All for Joomla All for Webmasters

ने.सं. ११३६ यंलागा अष्टमी

ओमबहाःया तृष्णा शाक्य येँ लाय्कूया न्हूम्ह कुमारी

कन्हय् न्हिनय् १२ बजे कुमारी हिलीगु

येँया लाय्कू कुमारी कन्हय् अष्टमि कुन्हु हिलीगु जूगु दु । कन्हय् न्हिनय् १२ः०२ बजे वर्तमान कुमारीयात बिदाई यानाः न्हूम्ह कुमारी प्रतिष्ठापन याइगु साइत पिकयातःगु दु । न्हूम्ह कुमारीयात राजकीय सम्मानपूर्वक दुकायेगु ज्या जुइसा वर्तमान कुमारीयात नं राजकीय सम्मानपूर्वक हे विदाई यायेगु ज्या जुइ ।न्हूम्ह कुमारी हिलीबलय् वर्तमान कुमारीं छपा तुति पिने तयेवं न्हूम्ह कुमारीं छपा तुति दुने तयाः पाःलाक्क हे दुहां वनेगु व पिहां वनेगु ज्या याइगु खः । न्हूम्ह कुमारीया रुपय् आः थनया ओमबहाः त्वाःयाम्ह म्ह्याय्मचा मय्जु तृष्णा शाक्ययात पलिस्था याइगु जूगु दु । म्हिगः राष्ट्रपति विद्यादेवी भण्डारीयात नापलानाः वय्कःया ग्वय्दां तयेगु ज्या जूगु खः । राष्ट्रप्रमुखया हैसियतं राष्ट्रपति भण्डारीयात वय्कः म्हसीके बीगु ज्या नं जूगु खः ।

मय्जु तृष्णा शाक्य ओमबहाः त्वालय् च्वंगु बिकमा बहाः (विश्वकर्मा महाविहार) या भाजु विजय शाक्य व मय्जु सिर्जना शाक्यया म्ह्याय्मय्जु खः । वय्कःया छम्ह किजा नं दी । थौंकन्हय् स्वदँत्या दुम्ह वय्कः स्कूलय् आखः नं ब्वना च्वनादीगु दु । कन्हय् वय्कःयात न्हूम्ह कुमारी कथं प्रतिष्ठापन यायेधुंकाः कन्हय् हे चान्हय् रात्रिकुन्हु तलेजु भवानीयाथाय् जुइगु पुजाय् सहभागी जुयादी । वर्तमान कुमारी मतिना शाक्य थौंकन्हय् १२ दँ क्यंगुलिं वसपोलया थासय् न्हूम्ह कुमारी प्रतिष्ठापन यायेत्यंगु खः । वसपोल स्वदँ दुबलय् कुमारी जुयाबिज्याःगु खः । वसपोल गुदँ तक कुमारी जुयाबिज्यात । तःदँ तक कुमारी जुयाबिज्याःपिं मध्ये छम्ह वसपोल नं खः ।

वसपोल गणतान्त्रिक नेपाःया न्हापांम्ह कुमारी नं खः गुम्हेस्यां देय्या न्हापांम्ह राष्ट्रपतियात सिन्हः तिकाबिज्यात । येँया इतुम्बहालय् च्वनाबिज्याइम्ह वसपोल नेपालभाषा आन्दोलनया सक्रिय कार्यकर्ता लिसें नेपाल लिपि गुथिया पुलांम्ह नायः प्रतापमान शाक्य व मय्जु सुनिता शाक्यया म्ह्याय्मय्जु खः । वसपोलया छम्ह तता नं दी । वसपोलं कुमारीछेँय् हे च्वनाः थःगु अध्ययनयात नं न्ह्यःने न्ह्याकाबिज्याःगु खः । थौंकन्हय् वसपोल येँया ग्रीनपीस को–एड स्कूलया ७ तगिंया विद्यार्थी खः । कुमारीछेँनं पिहां बिज्यायेधुंकाः वसपोल उगु हे स्कूलय् नियमित विद्यार्थीया रुपय् आखः ब्वं बिज्याइ ।

Rate this item
(0 votes)
Login to post comments
Go to top

Copyright © 2016  nepalbhasa.com. All rights reserved.