All for Joomla All for Webmasters

ने.सं. ११३६ यंलागा अष्टमी

राजपां प्रदेश चुनाव नं मल्वाइगु

दल दर्ताया लागिं आह्वान जूसां दर्ता याः मवनेगु निर्णय

आः २ नम्बर प्रदेशय् जुइगु स्वंगूगु चरणया स्थानीय चुनावय् राजपायात नं ब्वति कायेकेगु लागिं सत्तारुढ दलतय्सं कुतः यानाच्वंगु हे इलय् राजपां थ्व चुनाव जक मखु थ्वयां लिपा जुइगु केन्द्र व प्रदेशया चुनावय् समेत थःपिंसं ब्वति मकायेगु निर्णय याःगु दु ।
संघ व प्रदेश चुनाव प्रयोजनया लागिं निर्वाचन आयोगं म्हिगःनिसें दल दर्ताया ज्या शुरु याःगु दु ।

आयोगं म्हिगः निसें लछि तकया दुने दल दर्ता याः वा धकाः आह्वान याःगु खः ।तर राजपां थ्व दल दर्ताया ज्याय् नं थःपिं सहभागी मजुइगु निर्णय याःगु खँ सीदुगु दु । राजपा सूत्रं धाः कथं ‘यदि चुनावय् हे ब्वति कायेगु मखुसा दल जक छाय् दर्ता याः वनेगु ?’ धइगु निष्कर्ष सहित राजपां दल दर्ता मयायेगु निर्णय याःगु खः ।

लुमंकेबहः जू, स्थानीय चुनावया हकय् नं निर्वाचन आयोगं दल दर्ता याः वा धकाः थगुनेया माघय् हे सुचं जारी याःगु खःसां तत्कालिन मधेसी मोर्चा आवद्ध पार्टीतय्सं (संघीय समाजवादी फोरम छगू बाहेक) दल दर्ता मयाःगु खः ।थुकिं यानाः राजपां लिपा चुनाव ल्वायेगु धकाः मनस्थिति दयेकूगु खःसा नं चुनाव चिंया समस्या पिहां वःगु खः ।

आः नं दल दर्ता मयात धाःसा लिपा चुनावय् ब्वति कायेगु हे जुल धाःसां नं चुनाव चिंया समस्या पिहां वये फुगु खँ धाःगु दु ।संविधान संशोधनया मागयात सम्बोधन मयाःगु कारणं चुनावय् ब्वति मकायेगु निष्कर्षय् राजपाय् थ्यंगु खः । बरु आः आन्दोलन हे तच्वयेका यंकेमाःगु धापू नं उगु पार्टीं तयाच्वंगु दु ।थ्व बारे अधिकारिक निर्णय साउन २२ य् च्वनीगु केन्द्रीय बैठकं याइ धाःगु दु ।

निगुलिं चुनाव छन्हुं ?

स्थानीय तहया चुनाव लिपा माघ ७ गते तकया दुने हे जुइमाःगु प्रतिनिधि सभा व प्रदेश सभाया चुनाव छन्हुं हे यायेमाःगु विषयय् वहस शुरु जूगु दु । प्रधानमन्त्री शेर बहादुर देउवां प्रदेश सभाया चुनाव मजुइगु खः लाकि धकाः जुयाच्वंगु शंका निवारण यायेगु लागिं व खर्च नं बचे यायेगु लागिं निगुलिं चुनाव छक्वलं यायेगु प्रस्ताव न्ह्यःने हयादीगु दु ।

उखे प्रमुख प्रतिपक्षी एमालेया अध्यक्ष केपी ओलीं नं निगुलिं चुनाव छक्वलं यात धाःसा ईया बचत जुइगु तर्क न्ह्यःने तयादीगु दु । तःधंगु राजनीतिक दलत थ्व पक्षय् सहमत जुइगु खने दुगुलिं आः निर्वाचन आयोगलिसे आधिकारिक सहलह ब्याकेत्यंगु खँ सीदुगु दु ।

Rate this item
(0 votes)
Login to post comments
Go to top

Copyright © 2016  nepalbhasa.com. All rights reserved.