All for Joomla All for Webmasters

ने.सं. ११३६ यंलागा अष्टमी

सतक विस्तार अन्तर्राष्ट्रिकरण ,कंस सर्वोच्च अदालत लागाय् मुनेत सकसितं इनाप

स्वनिगःया थीथी थासय् सतक विस्तारया नामय् स्थानीय जनताया छेँ थुनेगु ज्याया विरोध यायेत नीस्वंगु सतक विस्तार पीडित संघर्ष समितिं थःपिनि समस्यायात कयाः राष्ट्र संघीय निकायतय्त पौ छ्वयेगु तयारी याःगु दु । उकिया लागिं थौं विस्तारित बैठक च्वंगु दु ।

थौंया बैठकय् थःगु नुगःखँ तसें आदिवासी जनजाति कानून व्यवसायीतय् संस्था लाहुर्निपया अभियन्ता शंकर लिम्बुं थ्व मुद्दायात अन्तर्राष्ट्रियकरण यायेगु अभियानय् थःपिं न्ह्याः वनाच्वना तर थ्व मुद्दा स्वनिगःया आदिवासीयात विस्थापित यायेत्यंगुलिं उकिया विरोधय् खः लाकि मुआब्जा मबिसे छेँ थुनेत्यन धइगु खँया विरोधय् खः स्पष्ट याये माल धयादिल ।

सतक विस्तारया विरोध यानाच्वंपिं मनूतय्सं मुआब्जा व क्षतिपूर्ति बी माल धकाः नं माग यानाच्वंगु जुयाः थथे निता खँ वये मजिउगु बिचाः वय्कलं तयादिल । समितिया सल्लाहकार डा. कृष्ण मानन्धरं थ्व सतक विस्तार धाःसां मूलतः स्वनिगःया नेवाःतय्त विस्थापित यायेगु ज्या जक खः धयादिल ।

ज्याझ्वलय् सुमन साय्मि, शान्तप्रकाश श्रेष्ठ, विजेन्द्रविलास वज्राचार्यपिंसं नं नुगःखँ तयादीगु खः । थ्व विषयय् सर्वोच्चय् लानाच्वंगु रिटयात कयाः कंस अन्तिम सुनुवाई जुइत्यंगु दु । वकुन्हु सर्वोच्च अदालतय् मुनेत नं ग्वसाः खलकं इनाप याःगु दु ।

कन्हय् इन्टरनेट हडताल

कन्हय् नेपाःया इतिहासय् हे न्हापांखुसी इन्टरनेट हडताल जुइत्यंगु दु । थौंकन्हय् स्वनिगः दुने विकासया नामय् याना हःगु सतक विस्तार, चक्रपथ निर्माण, न्हूगु शहर निर्माण आदि थेंज्याःगु मुद्दाय् सकस्यां ध्यान साला कायेगु लागिं ‘शेभ नेपाः भ्याली’ नांगु पुचलं थ्व हडताल यायेत्यंगु खः ।

विदेशय् अक्सर थज्याःगु हडताल जुयाच्वंसां नेपालय् धाःसा थ्व छगू न्हूगु प्रयोग खः । थुकी खास यानाः फेसबुक व ट्विटर चले याइपिं सकस्यां कन्हय् छन्हु थःगु वालय् मेगु छुं हे फोटो वा सन्देश पोष्ट मयासे च्वय् न्ह्यथनागु ह्यासट्याग छगू जक तयेगु ज्या जुइ ।

उकिं स्वनिगः प्रति सरोकार दुपिं सकसितं कन्हय् सुथय् ७ बजेनिसें २४ घौ थ्व छगू जक सन्देश पोष्ट याना तयेत ग्वसाः खलकं सकसितं इनाप याःगु दु । लिसें झीगु खँ तयाः उपत्यका विकास प्राधिकरणयात थ्व एड्रेसय् शिष्ट भासं This email address is being protected from spambots. You need JavaScript enabled to view it. पौ छ्वयेत नं सकसितं इनाप याःगु दु । थुकिं थ्व विषयय् सकस्यां ध्यान साले फइगु खँ धाःगु दु ।

Rate this item
(0 votes)
Login to post comments
Go to top

Copyright © 2016  nepalbhasa.com. All rights reserved.