All for Joomla All for Webmasters

ने.सं. ११३६ यंलागा अष्टमी

शताब्दीपुरुष सत्यमोहन जोशीयात तःजिक हनीगु

वाङ्मय शताब्दीपुरुष डा. सत्यमोहन जोशीयात थ्वहे वइगु ने.सं. ११३७ यँलागा दसमि (भदौ ३० गते) शुक्रवाः तःजिक हनीगु जूगु दु ।नेवाः जागरण मञ्चया संयोजनय् भाजु लक्ष्मीदास मानन्धर संयोजक जुयाः नीस्वंगु ‘वाङ्मय शताब्दी पुरुष सत्यमोहन जोशी हना’ समितिं थुगु ज्याझ्वः तःजिक न्यायेकेगु निंतिं थीथी उपसमितित नीस्वंगु दुसा उगु उपसमितितय् मुँज्यात नं न्हिंन्हिं न्ह्यानाच्वंगु दु ।

समितिं ब्यूगु जानकारी कथं भाजु जोशीयात तःजिक हनेगु नितिं येँया बसन्तपुरं न्हिनसिया १ ताः इलय् वय्कःया नेपाली सेनाया बग्गी व ब्याण्ड सहितया ¥यालीं नगर परिक्रमा लिपा राष्ट्रिय सभागृहय् हना ज्याझ्वः याइगु ग्वसाः दु । येँ महानगरपालिकाया ग्वाहालिइ जुइत्यंगु उगु हना ज्याझ्वलय् सांस्कृतिक बाजंया लिसें थीथी सांस्कृतिक झाँकीतय् ब्वज्या नं जुइसा धिमे, बाँसुरी, धाः बाजं लिसें थीथी सांस्कृतिक ज्याझ्वः व धार्मिक विधि कथं सम्मान यायेगु ज्या जुइ ।

ज्याझ्वलय् जनकवि दुर्गालाल श्रेष्ठं वाङ्मय शताब्दीपुरुष सत्यमोहन जोशीयात कयाः चिनादीगु कविता वाचन यानादी । ज्याझ्वलय् सत्यमोहन जोशीया जीवनी व वय्कलं आःतक यानादीगु योगदानया झलक लिसें वय्कलं च्वयादीगु सफूया ब्वज्या नं जुइ । हना ज्याझ्वः तःजिक यायेत नीस्वंगु आर्थिक समिति, मिसा परिचालन समिति, हल व्यवस्थापन समिति, संघसंस्था प्रतिनिधिनाप सहलह मुँज्या जुइधुंकूगु दुसा मेगु थीथी उपसमितिया मुँज्यात नं च्वनेत्यंगु दु ।

अथेहे, थीथी संस्थापाखें हना ज्याझ्वलय् हना देछायेगु विषयय् सार्वजनिक सुचं नं बिइत्यंगु दु । वाङ्मय शताब्दी पुरुष सत्यमोहन जोशी थौंकन्हय् ९८ दँय् च्वनादीगु दु । वय्कलं नेपाःया लोकसंस्कृतिया सामाजिक व दार्शनिक महत्वयात जनमानसय् लिसें कर्णाली लागाया अज्ञात संस्कृतियात सार्वजनिक यायेगु थेंज्याःगु तःजिगु ज्या यानादीगु दु ।

अथेहे, वय्कलं चीनय् नांजाःम्ह जूसां नेपालं ल्वःमंके धुंकूम्ह राष्ट्रिय विभूति अरनिको व वय्कःया अमर कृति स्वेतचैत्ययात नेपालय् पुनःपरिचित याकेगु ज्या नं यानादीगु खः । भाजु जोशीं नाटक प्रबद्र्धनया नितिं राष्ट्रिय नाटक महोत्सव थेंजाःगु ज्या न्ह्याकादिलसा राष्ट्रिय नाचघर, नेपालभाषा एकेदेमि थेंज्याःगु संस्था पलिस्था यायेगु ज्या नं यानादीगु खः ।

वय्कलं नेपालभाषा, नेपाली व अंग्रेजी नापं यानाः ६० गू सिबें अप्वः सफू च्वयादीधुंकूगु दु । सम्मान कथं वय्कः प्रतिष्ठित मदन पुरस्कारपाखें स्वक्वः तक विभूषित जुयादीम्ह छम्हयां छम्ह जक श्रष्टा खःसा वय्कःयात काठमाडौं विश्वविद्यालयं मानार्थ महाविद्यावारिधी लःल्हाःगु दु ।

Rate this item
(0 votes)
Login to post comments
Go to top

Copyright © 2016  nepalbhasa.com. All rights reserved.