All for Joomla All for Webmasters

ने.सं. ११३६ यंलागा अष्टमी

मन्त्रिपरिषदय् ५४ म्ह दुजः

निर्वाचन आचारसंहिता विपरीत धासें एमालेया विरोध

निर्वाचन आचारसंहिता विपरित प्रधानमन्त्री शेरबहादुर देउवां थांै स्वम्ह मन्त्रीतय्त शपथ ग्रहण याकूगु दु । निर्वाचन तिथि घोषणा यायेधुंकूगु अवस्थाय् मन्त्रिमण्डल विस्तार याये मजिउगु खँ निर्वाचन आयोगं हे धयाच्वंसां प्रधानमन्त्री राप्रपा (प्रजातान्त्रिक)या स्वम्ह मन्त्री व छम्ह राज्यमन्त्री तयाः मन्त्रिमण्डल विस्तार याःगु खः ।

थौं सुथय् छगू समारोहया दथुइ राष्ट्रपति विद्यादेवी भण्डारीं नवनियुक्त मन्त्रीपिं दीपक बोहरा, विक्रम पाण्डे व सुनिलबहादुर थापायात शपथ ग्रहण याकादीगु खः । प्रधानमन्त्री देउवां बोहरायात विज्ञान तथा प्रविधि मन्त्री, पाण्डेयात वन मन्त्री व थापायात उद्योगमन्त्री दयेकूगु खः । अथेहे उद्योग राज्यमन्त्री जुयादीम्ह रेशम लामायात थौं हे सिंहदरबारय् शपथ याकीगु खँ धाःगु दु ।

न्हापा हे ५० म्ह दुजः दयेधुंकूगु मन्त्रिमण्डलय् आः प्यम्ह थप जुइवं ५४ म्ह थ्यंगु दु । देउवाया थ्व मन्त्रिमण्डल आःतकया हे दकलय् तःधंगु मन्त्रिमण्डल जूगु दु ।थ्वहे दथुइ प्रमुख विपक्षी दल एमालें मन्त्रिपरिषद् विस्तारया विरोध याःगु दु । प्रतिनिधि सभा व प्रदेश सभाया निर्वाचन प्रक्रिया सुरु जुइधुंकाः मन्त्री नियुक्त यायेगु निर्वाचन आचारसंहिता विपरित जूगु खँ एमालें धाःगु दु ।
निर्वाचन आचारसंहिता कथं निर्वाचन घोषणा जुइधुंकाः सरकारं छम्ह कर्मचारीयात सरुवा तकं याये दइमखु । थज्याःगु अवस्थाय् नं मन्त्रिपरिषद् विस्तार याःगु धासें एमालें निर्वाचन आयोगया ध्यानाकर्षण नं याःगु दु ।

न्यायाधीश सरुवा तयारी

प्रमुख प्रतिपक्षी नेकपा एमालें आः सरकारं जिल्ला न्यायाधीशत सरुवा यायेगु तयारी यानाच्वंगु द्वपं बिउगु दु । सरकारं निर्वाचनयात प्रभावित यायेगु निंतिं हे जिल्ला न्यायाधीश सरुवा यायेत्यंगु धासें एमालें थुकियात छुं नं हालत याके मबीगु खँ धाःगु दु । न्यायाधीश सरुवाया निंतिं प्रधानन्यायाधीश गोपाल पराजुली व निर्वाचन आयोगया पदाधिकारी दथुइ आइतवाः सहलह जूगु द्वपं एमालें बियाच्वंगु दु ।

तर आयोगं धाःसा थ्व सहलह चुनावया निंतिं न्यायाधीशया व्यवस्था यायेत जूगु खँ धाःगु दु । जिल्ला न्यायाधीश हे मुख्य निर्वाचन अधिकृत जुइगुलिं न्यायाधीश सरुवा यायेगु धयागु तप्यंक हे निर्वाचन प्रभावित यायेगु खः धासें थ्व खँ थःपिंत स्वीकार्य मजुइगु खँ एमाले संसदीय दलया उपनेता सुवास नेम्वाङं धयादीगु दु ।

Rate this item
(0 votes)
Login to post comments
Go to top

Copyright © 2016  nepalbhasa.com. All rights reserved.