All for Joomla All for Webmasters

ने.सं. ११३६ यंलागा अष्टमी

संहिता उल्लंघन नियन्त्रणं पिने

प्रदेश नम्बर २ लय् जुइत्यंगु स्थानीय तहया चुनावय् आचार संहिताया उल्लंखन जुयाच्वंगु आः नियन्त्रणं हे पिने थ्यनेधुंकूगु खँ धाःगु दु । थन आचार संहिता उल्लंघन यायेगु ज्या न्हियान्हिथं हे अप्वयाच्वंसां निर्वाचन आयोगं जक उकियात नियन्त्रण याये मफइगु अवस्था जुयाच्वंगु खँ नं धाःगु दु ।अले अथे आचार संहिता उल्लंघन यायेगु ज्याय् दकलय् न्ह्यःने धाःसा सत्तारुढ दल नेपाली कांग्रेस, माओवादी व विपक्षी पार्टी एमाले लगायत प्रभावशाली मधेसी दलत हे लानाच्वंगु दु ।

उमिसं आचार संहिताया व्यापक उल्लंघन यानाच्वंसां नं निर्वाचन आयोगं धाःसा छुं हे याये मफइगु अवस्था थ्यनाच्वंगु खँ धाःगु दु । निर्वाचनय् ब्वति कयाच्वंपिं उम्मेदवारतय्सं निगः बाहेक गाडी चले याये मजिउ धइगु आचार संहिता दुसां थौंकन्हय् छम्ह हे उम्मेदवारं १४ गः तक गाडी चले यानाच्वंगु नं लूगु दु । अले उमिसं चले याइगु अज्याःगु गाडी गुलिखे भारतीय नम्बर प्लेटया गाडी समेत लानाच्वंगु नं खने दयाच्वंगु दु ।

भारतीय नम्बर प्लेटया गाडी धाःसा चुनाव ल्वाइपिं उम्मेदवारतय्सं जक मखु सुरक्षाया लागिं खटे जुयाच्वंपिं सुरक्षाकर्मीतय्सं तकं भारतीय प्लेटया गाडी चले यानाच्वंगु नं खने दुगु दु । अथे हे आचार संहिता कथं स्कूलया मस्तय्त चुनाव प्रचारय् प्रयोग याये मजिउ । तर अन थीथी पार्टीया चुनाव प्रचारय् स्कूलया मस्त नं सहभागी जुयाच्वंगु दु । अझ गुलिखे उम्मेदवारतय्सं ला स्कूलया हे गाडी तकं चुनाव प्रचारय् प्रयोग यानाच्वंगु दु । उमिसं चले यानाच्वंगु गाडीइ स्कूलया नां तकं हुयातःगु मदु ।

चुनाव प्रचार यायेत थाय्थासय् डिजे साउण्ड सिस्टम हे तयाः म्येँ हायेगु व नारा थ्वयेकेगु ज्या नं यानाच्वंगु दु । थुकिं यानाः नगर हे तसकं कोलाहलमय जुयाच्वंगु खँ स्थानीय मनूतय्सं धाःगु दु । सुथय् व बहनी जुल कि लँय् लँय् हे खुल्ला रुपं भ्वय् नकेगु ज्या समेत जुयाच्वंगु दु । आचार संहिताया उल्लंघन यायेत निर्वाचन आयोगं अन निम्ह सचिव व १४ म्ह उपसचिवत खटे यानातःगु दु तर उमिसं नं छुं याये फयाच्वंगु मदु । चुनाव प्रचारय् प्रधानमन्त्री शेरबहादुर देउवा नं सहभागी जुयादीगु दु ।

Rate this item
(0 votes)
Login to post comments
Go to top

Copyright © 2016  nepalbhasa.com. All rights reserved.