All for Joomla All for Webmasters

ने.सं. ११३६ यंलागा अष्टमी

थनिंनिसें सरकारी अस्पताल ठप्प

१९ न्हु न्ह्यवंनिसें अनसन च्वनादीम्ह डा. गोविन्द केसीया माग पूवंकेत दबाब बीगु लागिं थनिंनिसें देय्न्यंकंया सरकारी अस्पतालया डाक्टरतय्सं इमर्जेन्सी छगू बाहेक मेगु फुक्क हे सेवा ठप्प याना बिउगु दु ।डाक्टरतय् थ्व हडतालं यानाः देय्न्यंकंया सरकारी अस्पतालय् परीक्षण याकः वःपिं विरामीत अलपत्रय् लाःगु दु ।

अथे खःसां विरामीतय्त समस्या मजुइमा धकाः अस्पतालय् कार्यरत डाक्टरतय्सं अस्पतालया पिने हे च्वनाः विरामी जाँचे यायेगु व्यवस्था यायेगु खँ धाःगु दु । तर विरामी जाँचे याःसां वासः च्वयेगु ज्या धाःसा अस्पतालया प्याडय् मयासे खालीगु भ्वँतय् च्वयेगु ज्या जुइ धाःगु दु । लिसें विरोध स्वरुप सकलें डाक्टरतय्सं ल्हातय् हाकुगु पट्टि चिनाः ज्या यायेगु निर्णय नं जूगु दु ।

उखे अनसनरत डा. केसीया पुचःलिसे सरकारं यानाच्वंगु वार्ता अझ नं सफल जुइगु सम्भावना खने मदया वनाच्वंगु दु । खास यानाः सदनय् मस्यौदाया लागिं वनाच्वंगु चिकित्सा शिक्षा सम्बन्धी विधेयकय् आः यायेत्यंगु संशोधनयात डा. केसीं विरोध यानादीगुलिं वार्ता न्ह्याये मफयाच्वंगु खः ।

सरकारलिसे सम्बन्धन प्राप्त यानाः पूर्वाधारया ज्या समेत न्ह्याकेधुंकूगु न्यागू मेडिकल कलेजतय्त समेत सञ्चालनया अनुमति बी मजिउ धइगु डा. केसीया माग खःसा सदनय् थ्व न्यागूयात छुट बियाः थ्वयां लिपा वयेत्यंगु मेमेगु कलेजतय्त जक रोके यायेगु कथं विधेयक संशोधन जुयाच्वंगु दु । यदि उकथं विधेयक तयार यानाः पारित यात धाःसा उकियात स्वीकार याये फइगु मखु धकाः डा. केसीं ख्याच्वः बियादीधुंकूगु दु । मेखे डा. केसीया स्वास्थ्यस्थिति धमाधम स्यना वनाच्वंगु खँ नं धाःगु दु ।

Rate this item
(0 votes)
Login to post comments
Go to top

Copyright © 2016  nepalbhasa.com. All rights reserved.