All for Joomla All for Webmasters

ने.सं. ११३६ यंलागा अष्टमी

चक्रेश्वर सर्वज्ञरत्न देथाय्पा

येँ देय्या वज्राचार्य गुरुजुपिं मध्ये दकलय् थकालिम्ह मैत्रीपूर महाविहार क्वाःबहाःया चक्रेश्वर सर्वज्ञरत्न वज्राचार्ययात देथाय्पाया मुखः पुइकाः देथाय्पा जूगु घोषणा जूगु दु । वंगु शुक्रवाः क्वाःबहालय् जूगु छगू परम्परागत ज्याझ्वःया दथुइ राजुगुरुजु मञ्जुश्री रत्न वज्राचार्यं वसपोलयात मुखः पुइकाः देथाय्पाः घोषणा यानादीगु खः ।

उगु इलय् राजगुरुजुपाखें अभिषेक विइगु झ्वलय् कलाशाभिषेक, मुखः, गं, वज्र, नां (सिन्ह), स्वांमा व छत्रया अभिषेक बिइगु ज्या जूगु खः ।नेपाःया प्रचलित स्वंगू बौद्ध निकाय वज्रयान, महायान, थेरवादया गुरुजु, लामा, भन्त गुरुमापिंसं न्हूम्ह देथाय्पायात खादा क्वखायेकाः भिंतुना देछायादीगु खः । ज्याझ्वलय् थीथी बौद्ध संघसंस्थाया लिसें बौद्ध शैक्षिक क्षेत्रया व्यक्तिपिंसं ब्वति काःगु खः । लिसें सलंसः गुरुजु, जजमानपिनि नं उपस्थिति दुगु खः ।

आः देथाय्पा जुयाबिज्याःम्ह चक्रेश्वर सर्वज्ञरत्न वज्राचार्य ९४ दँ दुम्ह खः । वय्कःया आः येँदेय्या वज्राचार्यपिं मध्ये दकलय् थजिम्ह व देथाय्पा गुरुजुपिनि दकलय् सर्वोच्च गुरुजु जुयाबिज्याःगु खँ राजगुरुजुं कनाबिज्याःगु दु ।
राजगुरुजुया हे ग्वसालय् जूगु थुगु ज्याझ्वःयात वज्राचार्य संरक्षण गुथि, नेपाल परम्परागत बौद्ध धर्म संघ, कान्तिपुर, मैत्रिपुर संरक्षण समिति, फ्रेण्डस अफ कान्तिपुर, त्रिरत्न कोषं ग्वाहालि याःगु खः ।

Rate this item
(0 votes)
Login to post comments
Go to top

Copyright © 2016  nepalbhasa.com. All rights reserved.