All for Joomla All for Webmasters

ने.सं. ११३६ यंलागा अष्टमी

केसीया मागय् थौं सर्वपक्षीय बैठक

रेजिडेन्ट डाक्टरतपाखें कडा पलाः ल्ह्वनेगु ख्याच्वः

झिंछक्वःखुसी अनसन च्वनाच्वंम्ह डा. गोविन्द केसीया मागयात कयाः थौं सर्वपक्षीय बैठक जुइत्यंगु दु । शिक्षा मन्त्रालयया पहलय् शिक्षा मन्त्रालयय् थ्व बैठक जुइत्यंगु खः । बैठक थौं न्हिनय् ४ बजे जुइगु खँ धाःगु दु । डा. केसीया मागयात कयाः थ्वयां न्ह्यव जूगु प्यंगू बैठकं छुं निष्कर्ष पिकाये मफयेवं थौं वृहत सर्वपक्षीय बैठक सःतूगु खः ।

बैठकय् शिक्षामन्त्री गोपालमान श्रेष्ठ, स्वास्थ्य मन्त्री गिरिराजमणि पोखरेल, निगुलिं मन्त्रालयया सचिवया लिसें अनसनरत डा. गोविन्द केसीपाखेंया वार्ता टोलीया दुजः, सरकारया वार्ता टोली दुजः, पुलांम्ह स्वास्थ्यमन्त्री गगन थापा, चिकित्सा शिक्षा प्रतिवेदन निर्माण समितिया संयोजक केदारभक्त माथेमा, डा. भगवान कोइराला, व्यवस्थापिका संसदया महिला बालबालिका तथा जेष्ठ नागरिक व समाज कल्याण समितिया सभापति, आइओएम व पाटन स्वास्थ्य विज्ञान प्रतिष्ठानया डीनपिंसं ब्वति काइगु खँ धाःगु दु ।

चिकित्सा शिक्षा विधेयकयात माथेमा आयोगया भावना कथं पारित यायेमाःगु लिसें थीथी माग तयाः डा. केसी गुन्हु न्ह्यवनिसें अनसन च्वना वयाच्वंगु खः । डा. केसी थ्व हे माग तयाः थ्वयां न्ह्यव झिक्व तक अनसन च्वनेधुंकूगु दु । थौंया सर्वपक्षीय बैठकय् थ्व हे माग गुकथं संवोधन यायेगु धयागु विषयय् सहलह जुइगु खँ शिक्षा मन्त्रालयं धाःगु दु ।

मेखे अनसन च्वनाच्वंम्ह डा. केसीया स्वास्थ्य धाःसा झनझन स्यना वनाच्वंगु खँ धाःगु दु । वय्कःया म्हय् लः व ग्लुकोज म्हो जुया वनाच्वंगु खँ वय्कःया स्वास्थ्य स्वया वयाच्वंपिं चिकित्सकतय्सं धाःगु दु । वय्कःयात आः कडा निगरानीइ तयातःगु दु । थ्वहे दथुइ डा. केसीया समर्थनय् रेजिडेन्ट डक्टरर्स एशोसियसनं कडा पलाः ल्ह्वनेगु ख्याच्वः बिउगु दु । डा. केसीया समर्थनय् सोलिडारिटी फर डा. केसी एलाइन्स व विवेकशील साझा पार्टीं स्वन्हु न्ह्यवनिसें माइतीघरय् रिले अनसन न्ह्याकाच्वंगु दु ।

 

Rate this item
(0 votes)
Login to post comments
Go to top

Copyright © 2016  nepalbhasa.com. All rights reserved.