हे घोषणापत्र दयेकाः चुनावय् वनीगु

पार्टी एकीकरण तकया लक्ष्य तयाः गठन जूगु वाम गठबन्धनं आः वइगु केन्द्र व प्रदेशया चुनावय् तालमेल यानाः उम्मेदवारी बीगु जूगु दु । तालमेल यानाः उम्मेदवारी बीगु लागिं थौं गठबन्धनं दयेकूगु समितिया बैठक च्वंगु दु । थ्व चुनावय् एमालेपाखें ६० व माओवादीपाखें ४० प्रतिशत उम्मेदवारी बियाः प्याकेज दयेका वनेगु सहमति उमि दथुइ जूगु खः । थुकी एमाले व माओवादीया हे सिटय् नयाँ शक्ति पार्टीयात नं समायोजन यानाः सिट मिले यायेगु सहमति नं जूगु दु । प्रत्यक्षया लागिं जुइगु चुनावय् थ्व ६०–४० या समीकरण कथं उम्मेदवारी क्वःछीगु खँ धाःगु दु ।

अथे हे चुनावया लागिं थ्व स्वंगुलिं पार्टीया मंकाः चुनावी घोषणा पत्र दयेका वनेगु सहमति नं जूगु दु । चुनावी घोषणा पत्र व उम्मेदवार ल्यज्या यायेगु लागिं म्हिगः निगू अलग अलग समिति नं गठन याःगु खः । थौं निगुलिं समितिया मंकाः बैठक सिंहदरवारस्थित एमाले संसदीय दलया ज्याकुथी च्वंगु खः ।बैठकय् सहभागी जूपिं एमालेया अध्यक्ष केपी ओली व माओवादीया अध्यक्ष पुष्पकमल दाहालं आः वइगु न्हय्न्हुया दुने उम्मेदवार सम्बन्धी प्रतिवेदन व चुनावी घोषणापत्रया मस्यौदा तयार याना हजि धकाः निर्देशन बिउगु दु ।

थ्वहे झ्वलय् एमालेपाखें स्वनिगः लगायत देय्या थीथी थासय् सुनां सुनां चुनाव ल्वाइ धकाः धमाधम उम्मेदवारी घोषणा शुरु याना हःगु दु । माओवादी व नयाँ शक्तिपाखें धाःसा उम्मेदवार घोषणा बारे आः तक छुं हे ज्या न्ह्याकूगु मदुनि । थ्व निगुलिं पार्टीपाखें गन सु दनी धइगु बारे चर्चा नं जूगु खने मदुनि ।थ्व स्वंगू पार्टीपाखें चुनावी तालमेल याःसां चुनाव चिं धाःसा अलग अलग हे कयाः ल्वायेगु तयारी जुयाच्वंगु खँ नं सीदुगु दु ।

लोकतान्त्रिक गठबन्धनया नं बैठक

एमाले व माओवादी जानाः वाम गठबन्धन दयेकेवं नेपाली कांग्रेसया नेतृत्वय् गठन याःगु लोकतान्त्रिक गठबन्धनया नं थौं बैठक च्वंगु दु । गठबन्धन बैठकय् खास यानाः सत्ता साझेदार पार्टी माओवादी प्रमुख प्रतिपक्षी एमालेलिसे मिले जू वंगु कारणं आः थ्व पार्टीलिसेया सत्ता साझेदारी कायम याना तयेगु लाकि तोडे यायेगु धइगु बारे सहलह जूगु खँ सीदुगु दु । बैठकय् सरकारय् मदुपिं पार्टीया नेतात नं सहभागी जूगु खः ।

लिसें थ्व बैठकय् आः वइगु चुनावय् थःपिं दथुइ नं तालेमल यानाः न्ह्याः वने माली धइगु खँय् नं सहलह जूगु खः । तर तालमेल यायेगु खःसां उकिया समीकरण गय् यानाः मिले यायेगु खँ धाःसा क्वःजिउगु मदुनि । लिसें तालमेल यानाः हे वनेगु धकाः नं आः तक निर्णय मजूनिगु खँ धाःगु दु । चुनाव तालमेल बारे सहलह यानाः निष्कर्ष पिकायेत ७ म्ह दुजः दुगु छगू समिति नं गठन याःगु दु ।

Rate this item
(0 votes)
Login to post comments
Go to top

Copyright © 2016  nepalbhasa.com. All rights reserved.