All for Joomla All for Webmasters

ने.सं. ११३६ यंलागा अष्टमी

नां दर्ता जुइवं भ्वय् नकेगु शुरु

नां दर्ता जुइवं भ्वय् नकेगु शुरु किपा - रासस

२ नम्बरय् आचार संहिता उल्लंघनं आयोग गम्भीर

प्रदेश नम्बर २ लय् जुइगु स्थानीय तह चुनावय् म्हिगः नामांकन दर्ता शुरु जुइवं हे उम्मेदवारतय्सं पुचः पुचः मुंकाः भ्वय् नकेगु शुरु याःगु दु । उम्मेदवारतय्सं थज्याःगु आपालं ज्या यानाः आचारसंहिता उल्लंघन याःगुलिं निर्वाचन आयोग कायल जूगु दु । थीथी पार्टीया उम्मेदवारतय्सं म्हिगः नामांकन दर्ता याः वंगु इलय् हे जुलुसय् मस्तय्त समेत ध्वाँय् ज्वंकाः ब्वना यंकूगु खः ।

चुनावी ज्याझ्वलय् मस्तय्त प्रयोग याये दइ मखु धइगु निर्वाचन आचार संहिता दु । तर उम्मेदवारतय्सं मस्तय्त समेत जुलुसय् हःगुलिं आयोग सतर्क जूगु खः । लिसें म्हिगः नामांकन दर्ता याः वंपिं उम्मेदवारतय्सं गाडी नं व्यापक रुपं प्रयोग याःगु खः । थ्व खँय् नं निर्वाचन आयोग हैरान जूगु दु ।
थ्व विषययात कयाः निर्वाचन आयोगं आः कडा पलाः ल्ह्वनेगु निर्णय याःगु खँ सीदुगु दु ।

यदि आः हे थुकियात पने मफुत धाःसा चुनाव न्ह्यःने थ्यंकाः झन् हे दुरुपयोग यायेफु धासें उकियात पनेगु लागिं निर्वाचन अधिकृततय्त नं खटे यायेधुंकूगु दु । थ्व मामिलाय् कडा पलाः छीगु धासें निर्वाचन आयोगं यदि आचार संहिता उल्लंघन यानां तुं च्वन धाःसा उम्मेदवारी खारेज यायेगु तकया पलाः छी मालीगु ख्याच्वः नं बिउगु दु ।


निर्वाचन आयोगं थुकिया लागिं निर्वाचन अधिकृतत खटे यायेधुंकूगु दुसा गुलिं जिल्लाय् शुक्ष्म अध्ययन याइपिं अधिकारीत नं खटे यायेधुंकूगु दु । थ्व चुनाव २ नम्बर प्रदेशया च्यागू जिल्लाय् जुइत्यंगु खःसा आयोगं नं च्यागुलिं जिल्लाय् अधिकारीत खटे यायेधुंकूगु दु ।

चान्हय् ११ बजे तक नां दर्ता

२ नम्बर प्रदेशय् म्हिगः जूगु नामांकन दर्ता अतिकं शान्तिपूर्वक सम्पन्न जूगु खँ धाःगु दु । नामांकन दर्ता म्हिगः जुइधुंकाः तक नं गुलिखे पार्टीतय्सं उम्मेदवारत हे तय याये मफुगु खः । थुकिं यानाः न्हिनय् नां दर्ता याइपिं खाली हे जूगु खःसां सनिलय् जूलिसे उम्मदेवार जुइपिं धमाधम निर्वाचन ज्याकुथी वंगु खः । थुकिं यानाः गुलिखे जिल्लाय् चान्हय् ११ बजे तक नं नां दर्ता यायेगु ज्या जुयाच्वंगु खः ।

म्हिगः दर्ता जूगु नांयात कयाः सुयां दावी विरोध याये माःगु दुसा थौं हे दावी विरोध याये दइगु ई बियातःगु दु । थौं वःगु दावी विरोध बारे आवश्यक कारवाही यानाः अन्तिम नांधलः पिकायेगु ज्या धाःसा शनिवाः जुइ ।
उम्मेदवारया लागिं थीथी दलतय्सं तालमेलया कुतः याःगु खःसां तालमेल धाःसा सुनां सुंलिसे हे याये मफुत । थन कांग्रेस व माओवादी तकं अलग अलग हे चुनावय् दनाच्वंगु दु ।

Rate this item
(0 votes)
Login to post comments
Go to top

Copyright © 2016  nepalbhasa.com. All rights reserved.