All for Joomla All for Webmasters

ने.सं. ११३६ यंलागा अष्टमी

ओखरपौवाय् फोहोर वाके मबिल

फोहोर ज्वना वंगु मनपाया सछिगः गाडी लँय् अलपत्र

येँया फोहोर वायेगु थाय् याना तःगु ओखरपौवामाया डम्पिङ साइटय् स्थानीय जनतां थौं सुथंनिसें फोहोर वाकेगु बन्द याना बिउगु दु । स्थानीय जनताया अवरोधं यानाः थौं सुथय् फोहोर वायेत वंगु यँे मनपाया गाडीत अन हे तुं थानाच्वंगु दनि । वा वइगु थौंकन्हय्या वर्षा यामय् अन वाइगु फोहोरया बांलाःगु व्यवस्थापन यायेगु ज्या येँ महानगरपालिकां मयाः धइगु त्वहचिनाः थौं सुथंनिसें हे ओखरपौवाया स्थानीय जनतां फोहोर ज्वना वःगु मनपाया गाडीयात लँय् हे पना बिउगु खः ।

फाहोर ज्वना वःगु गाडी फुक्क लँय् हे पना बिउगुलिं करिब सछिगः धइथें गाडी थौं ओखरपौवाया सतकय् हे लाइन जुइक थानाच्वंगु दु । थुकिं यानाः अन ट्राफिक व्यवस्थापन यायेत समेत थाकुयाच्वंगु खँ ओखरपौवा प्रहरी चौकिया सहायक निरीक्षक रामप्रसाद कोइरालां कनादिल ।

अन फोहोर वायेधुनेवं हे उकिं पिहां वइगु दुर्गन्ध पनेगु लागिं चां ल्हाके माःगु व वासः ह्वलाः ल्वय्या संक्रमण नं पने माःगु सहमति न्हापा जूगु खःसां आः धाःसा महानगरपालिकां थ्व ज्या मयाः धइगु त्वहः चिनाः स्थानीय जनतां थ्व अवरोध पिकाःगु खः । स्थानीय जनतां थ्व निता ज्या यायेमाः धइगु खँयात थःपिनि मागया रुपय् न्ह्यःते तःगु दु ।

स्थानीय ककनी गाउँपालिका वडा २ या अध्यक्ष घननाथ बज्रगाईं थुगु लागाय् स्वदँया लागिं धकाः थाय् बियागु खःसां आः झिंस्वदँ दयेधुंकल धासें आः सदांया लागिं बन्द याकेत्यनागु दु धयादिल । थ्व विषयय् येँ मनपां स्थानीय जनतालिसे वार्ता शुरु याःगु दु ।
फोहोर पनेगु राजनीति !जिल्लागत रुपं नुवाकोटय् लाःगु ओखरपौवाया स्थानीय जनतां येँ महानगरपालिकाया फोहोर इलय् ब्यलय् पनाः न्हापा न्हापा नं समस्या पिकायेगु ज्या याना वयाच्वंगु दु ।

तर स्थानीय जनतां अज्याःगु ज्या याःगु धाःसां नं थुकिया लिउने धाःसा राजनीतिक अभिष्ट सुलाच्वंगु दयेमाः धकाः अनुमान याना हःगु दु । येँ महानगरपालिकाय् निर्वाचित पदाधिकारीत वयेवं हे स्थानीय जनतां फोहोर पनेगु ज्या याःगुलिं थुकी नं राजनीतिक दाउपेच सुलाच्वंगु दु लाकि धकाः आशंका याना हःगु दु ।

Rate this item
(0 votes)
Login to post comments
Go to top

Copyright © 2016  nepalbhasa.com. All rights reserved.