All for Joomla All for Webmasters

ने.सं. ११३६ यंलागा अष्टमी

तरकारीइ विषादी छ्यलीगु ३० गुणां अप्वल

नेपालय् उत्पादन जुइगु तरकारी सिसाबुसाय् विषादी छ्यलीगु तसकं अप्वया वःगु तथ्यांकं क्यंगु दु । थौंकन्हय् बजारय् वइगु तरकारीइ न्हापा स्वयां ३० गुणा तक अप्वः विषादी छ्यलेगु ज्या जुयाच्वंगु खँ पिहां वःगु दु । स्वास्थ्य बांलाकेगु निंतिं वाउँगु तरकारि व सिसाबुसा नयेमाः धाःसां विषादी छ्यलीगु अप्वया वःगुलिं तरकारी, सिसाबुसा नइपिनि स्वास्थ्य झन खतराय् लानाच्वंगु दु ।

विशेषतः शहरी क्षेत्रया वासिन्दात थुकिं प्रभावित जुयाच्वंगु दु । तरकारीइ वासः छ्वाकेधुंकाः विषादी हे नष्ट जुइ मलायेवं ई स्वयां न्ह्यव हे अज्याःगु तरकारी शहरी बजारय् वइ । वासःया अवशेष ल्यं दनिगु तरकारी नल कि थीथी कथंया कडा ल्वचं थी फइगु खँ विज्ञतय्सं धाःगु दु । नेपालय् अप्वः थें डिडिटी विषादी छ्यलेगु याना वयाच्वंगु दु ।

सन् १९५२ पाखे औलो उन्मूलन यायेत न्हापांखुसी नेपाः दुत हःगु थ्व विषादी बुलुहुँ तरकारी बालीइ छ्वाकेगु यानाहःगु खः । विज्ञतय् कथं थुकिया छ्यलाबुला अप्वया वःगु यक्व मदुनि । तथ्यांक कथं वंगु निगू दशक दुने देय्न्यंकं थज्याःगु विषादी मुक्कं १९ टन जक आयात जूगु खनेदु । तर वंगु दँय् धाःसा थुकिया स्वीगू गुणा अप्वः ५७० टन विषादी आयात जूगु दु ।

नेपालय् आयात जूगु डिडिटी विषादी मध्ये ८५ प्रतिशत तरकारी बालीइ छ्वाकेगु याना वयाच्वंगु दु । थ्व तथ्यांक स्वयेबलय् नेपालय् विषादी छ्वाकातःगु तरकारी वयेगु तसकं अप्वया वनाच्वंगु दु । नेपाःन्यंकं जुइगु तरकारी बालीया ल्याखं औसतय् कायेबलय् प्रति हेक्टर ३९६ ग्राम जक विषादी छ्यलाच्वंगु खनेदइ । तर थ्व तथ्यांक धाःसा सही मजूगु खँ विज्ञतय्सं धाःगु दु ।

कृषि मन्त्रालयया पुलांम्ह सचिव हरि दाहालं बिबिसीलिसे खँ ल्हासें धयादीगु दु, ‘स्वनिगलय् उत्पादन जुइगु गोलभ्याराय् प्रति हेक्टर १४ किलो व सर्लाहीइ प्रति हेक्टर ९ किलो विषादी छ्यलाच्वंगु लूगु दु । उकिं झीगु भुतूक्वथाय् ३९६ ग्राम जक विषादी छ्लाच्वंगु थासं तरकारी वइ मखु ।’

कृषि विकास मन्त्रालयया प्रवक्ता योगेन्द्र कुमार कार्कीं धाःसा देय्या न्हय्गुलिं प्रदेशय् दुगु विषादी निरीक्षण इकाइपाखें यानाच्वंगु निरीक्षण कथं विषादी म्हो जक छ्यलाच्वंगु लूगु धासें तरकारी उपभोग यानाः ग्याये हे माःगु अवस्था मदु धयादीगु दु । वय्कःया कथं देय्न्यंकं तरकारीया उत्पादन अप्वःगु ल्याः व विषादी छ्यःगु परिमाण स्वयेबलय् खतरनाक खने मदु ।

विज्ञतय्सं धाःसा विषादी छ्यलाच्वंगु परिमाण स्वयां नं यानाच्वंगु तरिका खतरनाक जूगु खँ धाःगु दु । कृषिविद् नीलकण्ठ शर्माया कथं विषादी छ्यलीगु तरिका मसःगुलिं किसान व उपभोक्ता निम्हं खतराय् लानाच्वंगु दु । विज्ञतय् कथं मेमेगु अन्न बाली स्वयां तरकारी दकलय् ग्यानापुगु जुयाच्वंगु दु । वा, छ्व थेंज्याःगु अन्नबालीइ विषादी छ्यःसां थुपिं उपभोक्तायाथाय् यक्व लिपा जक थ्यनीगु जूगुलिं विषादीया अवशेष दइ मखु ।

‘तरकारीइ वासः छ्वाकेधुंकाः स्वन्हु निसें स्वीन्हु तक पीमाः । तर किसानतय्सं बजाः भाः वयेवं तुरुन्त हे तरकारी मिया छ्वइ, उकिं उपभोक्ताया स्वास्थ्य खतराय् लानाच्वंगु दु’ शर्मां धयादीगु दु ।विज्ञतय्सं थज्याःगु वासः झीगु म्हय् लात धाःसा जलस्येँ, स्येँया ल्वय् लिसें क्यान्सर तकं जुइफुगु खँ धाःगु दु । थज्याःगु ल्वय्पाखें बचे जुइगु खःसा बेमौसमी तरकारी न्यायेगु पलेसा मौसमी तरकारी नयेगु, बजारं तरकारी न्याना हयेधुंकाः बांलाक चिलखं सिला छ्वल धाःसा विषादी चीके फइगु खँ धाःगु दु ।

Rate this item
(0 votes)
Login to post comments
Go to top

Copyright © 2016  nepalbhasa.com. All rights reserved.