All for Joomla All for Webmasters

ने.सं. ११३६ यंलागा अष्टमी

२ नम्बर प्रदेशय् थौं उम्मेदवारी दर्ता

थ्वहे वइगु असोज २ गते स्वंगूगु चरणया चुनाव अन्तर्गत मतदान जुइगु २ नम्बर प्रदेशय् थौं उम्मेदवारतय् नां दर्ता यायेगु ज्या न्ह्यानाच्वंगु दु । २ गते थ्व प्रदेशया १३६ गू स्थानीय तहया चुनाव जुइगु खःसा थौं थ्व फुक्क हे तहया लागिं नामांकन दर्ताया ज्या जूगु खः । थ्व चुनावय् २ नम्बर प्रदेशया च्यागू जिल्लाय् मतदान जुइ । थ्व च्यागू जिल्लाया छगू महानगरपालिका, स्वंगू उपमहानगरपालिका, ७३ गू नगरपालिका व ५९ गू गाउँपालिका दुथ्याः ।

थ्व फुक्क तहपाखें यायेबलय् मुक्कं ६,६२७ म्ह जनप्रतिनिधि ल्ययेगु ज्या जुइ ।
नामांकन दर्ताया लागिं थौं सुथंनिसें हे थीथी पार्टीया उम्मेदवारत कार्यकर्ता सहित पुचः मुनाः निर्वाचन आयोगया ज्याकुथी वयाच्वंगु दु । मेखे निर्वाचनया लागिं टिकट बीगु ज्या शुरु जुइवं थीथी पार्टी दुने आन्तरिक ल्वापु नं शुरु जूगु दु ।

थुगुसी बल्ल बल्ल चुनावय् ब्वति काः वःगु पार्टी राजपाय् समेत तःधंक विवाद जुयाः चुनावया न्ह्यःने थ्यंकाः गुलिखे स्थानीय नेतातय्सं पार्टी त्वःता वंगु दु । महोत्तरीइ राजपाया जिल्लास्तरीय अध्यक्ष मण्डलया दुजः नरेन्द्र यादवयात टिकट मबीवं यादवं पार्टी परित्याग यानाः माओवादीइ दुहां वंगु दुसा माओवादीं वय्कःया दुहां वयेवं हे औरही नगरपालिकाया मेयरया टिकट बिउगु दु ।

अथेहे गुलिं संघीय समाजवादी फोरमय् दुहां वंगु दुसा गुलिं कांग्रेसय् नं वंगु दु । सिरहाय् कांग्रेसया पार्टी कार्यालयय् टिकटया खँय् ल्वापु जुयाः कार्यकर्ता दथुइ मुक्कामुक्की हे जूगु दुसा थुकिया भिडियो सामाजिक सञ्जालय् नं भाइरल जुयाच्वंगु दनि । ल्वापु पनेगु लागिं पार्टी ज्याकुथी प्रहरीहे दुहां वनाः फुकसित पितिना हये माःगु खः ।

Rate this item
(0 votes)
Login to post comments
Go to top

Copyright © 2016  nepalbhasa.com. All rights reserved.