All for Joomla All for Webmasters

ने.सं. ११३६ यंलागा अष्टमी

संविधान संशोधन टेबुल याइगु

पास–फेल न्ह्यागु जूसां राजपां चुनावय् ब्वति काइगु

संविधान संशोधनया विधेयक सदनय् पेश यात धाःसा थ्व पास जूसां फेल जूसां उकियात स्वीकार यायेगु खँ राष्ट्रिय जनता पार्टी (राजपां) धाःगु दु । राजपापाखें थज्याःगु प्रस्ताव वःगु जुयाः आः सरकारं आइतवाःनिसें हे संशोधन प्रस्तावयात सदनय् पेश यायेगु प्रक्रिया शुरु याइगु जूगु दु । थौं वालुवाटारय् निगू सत्तारुढ दल नेपाली कांग्रेस व माओवादी केन्द्रलिसे जूगु राजपाया बैठकं थ्व सहमति कायम याःगु खः ।

आः सरकारं विधेयकयात सदनय् पेश यायेगु प्रक्रिया शुरु याना वन धाःसा सम्भवतः मेगु मंगलवाः उकी मतदान जुइगु सम्भावना दु । मतदानय् विधेयक सफल वा असफल न्ह्यागु जूसां राजपां उकियात स्वीकार यायेगु खँ धाःगु दु । मतदानया लिच्वः न्ह्यागु हे वःसां आः स्वंगूगु चरण कथं क्षेत्र नं. २ लय् जुइगु स्थानीय तहया चुनावय् राजपां ब्वति कायेगु सहमति नं जूगु दु ।

म्हिगः तिनि २ नम्बर क्षेत्रय् स्थानीय तहया संख्या बढे याःसां जिउ धइगु फैसला सर्वोच्च अदालतपाखें जूगु खः । उकियात राजपां लसकुस याःगु दु । थ्व फैसलापाखें नं राजपायात चुनावय् वयेत उत्साहित याःगु खनेदु । राजपाया नेतातय्सं संशोधन प्रस्ताव सदनय् पेश जुल धाःसा पारित जुइगु आशा प्वंकूगु दु । यदि पारित मजुल धाःसा सुनां सुनां यानाः पारित मजूगु खः उमित हे विरोध यानाः चुनावय् वनेगु जुइ धाःगु दु ।

येँय् जूगु बिमस्टेकया बैठकय् ब्वति कायेत नेपाः वःम्ह भारतीय विदेश मन्त्री सुषमा स्वराजलिसे राजपाया नेतातय्सं वार्ता यायेधुंकाः थुगु सहमति जूगुलिं धाःसा थुकिया लिउने स्वराजया नं भूमिका दु लाकि धकाः अनुमान याना हःगु दु । संविधान संशोधनया थ्व मुद्दायात प्रधानमन्त्री शेरबहादुर देउवां भारत भ्रमण यानादी न्ह्यः हे सम्पन्न यायेगु सहमति नं राजपालिसे जूगु खँ सूत्रं धाःगु दु ।

दुई तिहाई दु ला ?

यदि आःया हे अवस्थाय् संविधान संशोधन विधेयक सदनय् प्रस्तुत जुल धाःसा पारित जुइ लाकि जुइ मखु धइगु खँय् नं चर्चा शुरु जूगु दु । संसदया आः विद्यमान समीकरण कथं संशोधनया पक्षय् माःगु दुई तिहाई मत मखाःगु जुयाः पारित जुइगु सम्भावना तसकं कम जक दु ।

राप्रपा विभाजन जुइधुंकाः कमल थापा पक्षं मत बी लाकि बी मखु धइगु अनिश्चित जूवंगु दु । प्रमुख प्रतिपक्षी एमालें मत बी मखु धकाः न्हापांनिसें हे धयाच्वंगु दु । एमाले बाहेक मेगु फुक्क हे पार्टीत छथाय् च्वं वंसा जक संशोधन पारित जुइगु सम्भावना दु । आःयात थ्व सम्भावना मदुसां राजपाया नेतातय्सं धाःसा संशोधन पारित जुइगु दावी यानाच्वंगु दु ।

Rate this item
(0 votes)
Login to post comments
Go to top

Copyright © 2016  nepalbhasa.com. All rights reserved.