All for Joomla All for Webmasters

ने.सं. ११३६ यंलागा अष्टमी

महरां नये मखन ट्रम्पया पार्टी

अमेरिकाया न्यूयोर्कय् राष्ट्रपति डोनाल्ड ट्रम्पं ग्वसाः ग्वःगु ब्यलि भ्वजय् ब्वति कायेत थ्यनेधुंकाः नं दुने दुहां वने मखनाः नेपाःया उपप्रधान लिसें परराष्ट्र मन्त्री कृष्णबहादुर महरा लिहां वयेमाःगु खँयात कयाः कुटनीतिक ख्यलय् थीथी न्ह्यसः पिहां वःगु दु ।राष्ट्र संघीय महासभाय् ब्वति काः वइपिंं विश्वया फुक्क हे देय्या प्रतिनिधितय्त अमेरिकी राष्ट्रपतिं न्यूयोर्कय् तुं ब्यलि भ्वय् बीगु कुटनीतिक परम्परा दु । उगु भ्वजय् नेपाःपाखें प्रधानमन्त्री शेरबहादुर देउवां ब्वति काये माःगु खः । तर वय्कलं थःगु प्रतिनिधि कथं उप प्रम लिसें परराष्ट्र मन्त्री कृष्ण बहादुर महरायात अन ब्वति काः वनेगु जिम्मा बियाः थः लिहां झाःगु जुयाच्वन ।प्रमया निर्देशन कथं उपप्रम महरा ब्वनापौ ज्वनाः ज्याझ्वलय् झाल । तर ब्वनापौ देउवायात वःगु जुयाः उपप्रमयात धाःसा मूलुखां हे दुने मछ्वत ।

दुने वनेगु लागिं महरा बाघौ तक पिने हे पियाच्वन । तर बाघौ तक पियां नं वय्कःयात दुत धाःसा मकाः । राष्ट्रपतिया उगु ज्याझ्वलय् उपप्रमं ब्वति काइगु जुइवं उकिया व्यवस्थापन यायेगु मू भाला नेपाःया न्यूयोर्क मिसन प्रमुख दुर्गाप्रसाद भट्टराईयागु खः । तर वय्कलं अतिकं लापर्वाही यानादीगु कारणं अन नेपाःया उपप्रमया बेइज्जत जूगु खँ धाःगु दु ।प्रमया थासय् उपप्रम ज्याझ्वलय् वइगु जुइवं इलय् हे उकिया सुचं बियाः अनुमति कायेगु ज्या नेपाःया न्यूयोर्क मिसनं यायेमाःगु खः । न्हापा नं थ्व ज्याझ्वलय् प्रधानमन्त्री सुशील कोइरालाया पलेसा तत्कालिन उपप्रम प्रकाशमान सिंहं ब्वति कयाः तत्कालिन अमेरिकी राष्ट्रपति बाराक ओबामालिसे ल्हाः मिले यानादीगु खः ।

Rate this item
(0 votes)
Login to post comments
Go to top

Copyright © 2016  nepalbhasa.com. All rights reserved.