All for Joomla All for Webmasters

ने.सं. ११३६ यंलागा अष्टमी

एमाले, माओवादी केन्द्र व नयाँ शक्तिया गठबन्धन, चुनाव लिपा एकता

एमाले, माओवादी केन्द्र व नयाँ शक्तिं म्हिगः आकाझाकां वाम एकता यायेगु धासें प्रदेश सभा व प्रतिनिधि सभाया चुनाव लिपा पार्टी एकीकरण यायेगु तकया घोषणा यायेवं नेपाःया राजनीतिक हाकनं छक्वः तरंगित जूगु दु । स्वंगू पार्टीया एकता घोषणा लिपा सत्तारुढ नेपाली कांग्रेस थःपिनिगु रणनीति दयेकेगु निंतिं थौं सुथय् ११ बजे निसें केन्द्रीय कार्यसम्पादन समितिया बैठक च्वनाच्वंगु दु । मेखे कमल थापाया राष्ट्रिय प्रजातन्त्र पार्टी नं न्हूगु गठबन्धन पाखे हे वनेगु संकेत क्यंगु दु । राप्रपा नेता थापां म्हिगः हे पार्टीया छगू ज्याझ्वलय् न्ववासें राष्ट्रवादी पार्टीतय् धु्रवीकरणं राष्ट्रवादी शक्ति छप्पँ जुइगु खँ धयादीगु दु ।

म्हिगः बुधवाः एमाले, माओवादी व नयाँ शक्तिं वइगु मंसिरय् जुइगु प्रतिनिधि सभा व प्रदेश सभा चुनावय् गठबन्धन यायेगु व चुनाव क्वचायेवं पार्टी एकता यायेगु घोषणा याःगु खः । अझ थुकी नं बाबुराम भट्टराईया नेतृत्वय् दुगु नयाँ शक्तिं थ्व चुनावय् सूद्र्यः चिं कयाः हे चुनाव ल्वाइगु जूगु दु । माओवादी केन्द्र नं सूद्र्यः चिं हे कयाः चुनाव ल्वायेगु खँ जूसां प्राविधिक कारणं थथे सम्भव जुइमफुगु खः । मंगलवाः राष्ट्रिय सभागृहय् एमालेया अध्यक्ष केपी ओली, माओवादी केन्द्र अध्यक्ष पुष्पकमल दाहाल व नयाँ शक्ति संयोजक बाबुराम भट्टरार्इं खुगू बुँदाया सहमतिपत्रय् हस्ताक्षर यासें वाम एकताया घोषणा यानादीगु खः ।

वाम एकताया घोषणा यासें नेतातय्सं थःपिनिगु एकता सुयागुं विरुद्धय् मखसे देय् व जनताया निंतिं खः धाःगु खः । आः जूगु सहमति कथं चुनावय् एमालें ६० प्रतिशत व माओवादीं ४० प्रतिशत उम्मेदवार थनीगु जुइ । नयाँ शक्ति व मेगु गठबन्धन पार्टीया सिट मिले यायेधुंकाः ल्यंगु दुगु सिटय् एमाले व माओवादीं सहमति कथं उम्मेदवार थनी । चुनावया निंतिं स्वंगुलिं पार्टीं मंकाः घोषणा पत्र दयेकीगु जूगु दु । अथेहे चुनाव लिपा पार्टी एकताया निंतिं एमाले अध्यक्ष व माओवादी अध्यक्ष सहित एमालेपाखें प्यम्ह, माओवादी पाखें स्वम्ह व नयाँ शक्तिपाखें छम्ह दुजः दुगु एकता समिति नं गठन याःगु दु ।

 छाय् मकाल माओवादीं सुद्र्यः चिं

चुनाव लिपा एकता यायेगु तयारी यानाच्वंगु एमाले, माओवादी व नयाँ शक्तिं वइगु चुनावय् सकस्यां सुद्र्यः चिं हे कयाः ब्वति कायेगु तयारी याःगु खः । तर निर्वाचन आयोगं माआवादीया ईंचा मुगः चिं तयाः मतपत्र छापे यायेधुनागु व आः तुरुन्त मतपत्र हिलेगु सम्भावना मदु धाःगुलिं नं माओवादीं थःगु हे चिं कयाः चुनाव ल्वायेत्यंगु खः ।

यदि सुद्र्यः चिं कयाः चुनाव ल्वात धाःसा थुकिया प्रचार बांलाक यायेमफुत धाःसा माओवादी समर्थकतय्सं हाकनं ईंचा मुगलय् हे छाप तलकि मत सितिं वनी धयागु ल्याखं माओवादी थःगु हे चिं कयाः चुनाव ल्वायेत्यंगु खः ।अथेहे सुद्र्यः चिं कयाः चुनाव त्यानावःपिं सकलें एमालेया हे सांसद जुइगु व उमित एमाले हे ह्वीप लागू जुइगु जुइ । यदि छुं गथे जुयाः चुनाव लिपा एकताया खँ स्यन धाःसा माओवादीया ल्हातय् छम्ह नं सांसद मलाइगु जूगुलिं नं माओवादीं थःगु हे चिं कयाः चुनाव ल्वायेत्यंगु खः ।

 रणनीति दयेकेत कांग्रेसया बैठक

एमाले, माओवादी केन्दं व नयाँ शक्तिं आकाझाकां म्हिगः वाम एकताया घोषणा यायेवं नेपाली कांग्रेसं थःपिनि रणनीति दयेकेत थौं केन्द्रीय कार्यसम्पादन समितिया बैठक च्वंगु दु । थौं सुथय् ११ बजे प्रधानमन्त्री निवास बालुवाटारय् कांग्रेस कार्यसम्पादन समितिया बैठक च्वंगु खः । बैठकं म्हिगः घोषणा जूगु वाम एकतायात कयाः पार्टीया आधिकारिक धारणा पितबीगु खँ धाःगु दु ।

बैठकय् स्वंगू पार्टीया तालमेल लिपा आः गथे यानाः न्ह्याः वनेगु धयागु बारे सहलह जुइ । अथेहे वइगु मंसिरं जुइगु प्रदेश सभा व प्रतिनिधि सभाया चुनावय् मेमेगु पार्टीलिसे तालमेल यायेगु व सरकारं आः गज्याःगु भूमिका म्हितेगु धयागु बारे सहलह जुइगु खँ नं धाःगु दु । बैठकं आः चुनावय् राजपा, राप्रपा, राप्रपा प्रजातान्त्रिकलिसे जानाः चुनाव ल्वायेगु सम्बन्धय् निर्णय जुइफु धाःगु दु । 

Rate this item
(0 votes)
Login to post comments
Go to top

Copyright © 2016  nepalbhasa.com. All rights reserved.