All for Joomla All for Webmasters

ने.सं. ११३६ यंलागा अष्टमी

मोहनि न्ह्यः बजाःभाः थहां वन,सरकारया ध्यान ततःधंगु सामानया भाःपाखे जक

तःधंगु नखः मोहनि न्ह्यःने वयेवं सरकारया थीथी निकायत सक्रिय जुयाः बजार अनुगमन याःसां नं बजारय् सी मदयेक खाद्यान्नया भाः नं थहां वनाच्वंगु दु । छक्वलं यक्व भाः थहां वंगु खँय् अनुगमन याइपिनि मिखा वंसां बुलुहुँ व सी मदयेक थहां वनाच्वंगु बजाः भावय् धाःसा उमिसं ध्यान बिउगु खने मदु ।मोहनि न्ह्यःने थ्यंकः वःगु संकेत कथं दकलय् न्हापां जाकिया भाः हे थकाःगु दु ।

थौंकन्हय् बजारय् वयाच्वंगु जाकित प्रति बोरा सछि तका धइथें भाः थहां वनाच्वंगु दु । बजारय् जाकिया भाः थहां वंगुया कारण मोहनि सिबें नं न्ह्यःने वयाच्वंगु चुनाव खः धाःगु दु । चुनावय् पार्टीतय्त चन्दा बीमाःगु जुयाः व्यापारीतय्सं बजाः भाः थकाःगु खः । तर व्यापारीतय्सं उकुन्हु वःगु खुसिबालं यक्व नोक्सान याःगुलिं बजाः भाः थकाये माःगु तर्क न्ह्यःने तया हःगु दु । जब कि बजारय् खुसिबाः वःगु इलय् हे नं उलि भाः थहां मवंगु खः ।

अथे हे बजारय् थीथी कथंया केँया भाः नं थहां वंगु दु । थौंकन्हय् केँया भाः किलों झितका धइथें भाः थहां वनाच्वंगु दु । थुकिया कारण धाःसा खुसिबाः व भारतय् समेत भाः थहां वंगु धइगु तर्क न्ह्यःने तःगु दु । छुं न्हि न्ह्यः तिनि दरवारमार्ग लागाय् अनुगमन विभागं छापा मारे यानाः यक्व लबः कयाः सामान मिउगु द्वपनय् कारवाही न्ह्याकूगुलिं तयारी वसः मीपिं व्यापारीत धाःसा मोहनिया इलय् नं सतर्क जूगु दु । थुकिं यानाः तयार सामानया भाः नं थहां वने फुगु खँ धाःगु दु ।

लँ स्यनाः गाडीयात समस्या

मोहनि नखःयात ध्यानय् तयाः थप यातायात सञ्चालन यायेत यातायात व्यवसायीत तयार ला जुल तर राजधानी वयेगु राजमार्ग तसकं स्यनाच्वंगु कारणं माक्व गाडी सञ्चालन यायेत थाकुइगु खँ यातायात व्यवसायीतय्सं धाःगु दु । थौंकन्हय् मुग्लिन–नारायणघाट राजमार्ग तसकं स्यनाच्वंगु व थाय्थासय् चलः नं वनाच्वंगु कारणं न्हूगु गाडीत अन चले याये मफइगु व मेगु रुटय् चले जुइगु गाडीत नं उगु लँपु जुयाः हये मफइगु खँ व्यवसायीतय्सं धाःगु दु ।

मुग्लिन–नारायणघाट खण्डय् वंगु छुं न्हि न्ह्यवंनिसें जुयाच्वंगु अवरोध चीकाः थनिंनिसें तिनि बल्ल गाडी चले यायेगु शुरु याःगु खः । यातायात व्यवसायीतय्सं मोहनिया इलय् यात्रुतय्त च्वय् हुडय् तयाः समेत तया यंके दयेमाः धइगु मौन सहमति सरकारपाखें प्राप्त याःगु दु । वयां लिपा तिनि उमिसं टिकट बुकिङ खुले याःगु खः ।

Rate this item
(0 votes)
Login to post comments
Go to top

Copyright © 2016  nepalbhasa.com. All rights reserved.