All for Joomla All for Webmasters

ने.सं. ११३६ यंलागा अष्टमी

आः १०० न्हु लिपाया येँ महानगर

येँ महानगरपालिकाया मेयर पदय् विद्यासुन्दर शाक्यं पदभार वहन याःगु १०० न्हु क्यंगु लसताय् थौं छगू पत्रकार सम्मेलन यायेत्यंगु दु । थौं सनिलया ३ बजे राष्ट्रिय सभागृहय् थ्व पत्रकार सम्मेलन यायेत्यंगु खः । मेयर शाक्यं थःगु सछिन्हुया कार्यकालय् बिचाः याना कथंया ज्या याये मफुसां निराश थ्यंक जुइमाःगु अवस्था मदुगु बिचाः प्वंकादीगु दु ।

वय्कलं सछिन्हुया दुने सछिगू ज्या यायेगु धकाः चुनाव ताकाय् सार्वजनिक याःगु गुलिखे ज्याखँ आः तक पूमवनिगु खःसां थुपिं ज्याखँत आः कार्यान्वयनय् वनाच्वंगु खँ नं कनादीगु दु । मेखे वय्कःया सछिन्हुया कार्यकाल लिपा हे येँ मनपाया कांग्रेस पार्टीपाखें त्याना वःपिं वडाध्यक्ष व उपमेयरं अलग्ग रणनीति ज्वंगु संकेत पिहां वःगु दु । म्हिगः जूगु नगर कार्यपालिकाया बैठक नं उपमेयर लगायत कांग्रेसया वडाध्यक्षतय्सं बहिष्कार याःगु खः ।

कांग्रेस वडाध्यक्षतय्सं याःगु थ्व बहिष्कार ज्याझ्वः अतिकं रणनीतिक ढंगं वःगु अनुमान नेकपा (एमालें) याःगु दु ।एमाले येँ उपत्यका कमिटीया छम्ह नेतां कनादी कथं कांग्रेसं आः न्ह्यः वयाच्वंगु केन्द्र व प्रदेशया चुनावयात समेत ध्यानय् तयाः थज्याःगु रणनीति ज्वंगु खनेदु । एमालेपाखें निर्वाचित शाक्ययात असफल साबित यानाः उकिया लबः प्रदेशया चुनावय् कायेगु रणनीति कांग्रेसं ज्वंगु अनुमान उम्ह नेतां यानादीगु दु । कांग्रेसया थ्व पलाखं मनपाय् आः मेयरयात अझ थाकुगु अवस्था वयेफुगु अनुमान नं याःगु दु ।

Rate this item
(0 votes)
Login to post comments
Go to top

Copyright © 2016  nepalbhasa.com. All rights reserved.