All for Joomla All for Webmasters

ने.सं. ११३६ यंलागा अष्टमी

पञ्चेश्वरया खँ मिले मजुल, शारदा बाँधं कयाच्वंगु लखय् भारतया अग्राधिकार दावी

चर्चित पञ्चेश्वर परियोजनाया डीपीआर तयार यायेगु लागिं भारतया न्हू दिल्लीइ जुयाच्वंगु नेपाः–भारत प्राविधिक पुचःया बैठक निष्कर्षय् थ्यनेत समस्या पिहां वःगु दु । पञ्चेश्वरय् बाँध दयेकेवं अन मुनीगु लखय् नेपाः व भारतया बछि बछि हे हक लगे जुइगु सैद्धान्तिक सहमति जूगु खः ।

तर थौं जूगु प्राविधिक पुचःया बैठकय् भारतीय अधिकारीतय्सं महाकाली खुसिइ भारतं न्हापा हे दयेका तयेधुंकूगु शारदा बाँधय् गुलि लः प्राप्त जुयाच्वंगु खः, उकियात आः गणना याये दइ मखु, उगु लः कायम हे यानाः ल्यं दुगु लः जक बछि बछि इनेगु जुइ धकाः प्रस्ताव तःगु खँ सीदुगु दु ।

भारतपाखें अज्याःगु प्रस्ताव वयेवं नेपाः पक्षं उकियात अस्वीकार याःगु खः ।
भारतं न्हापा राणाकालय् हे महाकाली खुसिइ शारदा बाँध दयेकाः यकःति रुपं लः यंकेगु ज्या यानाच्वंगु खः । लिपा शारदा बाँधया आयु फुइगु ई त्ययेवं उकिया हे विकल्प कथं हानं टनकपुर बाँध दयेकूगु खः । टनकपुर बाँध नेपाःया राजनीतिइ नं अतिकं चर्चित मुद्दा खः ।

पञ्चेश्वर परियोजनाया कुल क्षमता ५ हजार मेगावाट स्वयां अप्वः दुगु खःसां आःयात थुकिं ९२५ मेगावाट जक निं उत्पादन यायेगु व उकी नेपाःयात ४६२ मेगावाट मत प्राप्त जुइगु सहमति जुयाच्वंगु दु । थुकी नेपाःया लगानी स्वब्वय् छब्व व भारतया लगानी स्वब्वय् निब्व जुइ । खुसिं वइगु लः नेपालं फुक्कं छ्यले मफइगु जूगुलिं अप्वः वःगु लःया बारे छु यायेगु धइगु खँय् नं छुं निर्णय जुइ मफयाच्वंगु खँ धाःगु दु । नेपाःपाखे पूवंक सिँचाई मदुनि ।

उम्मेदवारया छेँय् बम


थ्वहे वइगु असोज २ गते जुइगु स्थानीय तहया चुनावय् धनुषा जिल्लाया धनुषाधाम नगरपालिकाया प्रमुख पदया उम्मेदवार जुयादीम्ह प्रक्षा शाह मल्लया छेँय् बम मुइकूगु दु । म्हिगः चान्हय् वय्कःया छेँया कम्पाउण्ड दुने हे वनाः अज्ञात मनूतय् छगू पुचलं बम मुइका थकूगु खः । उगु घटना लिपा धनुषाधामया सुरक्षा अवस्था अझ कडा याःगु दु । धनुषाधाम नगरपालिकाय् राष्ट्रिय प्रजातन्त्र पार्टीपाखें मेयर पदय् उम्मेदवार जुयादीम्ह मल्लया छेँय् बम मुइकूगु खँ प्रहरी नायब उपरीक्षक प्रवीण धितालं कनादिल ।

विस्फोट छेँया कम्पाउण्ड दुने हे जूगुलिं उकिं छुं मानवीय व भौतिक क्षति धाःसा मजूगु खँ नं प्रहरीं धाःगु दु । घटना लिपा म्हिगः हे प्रहरीया पुचः छेँय् वनाः आवश्यक अनुसन्धान यासें उकी ल्हाः दुपिं मनूतय्त मालेगु ज्या शुरु याःगु दु । स्थानीय चुनावयात विप्लव माओवादीं विरोध यानाच्वंगु कारणं थ्व बम विष्फोट याःगु अनुमान याःगु दु ।

Rate this item
(0 votes)
Login to post comments
Go to top

Copyright © 2016  nepalbhasa.com. All rights reserved.