All for Joomla All for Webmasters

ने.सं. ११३६ यंलागा अष्टमी

बोस्टन सहरय् तःजिक यँयाः हन

अमेरिकाया बोस्टन सहरस्थित म्यासाचुसेट्सय् च्वंपिं नेवाःतय्सं नं तःजिक यँयाः नखः हंगु दु । नेवाः अर्गनाइजेसन अफ न्यू इंग्ल्याण्डया ग्वसालय् यँयाःया लसताय् आः नकतिनि अनया आर्सनल पार्कय् ‘यँयाःपुन्हि व समय्बजि’ ज्या याःगु खः । ज्याझ्वलय् कुमरिया खः सालेगु, पुलुकिसि व लाखे प्याखं नं हुइकेगु नापं समय्बजिया ब्वज्या याःगु खः । अथे हे सारंगी, बासुरिलिसें थीथी हुलाप्याखं नं न्ह्यब्वःगु खः ।

ज्याझ्वलय् खुदँ दुम्ह अद्रिना कर्माचार्ययात कुमारि यानाः रथय् तथयाः सालेगु ज्या याःगु खःसा बिजेन्द्र प्रधानं लाखे, श्रीयुत कर्माचार्य झ्यालिंचा, निर्भिक सिं पुलुकिसि व न्यूयोर्क झायादीम्ह कबिना सिं कुमारि प्याखं न्ह्यब्वयादीगु खः ।
संगठनया दुजःपिंसं थःपिनिगु हे कुतलय् खः दयेकाः न्यायेकूगु यँयाः ज्याझ्वलय् धिमे, लाखे, पुलुकिसिं पार्क चाःहिलेगु ज्या जूगु खः ।

उगु ज्याझ्वलय् होलिक्रस कलेजया प्रा. टड लेविस, एनआरएन म्यासाचुसेट्स च्याप्टरया नायः विष्णु कार्की, एनआरएन एसीसीए बोर्ड डाइरेक्टरपिं तृष्णा शर्मा, भुवन गुरुङ, मिलन गुरुङ, हिमालयन लायन्स क्लबया राम थापा, बोस्टन तमु समाजया सम्झना गुरुङ, साझा डटकमया सन प्रधान, नेपाली राजदूतावासया प्रल्हाद केसी, नेवाः अर्गनाइजेसन अफ अमेरिकाया कुमार सिन्दुराकार, समरभिल्ले नेपाली समुदायया राधेश्यम श्रेष्ठ, शेर्पा समाजया काजी शेर्पा, किरात राई अमेरिकाया मुक्ति राई लगायतयापिं पाहांकथं झायादीगु खः ।
बोस्टनस्थित संगठनं थुकथं येँया न्यायेकूगु थ्व निक्वःखुसी जूगु नायः दिपक डंगोलं कनादीगु दु ।

Rate this item
(0 votes)
Login to post comments
Go to top

Copyright © 2016  nepalbhasa.com. All rights reserved.