All for Joomla All for Webmasters

ने.सं. ११३६ यंलागा अष्टमी

बल्छि व येँ महानगरपालिकाया मेयर

येँ महानगरपालिकाया निर्वाचित मेयर विद्या सुन्दर शाक्य हाकनं छकः सामाजिक संजालय् नकारात्मक चर्चाया कारणं बय्बय् जुयाच्वंगु दु । अत्यधिक बहुमतं मेयर पदय् निर्वाचित जूम्ह मेयरया कार्यकाल सच्छिन्हु हे मथ्यनीगु इलय् हे थुकथं चरित्र, नियत व ब्यवहारयात कयाः जुयाच्वंगु चर्चायात स्वस्थ चर्चा धाये फइगु स्थिति मदु । थ्व गम्भीरतापाखे सकसियां ध्यान वनेमाःगु खनेदु ।

विद्यासुन्दर शाक्यं पदभार बहाली यायेधुनेवं हे सु शुभचिन्तक पासापिंसं येँ महानगरपालिका दुनेया कर्मचारीतन्त्रपाखें होशियार जुइमाःगु व निश्चित मनूतय्त पदभारं मुक्त यायेमाःगु सः सामाजिक संजालय् खनेदुगु खः । तर विडम्बना धायेमाः किटान जूपिं कर्मचारीत हे लिपा अन हे पदोन्नती जूगु समाचार पिदंगु खः । येँ महानगरपालिकाया न्हापांगु बोर्ड बैठक आम मतदातातय्सं अति उत्सुकताकथं स्वयाच्वंगु खः ।

येँ महानगरपालिकाया मेयर पदय् निर्वाचित जुल धाःसा थ्व थ्व ज्या याये धकाः १०० गुलिं मल्याक प्रतिवद्धता न्ह्यब्वःम्ह मेयरं दकले न्हापां थःपिनिगु हे सुविधा अप्वयेकेकथं मेयर उपमेयर लगायत वडाध्यक्षपिंत अत्याधुनिक मोबाइल फोन न्यायेगु निर्णय जुइवं तसकं हे आलोचित जुइमाल । थ्व मुद्दा झन्डै विस्फोट जुइत्यंगु इलय् मेयर भाजुं थुगु निर्णय लित कयागु सार्वजनिक प्रतिवद्धता प्वंकेगु ज्या जुल, तर लिपा हाकनं उगु हे निर्णय कार्यान्वयन जूगु प्रमाण सार्वजनिक संजालय् खनेदत ।

ज्या याइपिंत अत्याधुनिक सेवा सुविधा उपलब्ध याकाः उमिगु ज्या चुस्त दुरुस्त यायेगु दायित्व महानगरया नेतृत्व कयाच्वंम्ह मनुखं यायेगु सामान्य खँ खः । अय्नं थ्व खँयात माःगु स्वयां अप्वः चर्चाय् हयेगु ज्या जूगु अनुमान यायेफइ । अले थुकियात सामान्यकरण यायेगु स्वयां म्वाः मदुगु स्पष्टीकरणं झन हे रहस्यमय याना बिउगु खनेदु ।

सामान्यतया छगू माग फाराम भरे यानाः नं उपलब्ध जुइगु सेवायात थुकथं छाय् सार्वजनीककरण यायेमाःगु खः? न्ह्यसःया चिं जुया बिउगु दु । छगू तप्काया संचारकर्मीत थुकथं छाय् न्ह्यब्वयाच्वंगु दु ? ध्यान वनेमाः।सामाजिक संजालय् हे स्थानीय निर्वाचनय् मेयर पदय् बहालिया छन्हु निन्हु लिपा हे विद्यासुन्दर शाक्ययात असफल यायेगु निंतिं कर्मचारीत हे सक्रिय धयागु बुखँ नं सार्वजनिक संचार माध्यमय् खनेदुगु खः ।

तर मेयर विद्यासुन्दर न्हापांनिसें हे येँ महानगरपालिकाय् भ्यले पुनाच्वने धुंकूगु कारणं थ्व सहज मजुइगु अनुमान नं जूगु खः । तर कर्मचारीतन्त्रया दुने गुलित सतर्क जुइमाः धयागु खँ स्वयम् मेयर विद्या सुन्दरयाया अनुभव मदुगु खइ मखु । छुं ई न्ह्यः मरुसतःया पुनर्निर्माणया खँय् नं मेयर विद्यासुन्दर आलोचित जूगु खनेदु ।

