All for Joomla All for Webmasters

ने.सं. ११३६ यंलागा अष्टमी

२ नम्बर चुनावया कमाण्डर दाहाल

प्रदेश नम्बर २ लय् जुइगु स्थानीय तहया चुनावय् थःगु सम्पूर्ण ध्यान केन्द्रित यायेगु निर्णय माओवादी केन्द्रं याःगु दु । थन जुइगु चुनाव आः माओवादीं पार्टी अध्यक्ष पुष्पकमल दाहालया हे नेतृत्वय् ल्वायेगु निर्णय समेत याःगु दु । माओवादीं थ्व चुनावय् ल्वायेगु लागिं आवंनिसें हे तयारी समेत शुरु याःगु दु । थुकिया लागिं कार्यकर्तातय्त प्रशिक्षण बीत अध्यक्ष दाहाल थौं जनकपुर वंगु दु ।

अन जुइगु भेलाय् वय्कलं २ नम्बर प्रदेशया चुनाव थःपिनि लागिं छाय् महत्वपूर्ण खः धइगु खँ ध्वाथुइकादी । २ नम्बर प्रदेशया चुनावय् अनया प्रमुख राजनीतिक दल राजपां ब्वति कायेगु वा मकायेगु धइगु बारे आः तक छुं निर्णय याःगु मदुनि । यदि राजपां चुनाव मल्वात धाःसा उकिया लबः कायेगु लागिं कांग्रेस, एमाले व माओवादी केन्द्रया दथुइ धेंधेंबल्लाः जुयाच्वंगु दु ।

थ्व लागाया मेगु छगू शक्ति संघीय समाजवादी फोरमं नं तयारी यानाच्वंगु दनि । कांग्रेसं थ्वहे प्रदेशय् १०० सिट स्वयां अप्वः त्याकाः थःपिं १ नम्बर पार्टी जुइगु रणनीति दयेकूगु दुसा एमालें थनया ६० प्रतिशत सिट त्याके फइगु अनुमान याना हःगु दु । थ्वहे झ्वलय् भरतपुर महानगरया १९ नम्बर वडाय् हानं मतदान याकेगु धकाः सर्वोच्चं अदालतं म्हिगः याःगु फैसला लिपा थुकिया हे बारे सहलह ब्याकेत थौं प्रमुख प्रतिपक्षी एमालेया स्थायी समितिया बैठक च्वंगु दु ।

सर्वोच्चं याःगु उगु फैसलायात एमालें ‘दुर्भाग्यपूर्ण’ धकाः प्रारम्भिक प्रतिक्रिया बीधुंकूगु दु । अथे खःसां पार्टीया आधिकारिक धापू धाःसा थौं स्थायी समितिया बैठक लिपा सार्वजनिक याइगु खँ दु । अन मतपत्र खुना बिउगुलिं पुनः मतदान यायेमाः धइगु निर्वाचन आयोगया निर्णययात हे म्हिगः सर्वोच्चं सदर याना बिउगु खः ।

Rate this item
(0 votes)
Login to post comments
Go to top

Copyright © 2016  nepalbhasa.com. All rights reserved.