All for Joomla All for Webmasters

ने.सं. ११३६ यंलागा अष्टमी

सतक पीडितयात लाठीचार्ज छम्हेसिया ल्हाः त्वःधुल, मेपिं सामान्य घाःपाः

सतक विस्तारया नामय् जनताया छेँ थुनेगु सरकारी ज्याया विरोधय् धर्ना च्वनाच्वंपिं सतक पीडितय्त प्रहरीं हस्तक्षेप यानाः लाठीचार्ज याःगु दु । उकी लानाः खुम्ह प्रदर्शनकारीत घाःपाः जूगु दु । सतक विस्तारया नामय् जनताया छेँ थुने दइ मखु धकाः सर्वोच्च अदालतय् लानाच्वंगु रिटय् थौं अन्तिम फैसला जुइ धाःगुलिं थीथी थासं वयाच्वंपिं पीडिततय्सं थौं माइतीघर मण्डला लागाय् प्रदर्शन याःगु खः ।

प्रदर्शनकारीतय्सं छगू जुलुस पिकयाः प्रदर्शन यायां न्हूगु वानेश्वरपाखे वंबलय् अन प्रहरीं लाठीचार्ज यानाः जुलुसयात तितरबितर याना बिउगु खः । उकी लानाः विद्या श्रेष्ठया ल्हाः त्वःधूगु दुसा विमल श्रेष्ठ लगायत मेपिं खुम्ह प्रदर्शनकारीत घाःपाः जूगु दु । ल्हातय् घाः लाःम्ह विद्या श्रेष्ठयात वानेश्वरया हे एभरेष्ट अस्पतालय् वासः याके यंकूगु दु ।प्रहरी हस्तक्षेपं तितरबितर जूगु जुलुस लिपा हानं मण्डलाय् तुं मुनाः ज्याझ्वः समापन यायेगु तयारी जूगु दु ।

सडत विस्तार पीडित संघं थौं तकया थःपिनि ज्याझ्वः तयारी याना तःगु खः । आः प्रहरी हस्तक्षेप तच्वया वःगुलिं थ्व स्वयां कडा कथंया आन्दोलन याये मालीगु बिचाः पीडित संघया नायः सुमन साय्मिं प्वंकादिल । थप कार्यक्रम बारे थःपिनि दथुइ सहलह जुयाच्वंगु खँ नं वय्कलं कनादिल । सडक विस्तार पीडिततय्सं तयातःगु रिटय् थौं सर्वोच्च अदालतं अन्तिम फैसला बीगु खँ धाःगुलिं थःपिनि सः तयेगु लागिं धकाः थौं थीथी लागाया पीडितत ब्यानर ज्वनाः माइतिघर मण्डलाय् मुं वःगु खः ।

फैसला थौं नं मवल

सतक विस्तार पीडिततय्सं तयातःगु रिटय् सर्वोच्च अदालतं थौं नं फैसला मन्यंकल । माइतीघर मण्डलाय् सर्वोच्चया अन्तिम फैसला न्यनेगु लागिं सलंसः मनूत मुनाच्वंगु खःसां उखे सर्वोच्चय् धाःसा न्यायाधीशतय्सं थौं नं थुकिया फैसला न्यंकेगु ज्या मयात । थुकिया फैसला थौं न्यंकेगु धकाः तयातःगु ज्याझ्वः हे अन्तिमय् वयाः स्थगित याःगु खँ धाःगु दु ।

आः थुकिया फैसला गबले न्यंकीगु खः धइगु खँ धाःसा सी मदुनि । सतक पीडितत सकलें माइतीघर मण्डलाय् लानाच्वंगुलिं फैसला न्यंकीगु मेगु मिति काः मवनंनिगु खँ धाःगु दु । थौं फैसला न्यंकेगु ज्याझ्वः स्थगित याःगुया कारण धाःसा सीमदुनि । पीडितया पक्षय् फैसला न्यंकेगु खः वा विपक्षय् न्यंकेगु धइगु सवालय् न्यायाधीशपिनि दथुइ हे मतभेद जुयाः फैसला मवयाच्वंगु खँ पिने न्यनेदु ।

Rate this item
(0 votes)
Login to post comments
Go to top

Copyright © 2016  nepalbhasa.com. All rights reserved.