All for Joomla All for Webmasters

ने.सं. ११३६ यंलागा अष्टमी

आचार संहिताया व्यापक उल्लंघन

डमी उम्मेदवारतय्गु गाडी सुविधा तःधंगु दलतय्त

थ्वहे असोज २ गते २ नम्बर प्रदेशय् जुइगु स्थानीय तहया चुनावय् अतिकं ग्यानापुक आचार संहिताया उल्लंघन जुयाच्वंगु खनाः निर्वाचन आयोग हे थारान्हूगु खँ सीदुगु दु । उम्मेदवार नामांकन दर्ता जूकुन्हुं निसें हे ततःधंगु भ्वय् नकाः शुरु जूगु आचार संहिता उल्लंघनया ज्या आः धमाधम हे तःधं जुजुं वःगु दु । थौंकन्हय् खास यानाः रौतहट जिल्लाय् आचार संहिता उल्लंघनया ज्या अप्वः जुयाच्वंगु खनेदु ।

अन तःधंगु राजनीतिक पार्टीतय्सं हे मस्तय्त समेत पार्टीया ध्वाँय् ज्वंकाः प्रचार ¥यालीइ क्वत हयाच्वंगु दु । नापं उम्मेदवार जुइपिंसं तपुलि, लं आदि नं चुनाव चिं छापे याये मजिउ धाःसां चुनाव चिं दुगु टीशर्ट फिनाः चाःहिलेगु ज्या नं व्यापक रुपं जुयाच्वंगु दु । थन दकलय् तःधंगु समस्या ला पार्टीतय्सं थना तःपिं डमी उम्मेदवारतय्सं पिकयाच्वंगु दु । थःपिंपाखें हे स्वतन्त्र उम्मेदवारी बीमाः वयागु नामय् वइगु गाडी सुविधा तःधंगु दलतय्सं उपभोग यानाच्वंगु लूगु दु ।

गुलिखे मनूतय्सं थुकिया हे लबः कायेत नं थःगु नामं उम्मेदवारी दर्ता याकाः गाडी चले यायेगु सुविधा धाःसा तःधंगु दलतय्त ध्यबा कयाः ‘मीगु’ यानाच्वंगु नं लूगु दु ।अले उमिसं चले याइगु गाडी धाःसा भारतीय नम्बर प्लेटया जुयाच्वंगु दु । उम्मेदवारतय्सं भारतीय प्लेटया गाडी खुलेआम हे चले यानाः वयाच्वंगु नं खने दयाच्वंगु दु ।अथे हे माइक तयाः प्रचार याये मजिउ धाःसां नं उम्मेदवारतय्सं लाउड स्पिकर हे तयाः प्रचार यानाच्वंगु खँ नं स्थानीय मनूतय्सं धाःगु दु ।

शीर्ष नेतात नं सक्रिय जुइगु

२ नम्बर प्रदेशय् जुइगु थ्व चुनावय् आः तःधंगु दलया शीर्ष नेतातय्सं नं ब्वति कायेगु तयारी यानाच्वंगु खँ सीदुगु दु । चुनावया अन्तिम ईपाखे वयाः नेपाली कांग्रेस, एमाले व माओवादी केन्द्रया शीर्ष नेतातय्सं हे सम्बोधन यायेगु ज्याझ्वः दयेकातःगु दु । प्रधानमन्त्री शेरबहादुर देउवा समेत कंसंनिसें मधेसय् सक्रिय जुइगु ज्याझ्वः सार्वजनिक जूगु दु । वय्कः कंस मधेस वन कि मौन समय शुरु जुइधुंकाः जक येँय् लिहां वइगु खँ धाःगु दु ।

वय्कःया नापं महामन्त्री शशांक कोइराला, नेता रामचन्द्र पौडेल व विमलेन्द्र निधि नं थ्व अवधिइ अतिकं सक्रिय जुयादी । कांग्रेसं थ्व हे चुनाव मार्फत थःपिं १ नम्बर जुइगु आशा यानातःगु दु । चुनाव प्रचारय् आः तक एमाले कमजोर हे खने दनि । एमाले नेतात मध्ये आः तक माधव नेपाल याकःचा जक मधेसय् सक्रिय जुयादीगु दुसा छन्हु निन्हु लिपा मेपिं नेतात नं सक्रिय जुयाः कुहां वइगु खँ एमाले सूत्रं धाःगु दु ।

Rate this item
(0 votes)
Login to post comments
Go to top

Copyright © 2016  nepalbhasa.com. All rights reserved.