All for Joomla All for Webmasters

ने.सं. ११३६ यंलागा अष्टमी

कृष्णदेवीयात प्रेम–मोहन सिरपाः लःल्हात

निदँय् छक्वः बीगु यानाच्वंगु थुगुसीया प्रेममोहन सिरपाः पद्मानन्द बज्राचार्यं च्वयातःगु ‘राजकुमार पुनाल’ नांगु बौद्ध जातक बाखनय् आधारित पूधाप्याखं सम्पादन यानाः पिथनादीम्ह मय्जु कृष्णदेवी बज्राचार्य बिउगु दु । थः मचाबलय् स्वक्वः तक स्वयागु उगु प्याखंया पुवंक पाण्डुलिपि मलूगुलिं थःम्हं स्वयागुया लिधंसाय् हे मय्जु वज्राचार्य प्याखं पूवंकाः पूधाप्याखं पिथनादीगु खः ।

वय्कःया सिरपाः धाःसा वय्कःया काय् पवित्र बज्राचार्यं लःल्हाना कयादीगु खः । सिरपाः कथं मूपाहाँ जनकवि दुर्गालाल श्रेष्ठं न्यय्द्वः तका दांया चेक व हनापौ लःल्हानादीगु खः । ज्याझ्वलय् जनकवि दुर्गालाल श्रेष्ठं स्वक्वःतक क्यने धुंकाः प्रतिबन्ध तःगु उगु प्याखं च्वमि मदयेधुंकाः नं वय्कःया तिरिमय्जुं सम्पादन यानाः पिथनादीगु धइगु त्यपू जीवनय् मदये धुंकाः नं समर्पित जीवनया ज्वःमदुगु दसु खः धयादिल ।

सफूया मू च्वमि परमानन्द बज्राचार्यया काय् पवित्र बज्राचार्यं थः मां कृष्णदेवी बज्राचार्य ८६ दँया बैसय् नं त्यानु मचाःसें थीथी कथंया बाखं, चिनाखं व सफू च्वयेगु ज्याय् सक्रिय जुयाच्वंगु न्ह्यथनादिसें मदुम्ह परमानन्द छम्ह राणाबिरोधी क्रान्तिकारी राजनीतिक कार्यकर्ता, च्वमि व जागरुक ल्याय्म्ह जूगु ल्याखं राणातय्सं ज्वनाः कुनाः सासना यानाः नं थुगु प्याखंया पाण्डुलिपि च्याका छ्वयेमाःगु अवस्था वःगु खँ कनादिल ।

प्रेममोहन सिरपा गुथिया नायः राजा शाक्यया सभापतित्वय् जूगु उगु ज्याझ्वलय् मथुरा साय्मिं उगु हे ज्याझ्वलय् विमोचन जूगु मदुम्ह मोहनकृष्ण डंगोलया लिपांगु उपन्यास ‘विकल्प’ व वय्कःया हे न्हापा हे पिहांवःगु पूधाप्याखं ‘भृकुटी’ या बारे ध्वाथुइकादीगु खः । सिरपा गुथिया दांभरी व छ्याञ्जे मय्जु रेणुका बासुकलां लसकुस यानादीगु ज्याझ्वलय् सिरपालय् १ लाख ३५ हजार दां थप जूगु नं जानकारी बिउगु खः ।

Rate this item
(0 votes)
Login to post comments
Go to top

Copyright © 2016  nepalbhasa.com. All rights reserved.