येँया आदिवासी नेवाः लगायतया समुदायं जनस्तरं मरुसतःया पुनर्निर्माणया खँ वयेवं छथ्वः मनूत ‘आः येँ महानगरपालिका दुने जनप्रतिनिधिया उपस्थिति दयेधुंकाः न्हापा कर्मचारीतय्सं यानातःगु सहमतियात माने यायेम्वाः’ धयागु मानसिकतां मरुसतः महानगरपालिकां हे दयेकेगु धकाः दावी यानाच्वंगु दु । येँ महानगरपालिकाया मेयर पदया प्रत्यासी विद्यासुन्दर शाक्य स्वयमं हे थःगु निर्वाचन प्रतिवद्धताय् थ्व मरुसतःया पुनर्निर्माण जनसहभागितां दयेकेगु धकाः स्पष्ट धयातःगु दु ।

तर आः वयाः थ्व येँ महानगरपालिकां हे थःगु हे खर्च दयेकेगु धकाः धया वयाच्वंगुया लिउने अन निश्चितरुपं कमचारीतन्त्रया प्रभाव दुगु अनुमान जुयाच्वंगु दु । मखुसा स्वयं समुदायं थःपिनिगु हे श्रोत, साधन व दक्षतां मरुसतःया पुनर्निर्माण याये धाःगु खँय् आम जनताया उत्साहयात उत्साहित यायेमाःगु थासय् थःपिनिगु हे नेतृत्वय् पुनर्निर्माण जुइमाः धयागुया छुं के तुक मदु ।

आः येँ महानगरपालिकाया मेयर विद्यासुन्दर शाक्य विवादितरुपं चर्चाय वयाच्वंगु धयागु थःगु प्रयोगया निंतिं गाडी खरीद प्रकरण खः । जनता विविधरुपं आक्रान्त जुयाच्वंगु इलय् १ करोडं मयाक लागतया मोटर न्यायेत्यन धयागु खँ खः । आः पिदनाच्वंगु समाचारकथं मेयरं थःगु सुविधा अप्वयेकेगु नामय् उलिमछि लागतया गाडी न्यायेत्यन धयागु खःसा थ्व प्रकरण विद्यासुन्दर मेयर जुइ न्ह्यः हे गाडी न्यायेगु निर्णय जुयाः माःगु प्रक्रिया पूवंकाः गाडी हयागु खः धयागु दावी येँ महानगरपालिकाया खः ।

तर आम मानसय् थ्व निणर्य मेयरं थःगु सुविधा वृद्धि याःगु खः धयागु दु । जनप्रतिनिधि जनताया मिखाय नानिचा जुयाच्वने फयेकेमाः, मिखाया धू जुयाः मखु । यदि थ्व गाडी खरिद प्रकरण वास्तवय् हे अनावश्यक खःसा अज्याःगु सुविधा अस्वीकार यायेगु मानसिकता नं दयेकेमाः । आः उपलब्ध जुयाच्वंगु सवारी साधन नं येँ महानगरपालिकायाःगु हे खःसा अन दुपिं म्हछिं कर्मचारीतय्त म्हति म्हति हे गाडी दयेमाः धयागु मदु ।

आः मेयरं कयाच्वंगु गाडीया सुविधा मेम्ह कर्मचारीं कयाच्वंगु सुविधायात छ्यलाच्वंगुलिं मेयरयात व स्वयां सुविधाजनक गाडी उपलब्ध याकेगु निर्णय सरकारया जुइफु । तर कथु स्वयाः जक क्वँय् घुर्केमाः धयागु मान्यताया लिधंसाय् बल्छि न्ह्यःने दत धायेवं नसा नये हे माः धयागु मान्यता ब्वलनाच्वन धाःसा अज्याःपिं न्या निश्चितरुपं जालय् लाइगु पक्का खः ।

छगू इलय् येँ महानगरपालिका अतिकं भ्रष्ट निकाय खः धयागु विश्लेषण स्वयम् सरकारयागु हे दु । उकिसनं आः वयाः महानगरपालिकाया खर्च ब्यवस्थापन धकाः अनेककथं कर अप्वयेकाः आम जनतायाके कर म्हयाच्वंगु सन्दर्भय् येँ महानगरपालिकाय वंपिं जनप्रतिनिधि व कर्मचारीतय्सं थःपिनिगु सुविधायात जक ध्यानय् तयाः ज्या जुयाच्वन धाःसा थ्व पक्का नं प्रत्युत्पादक ज्या जूवनी ।

येँ महानगरपालिकाया मेयरं थम्हं स्यंकागु मदु, द्वंकागु मदु, उकिं ग्यायेमाःगु मदु धकाः न्ह्याक्व हे धयाच्वंसां बल्छि दुने साःसाःगु नसा खनेदत धाःसा बल्छिइ तक्यने फइगु सम्भावना दया हे च्वनी । थुकिया उदाहरण आःया गाडी सुविधायात नं काये फइ । उकिं इलय् हे सचेत जुयाः आम मतदाताया चाहना पूवंकेगुपाखे थम्हं यानागु प्रतिवद्धताय् ध्यान वनेमाः ।

Rate this item
(0 votes)
Login to post comments
Go to top

Copyright © 2016  nepalbhasa.com. All rights reserved.