All for Joomla All for Webmasters

ने.सं. ११३६ यंलागा अष्टमी

खुसिबालं तराई अस्तव्यस्त

जीप डुबे जुयाः प्वाथय् दुम्ह सहित खुम्ह सित

वंगु छुं न्हि न्ह्यवंनिसें लगातार वयाच्वंगु वां पूर्वी तराई लागाया बछि भूभाग लखय् डुबे जूगु दु । अनया सतक, बजाः, पसः, छेँ, बुँ व विराटनगरया विमानस्थल समेत लख्य् डुबे जुयाच्वंगु दु । थौं सुथय् वा वयेगु कम जूसां विमानस्थलया लः कम मजूगुलिं विमानया उडान सम्भव जुयाच्वंगु मदुनि ।

पूर्वी तराईया झापा, मोरङ, सप्तरी व सुनसरी खुसिबालं प्रभावित जुयाच्वंगु दु । थ्व प्यंगू जिल्लाय् जक आः तक १७ म्ह मनूया ज्यान वनेधुंकूगु दुसा मेपिं १५ म्ह बेपत्ता जुयाच्वंगु दनि । थन थाय्थासय् मत व टेलिफानया थां लखय् डुबे जुयाः फोन सेवा नं ठप्प जूगु दुसा विद्यतु नं बन्द जूगु दु ।

कोशी ब्यारेजय् लः अप्वयाः ह्याउँगु ध्वाँय् ब्वयेकूसां ब्यारेजया थप लुखा धाःसा चायेकूगु मदुनि । थ्वहे झ्वलय् थौं सुथय् रौतहटया परोरा गाउँपालिकानिसें प्वाथय् दुम्ह मिसा तया हःगु छगः गाडी सतकय् हे लखय् डुबे जुयाः प्वाथय् दुम्ह मिसा लगायत मेपिं खुम्ह मनू सीगु दु ।

२७ दँया शर्मिला यादवयात मचा बुइकेत अस्पताल यंकाच्वंगु इलय् गाडी लखय् डुबे जुयाः शर्मिला लिसें वया भाःत चन्दन किशोर यादव, स्वदँ दुम्ह म्ह्याय्, माजु, काकी व किजाभत सीगु खः । उमिगु गाडी राजपुर–३ स्थित लँय् डुबे जूगु खः । म्हिगःनिसें थौं समेत यायेबलय् खुसिबालं सीपिं मनूतय् ल्याः ४० स्वयां अप्वः थ्यनेधुंकूगु खँ धाःगु दु ।

थौं वीरगंजया बजार लागाय् नं लः दुहां वयेगु शुरु जूगु दुसा उखे पश्चिमय् कैलालीया जोशीपुर, टीकापुर, भजनी आदि थेंज्याःगु लागाय् लः दुहां वःगुलिं मनूत छेँया कःसिइ च्वं वनाच्वंगु दु । टीकापुर इलाका प्रहरी चौकी लखय् डुबे जुइवं अन च्वंपिं प्रहरीत डुंगाय् च्वनाः बिसिउँ वःगु दु । पूर्वंनिसें पश्चिमन्यंकं हे वस्ती दुथाय् लः दुहां वंगुलिं अनया जनजीवन अस्तव्यस्त जूगु दु ।

अझ हे वा वइ तिनि

स्वन्हु न्ह्यवंनिसें निरन्तर वयाच्वंगु वा अझ मेगु निन्हु नं जारी जुइगु खँ मौसम तथा जलवायु विज्ञान महाशाखां धाःगु दु । महाशाखाया मौसमविद् राजु प्रधानांगं कनादी कथं थौं व कन्हय् अझ अप्वः वा वइगु सम्भावना दु । थौं सुथय् तराई लागाय् भचा वा दिउगु थें च्वंगु खःसां न्हिनय् हां वयेधुंकूगु दु ।

थुकिं यानाः गण्डकी, राप्ती, बागमती, कोशी थेंज्याःगु ततःधंगु खुसिइ बाः वयाच्वंगु दु । वा वइगु सम्भावना अझ हे दनिगु जूगुलिं सरकारं उकथं हे सतर्क जुइत तयारी नं याःगु दु । थुकिया लागिं खुसिबालं पीडित लागाया मनूतय्त अझ हे सुरक्षित थासय् च्वं वनेत सरकारं आह्वान यानाच्वंगु दु ।

Rate this item
(0 votes)
Login to post comments
Go to top

Copyright © 2016  nepalbhasa.com. All rights reserved.