All for Joomla All for Webmasters

ने.सं. ११३६ यंलागा अष्टमी

रोहिंज्या मुस्मां नेपाः दुहां वइ धकाः उच्च सतर्कता

भारतय् च्वनाच्वंपिं म्यानमारया रोहिंज्या शरणार्थीत नेपाः दुहां वये फइगु सम्भावना दु धासें गृह मन्त्रालयं सीमा नाकाय् कडा याःगु दु । म्यानमारय् थौंकन्हय् चर्के जुयावःगु हिंसाया कारणं लखौं राहिंज्यात देय् त्वःताः वनेत बाध्य जुयाच्वंगु दु । अन्तर्राष्ट्रिय रुपं रोहिंज्या मुस्मांतय्त दमन जुयाच्वंगु खँया चर्चा जुयाच्वंगु हे इलय् भारतं थःथाय् छुं दँ न्ह्यवंनिसें च्वनाच्वंपिं द्वलंद्वः रोहिंज्या शरणार्थीतय्त देश निकाला यायेगु धायेवं थुपिं नेपाः दुहां वइगु ग्याःचिकु गृहप्रशासनयात जूगु खः ।

भारतं पितिनाहल धाःसा थःगु देय् म्यानमार लिहां वने फइगु अवस्थाय् मदुगुलिं थुपिं भूटानी शरणार्थी थें नेपाः दुहां वयेफुगु खँ गृह मन्त्रालयं धाःगु दु । अथे जुइके मबीत भारतलिसेया सीमा नाकाय् कडाइ यानाच्वनागु खँ मन्त्रालयया प्रवक्ता रामकृष्ण सुवेदीं धयादीगु दु ।उपिं नेपाः दुहां वये मफयेमा धकाः दक्षिणी सीमा नाकाय् च्वंगु जिल्लाय् सुरक्षा समितियात निर्देशन बियागु धासें प्रवक्ता सुवेदीं उच्च सतर्कता नालेत आदेश वनेधुंकूगु खँ धयादीगु दु ।

छुं छुं रोहिंज्या शरणार्थीत थ्वयां न्ह्यः हे नेपाः दुहां वयाच्वनेधुंकूपिं नं दु । थुपिं मध्ये निसःम्हेसिनं शरणार्थी परिचयपत्र नं कायेधुंकूगु खँ धाःगु दु । तर थौंकन्हय् धाःसा रोहिंज्या मुस्मांत नेपाः दुहां वःगु सूचना मवःनिगु खँ गृहप्रवक्ता सुवेदीं धयादीगु दु । वय्कलं धयादीगु दु, ‘स्थानीय स्तरं सुचं मुंकेत थीथी संयन्त्र दयेकागु दु ।

उमित गोप्यरुपं परिचालन यानाच्वनागु दु । गैरकानुनी रुपं सुं दुहां वल धाःसा गृह प्रशासनय् सुचं थ्यंकेगु व्यवस्था यानातयागु दु ।’छुं दँ न्ह्यः नेपालय् छगू लाखं मल्याक भूटानी शरणार्थी दुहां वःगु खः । थौंकन्हय् उमित पश्चिमी देशय् पुनस्र्थापित यायेयंकूसां झिद्वलं मल्याक भूटानी शरणार्थीत अझ हे नेपालय् च्वनाच्वंगु दनि ।

Rate this item
(0 votes)
Login to post comments
Go to top

Copyright © 2016  nepalbhasa.com. All rights reserved.