All for Joomla All for Webmasters

ने.सं. ११३६ यंलागा अष्टमी

खोनाया च्वलेचा जात्राय् सामान्य सुधार

खोना- दँय्दसं सापारुया सातिकुन्हु दँय्दसं खोनाया देय् पुखुली च्वलेचा क्वफानाः न्यायेकीगु जात्रा म्हिगः नं यथावत रुपं हे हन । तर थुगुसी धाःसा थ्व जात्राय् छुं भचा सुधार याःगु दु ।


छुं ई न्ह्यः थन पशु अधिकारवादीतय्सं छगू पत्रकार सम्मेलन हे यासें पुखुली क्वफाइम्ह च्वलेयात मस्यासें द्यःया नामय् त्वःताः ‘जिउदान’ बीत इनाप याःगु खःसा जात्राया न्ह्यः गुथियारतय्सं उकथं हे जात्रा हनेगु तयारी याःगु खः । तर लिपा वनाः जात्राया सहभागी व गुथियारतय् दथुइ धाःसा थ्व खँय् छगू मत जुइ मफुत । थथे जुल धाःसा भ्वय् न्यायेकेत हानं मेम्ह छम्ह दुगु वा च्वले स्याये मालीगु जूगुलिं पुखुली क्वफाइम्ह च्वलेयात हे स्यायेगु खँय् सहमति जूगु खः । थ्व ल्याखं थुगुसी नं पुखुली क्वफाःम्ह च्वलेयात हे स्यायेगु ज्या ला जुल, तर वयात न्हापा लिपा थें सातुमतु सालाः यातना बीगु ज्या धाःसा मजुल ।


थगुने नं पशु अधिकारवादीतय्सं रुद्रायणी देवी परिसरय् ब्यानर हे ज्वनाः जुलुस पिकासें जात्राया नामय् हिंस्रक ज्या याये मते धकाः इनाप याःगु खः ।

म्हिगः ५ बजे तुयूम्ह च्वले पुखुली क्वफायेवं हे मनूतय्सं वयात लखय् थुनाः बेपत्ता यानातःगु खः । घौछि तक उखें थुखें पुखू छगुलिं मायेकाः नं मलुइवं ६ बजेपाखे छक्वलं हे वयात लखं थत हःगु खः । तर अबले तक वयागु ज्यान धाःसा वनेधुंकल । न्हापा न्हापा च्वलेचित पुखुलिं थत यंकेगु व थत यंके मबीगु पक्षया दथुइ घम्साघम्सी जुयाः च्वलेचित सातुमतु सालीगु खः । तर थ्व जात्राया विषयय् ताःई न्ह्यवंनिसें हे विवाद जुयाच्वंगु कारणं थुगुसी पुखुली क्वःम्ह च्वलेचित सातुमतु सालाः सास्ती यायेगु ज्या धाःसा मजुल । थ्व जात्रा खोनाया अतिकं मौलिक जात्रा मध्ये छगू खः ।

Rate this item
(0 votes)
Login to post comments
Go to top

Copyright © 2016  nepalbhasa.com. All rights reserved.