All for Joomla All for Webmasters

ने.सं. ११३६ यंलागा अष्टमी

दार्जिलिङ हडतालं नेपाःयात फाइदा !

थौंकन्हय् दार्जिलिङय् न्ह्यानाच्वंगु गोर्खाल्याण्ड आन्दोलनं उगु भेगया ब्यापार व्यवसाय चौपट जूसां नेपाःया चिया उत्पादकतय्त धाःसा यक्व हे फाइदा जुयाच्वंगु दु । भारतय् दार्जिलिङया चिया धाल कि तसकं नांजाः । तर थौंकन्हय् अन जुयाच्वंगु आन्दोलनं यानाः दार्जिलिङया चिया बगान फुक्क हे बन्द जुयाच्वंगु दु ।

थज्याःगु अवस्थाय् भारतया कोलकाता लगायतया शहरय् नेपाःया इलामय् उत्पादन जुइगु चिया दुहां वनाच्वंगु दु । थुकिं यानाः नेपाःया चिया उत्पादकतय् तसकं लिमलानाच्वंगु दु । दँय्दसं मोहनि नखः (दुर्गापुजा) या इलय् कोलकाताय् चियाया माग तसकं अप्वइ । यदि दार्जिलिङया आन्दोलन मोहनि तक नं सिमधल धाःसा थुगुसीया सिजनय् कोलकाताया बजारय् नेपाःया हे चियां थाय् काइगु सम्भावना अप्वयाच्वंगु दु ।

नेपाःया चिया उत्पादकतय्सं थ्वहे मौकाय् भारतया बजारय् नेपाःया चिया स्थापित यायेगु ज्या जुइमाःगु खँय् बः बिया हःगु दु । आः तक नेपाःया चिया भारतीय बजारय् छ्वयेगु ज्या व्यापारीतय्गु निजी कुतलं जक जुया वयाच्वंगु दु । आः थुकिया लागिं सरकारं नं कुतः यायेमाःगु माग चिया व्यवसायीतय्सं याना हःगु दु ।

यदि थ्व इलय् भारतीय बजारय् नेपाःया चियां थाय् काल धाःसा लिपा तकं स्थापित जुया च्वने फइगु आशा व्यवसायीतय्सं यानाच्वंगु दु । नेपालय् दँय् ५० लाख किलो तक चिया उत्पादन जू । तर उकिया ९० प्रतिशत बजाः धाःसा भारतय् हे दु । यदि बांलाक बजाः काल धाःसा नेपाःया चिया व्यवसाययात तःधंगु हे फाइदा दइगु आशा यानातःगु दु ।

Rate this item
(1 Vote)
Login to post comments
Go to top

Copyright © 2016  nepalbhasa.com. All rights reserved.