All for Joomla All for Webmasters

ने.सं. ११३६ यंलागा अष्टमी

मधेसवादीतय्त प्रदेश चुनावय् मिले जुइत दबाब

प्रदेश नं. २ लय् नकतिनि क्वचाःगु स्थानीय चुनावया लिच्वलं मधेसवादी पार्टीतय्त आः वइगु प्रतिनिधि सभा व प्रदेश सभाय् मिले जुयाः चुनाव ल्वायेत दबाब लाकूगु दु । मधेसवादी पार्टीतय्सं थुकियात वाःचायेके नं धुंकूगु दु । स्थानीय तह चुनावया थ्यंमथ्यं फुक्क तहया लिच्वः वयेधुंकूगु दु । थ्व लिच्वः कथं दकलय् न्ह्यःने कांग्रेस लानाच्वंगु दु । मधेसवादी पार्टीत निगूगु व स्वंगूगु थासय् लानाच्वंगु दु । थ्व ल्याखं स्वयेबलय् यदि मिले जुयाः चुनाव ल्वाःगु खःसा मधेसवादी पार्टीत हे न्ह्यःने लाइगु खः । आःतक पिहांवःगु लिच्वः कथं कांग्रेस ३७ गू थासय् त्याःगु दुसा संघीय समाजवादी फोरम २३ गू थासय्, राजपा २२ गू थासय् व लोकतान्त्रिक फोरम स्वंगू थासय् त्याःगु दु । मेमेगु प्रदेशय् दकलय्न्ह्यःने लाःगु एमाले २ नं. प्रदेशय् आःतक मुक्कं १६ गू तहलय् जक त्यानाः प्यंगूगु थासय् दु ।

यदि समाजवादी व राजपा जक छगू थासय् च्वंगु खःसां कांग्रेस स्वयां थ्व गठबन्धन यक्वं न्ह्यःने लाइगु खः ।मेमेगु प्रदेशय् स्वयां बांलाःगु लिच्वः वःसां मधेस आन्दोलनया नेतृत्व याःगु राजपाया नेतातय्सं अपेक्षा यानाकथं लिच्वः मवःगु धासें आः प्रदेश सभाया चुनावय् मिले जुया वनेमाःगु खँ धाःगु दु । राजपा नेपाल अध्यक्ष मण्डलया छम्ह दुजः महेन्द्र रायं आःया लिच्वः सकारात्मक जूसां अपेक्षा कथं मजू धासें धाःगु दु, ‘थ्व लिच्वलं आन्दोलनकारी शक्तितय्त मिले जुयाः वनेमाःगु संकेत बिउगु दु । आः तालमेलया निंतिं हे कुतः यायेगु जुइ ।’समाजवादी फोरमया वरिष्ठ नेता अशोक राईं तालमेलया निंतिं यानागु कुतः असफल जूगुलिं कांग्रेस न्ह्यःने लाःगु धासें आन्दोलनकारी शक्ति मिले जूगु खःसां प्रदेसय् दकलय् न्ह्यःने लाइगु आःया लिच्वलं खनेदुगु स्वीकार यानादीगु दु ।

Rate this item
(0 votes)
Login to post comments
Go to top

Copyright © 2016  nepalbhasa.com. All rights reserved.