All for Joomla All for Webmasters

ने.सं. ११३६ यंलागा अष्टमी

‘हानं मन्त्री थप जुइफु’

चुनाव सिधयेवं हाकनं संशोधन प्रसताव हयेगु जुइ ः देउवा

प्रधानमन्त्री शेरबहादुर देउवां यदि आवश्यक जुल धाःसा मन्त्रिमण्डलय् मन्त्री जुइपिं अझ हे थपे जुइ फइगु खँ कनादीगु दु । थौं सुथय् विराटनगर विमानस्थलय् पत्रकारतलिसे खँ ल्हासें वय्कलं थ्व खँ कनादीगु खः । वय्कलं म्हिगः विस्तार यानादीगु मन्त्रिमण्डलय् ५४ म्ह मछि मन्त्रीत तल धकाः आलोचना जुयाच्वंगु विषयय् पत्रकारतय्सं न्यंगु न्ह्यसःया लिसः बिसें वय्कलं धयादिल, ‘थुलि यानाः ला मन्त्री जुइपिंत अझ हे मगाःनि ।

मन्त्री जुइ माल धकाः अझ हे धाः वयाच्वंगु दनि । उकिं आवश्यक जुल धाःसा थुकी अझ हे थपे जुइ तिनि ।’चुनावया न्ह्यःने वयाः मन्त्रिमण्डल विस्तार याःगु खँय् आचार संहिताया उल्लंघन जुल धकाः निर्वाचन आयोगं तप्यंक हे धायेधुंकूगु दु, थज्याःगु अवस्थाय् आः सरकारं छु याइ धकाः पत्रकारतय्सं न्यंगु न्ह्यसःया लिसः बिसें वय्कलं धयादिल, ‘आयोगं धाःसां आः सरकारं निर्णय लित काये फइ मखु । आयोगं आचार संहिता विपरित जुल जक धाःगु दु, निर्णय हे लित का धाःगु मदु ।’

प्रम देउवां मधेसी जनतायात अधिकार सम्पन्न यायेगु लागिं हयागु संविधान संशोधन प्रस्ताव विफल जूसां आः चुनाव सिधेयवं हानं संशोधन प्रस्ताव हयेगु खँ नं कनादिल । संविधान छगू क्यातुसेच्वंगु दस्तावेज जूगु कारणं थुकियात न्ह्यागु इलय् नं संशोधन याये फइगु दावी नं वय्कलं यानादिल ।
२ नम्बर प्रदेशया चुनाव प्रचार सभाय् ब्वति कायेत झाःम्ह प्रम देउवा आः चुनाव न्ह्यः मौन अवधि शुरु मजूतले तराई लागाय् हे व्यस्त जुयादीगु खँ धाःगु दु ।

आचारसंहिता विपरीतया प्रचार सामग्री ज्वन

 जनकपुरया छगू प्रेसय् प्रहरी छापामारे यानाः निर्वाचन आचारसंहिता अःखः दयेकातःगु थीथी प्रचारसामग्री ज्वंगु दु । टिसर्ट व तपुलीइ पार्टीया नारा च्वयाः दयेकातःगु द्वलंद्वः तकाया सामान जनकपुरया कलवार कुट्टीइ च्वंगु मिथिला प्रेसं ज्वनागु खँ जिल्ला प्रहरी कार्यालय धनुषां धाःगु दु ।

प्रहरीं नियन्त्रणय् काःगु टिसर्ट, तपुली एमाले, कांग्रेस, माओवादी केन्द्र व राजपाया जूगु खँ धाःगु दु । जनकपुरय् निर्वाचन आचारसंहिता विपरीत प्रचार ज्या जुयाच्वंगु धकाः आलोचना जुइवं प्रहरीं सोमवाः निसें सक्रियता अप्वयेकूगु खः ।

Rate this item
(0 votes)
Login to post comments
Go to top

Copyright © 2016  nepalbhasa.com. All rights reserved.