All for Joomla All for Webmasters

ने.सं. ११३६ यंलागा अष्टमी

एकता मजुइवं नयाँ शक्तिइ असन्तुष्टि

संघीय समाजवादी फोरमलिसे जुइत्यंगु एकता दथुइ हे भंग जुइवं उगु एकताया लागिं कुतः यानाच्वंपिं नयाँ शक्ति पार्टीया नेतात तम्वःगु दु । उमिसं पार्टीया अध्यक्ष डा. बाबुराम भट्टराईया कार्यशैलीया आलोचना यासें सार्वजनिक रुपं हे बिचाः बीगु समेत शुरु याना हःगु दु । संघीय समाजवादी फोरमलिसे एकता यायेगु लागिं नयाँ शक्तिया वरिष्ठ नेता देवेन्द्र पौडेलया नेतृत्वय् वंगु छुं न्हि न्ह्यवंनिसें वार्ता जुयाच्वंगु खः ।

एकताया लागिं अन्तिम तयारी जुइधुंकाः अध्यक्ष डा. भट्टराईं आकाझाकां एकताया ज्या स्थगित याना बीवं एकता वार्ताय् सहभागी जूपिं नेतात तम्वःगु खः ।संसफोलिसे एकता यायेगु लागिं देवेन्द्र पौडेलया नेतृत्वय् रामचन्द्र झा, महेन्द्र पासवान, खिमलाल देवकोटा, परशुराम खापुङ आदिपिंसं वार्ता यानाच्वंगु खः । तर थ्व एकता प्रति असहमति क्यँसें देवी ओझा, केशव दाहाल, परशुराम तामाङपिंसं धाःसा विरोध याना वयाच्वंगु खः ।

विरोध तच्वः जुइवं अध्यक्ष भट्टराईनं आःयात एकताया ज्या स्थगित यायेगु धकाः निर्देशन बियादीगु खः । थुकिं यानाः एकता वार्ताय् सहभागी नेतात आक्रोशित जूगु खः । म्हिगः उमिसं छगू पत्रकार सम्मेलन हे यानाः अध्यक्ष भट्टराईया कार्यशैलीया आलोचना यानादिल । थुकिया नापं नेता झां म्हिगः हे माओवादी अध्यक्ष पुष्पकमल दाहाल नापलानाः गोप्य वार्ता यानादीगुलिं थ्व पुचः हानं माओवादीइ हे लिहां वनीगु खः लाकि धइगु आशंका नं पिहां वःगु दु ।

 

Rate this item
(0 votes)
Login to post comments
Go to top

Copyright © 2016  nepalbhasa.com. All rights reserved.