All for Joomla All for Webmasters

ने.सं. ११३६ यंलागा अष्टमी

रक्षा मन्त्रीं सुयागु रक्षा याइ थें ?

नेपाःया राजनीतिक गतिबिधिया दुने न्हूगु मन्त्री परिषद् नीस्वंगु दु । पालंपाः प्रधानमन्त्री जुइगु नेपाली कांग्रेस व माओवादी केन्द्रया सहमतिकथं माओवादी केन्द्रया अध्यक्ष पुष्पकमल दाहालं प्रधानमन्त्रीया पद त्वःता बिइवं नेपाली कांग्रेसया सभापति शेरबहादुर देउवा प्रधानमन्त्री जूगु खः । तर प्रधानमन्त्री जुयाःया लत्या लिपा तक नं नेपाली कांग्रेस दुनेया आन्तरिक कलहया कारणं नीस्वने मफुगु मन्त्री मण्डल अन्ततः भागभण्डाया लिधंसाय् हे गठन जूगु दु ।

तर मन्त्री परिषदया घोषणां सलंसः दँ निसें राज्यपाखें उत्पीडन सह यायेत बाध्य जुयाच्वंपिं नेपाःया आदिवासी नेवाःतय्गु निंतिं छगू सुखद आश्र्चय जूगु दु । नेपाःया इतिहासय् दकलय् न्हापां छम्ह नेवाः भिमसेनदास प्रधान रक्षा मन्त्री जूगु दु । खय्त ला पंचायतकालय् प्रधानमन्त्री स्वतः रक्षा मन्त्री नं जुइगु कारणं न्हापा मरिचमान सिंह नं रक्षा मन्त्री जूगु इतिहास दु ।

तर मुलुकय् लोकतान्त्रिक गणतन्त्र वयेधुंकाः न्हापांम्ह रक्षा मन्त्री जूम्ह भिमसेनदास प्रधान हे खः । सामान्यतः रक्षा मन्त्रालय धायेवं देय्या रक्षाया भाला क्वबिइगु मन्त्रालय धकाः थुइकी । न्हापा जुजु व गैर नेवाःतय्गु दबदबा दयाच्वंगु थ्व रक्षा मन्त्रालय अन्र्तगत देय्या शक्तिशाली निकाय नेपाल सेना नं लाः वइ । आः तकया नेपाली सेनाया इतिहासय् नं छम्ह नेवाःयात प्रमुखकथं स्वीकार्य यायेमाःगु नं थ्व न्हापांगु हे जुइ ।

मुलुकय् लोकतान्त्रिक गणतन्त्र वःगुया थ्व तःधंगु दसि खः । नेपाली कांग्रेसया कोटां रक्षा मन्त्री जुयादीम्ह भिमसेनदास प्रधान नेपाली कांग्रेस दुने गज्याःगु भागबन्डां मन्त्रिमण्डलय् दुथ्यात धयागु खँ छुं न्हि न्ह्यःनिसें संचार माध्यमय् वयाच्वंगु दु । व स्वयां नं येँया छम्ह रैथाने रक्षा मन्त्री थ्यंकया पदय् थ्यंगुयात सामान्यकथं कायेगु स्थिति मदु ।

उकिं अज्याःगु गरिमामय मन्त्री जुइधुंकाः स्वयम् रक्षा मन्त्रीपाखें नं आपालं रचनात्मक व लिच्वः दइगु ज्या जुइ धयागु आशा येँ निवासीतय्सं काइगु स्वाभाविक हे खः । भिमसेनदास प्रधान छम्ह राजधानीवासी जुयाच्वंगु कारणं सत्ता शासकतय्सं राजधानीयात गुकथं दुषित यानाच्वंगु दु धयागु खँ बांलाक्क वाःचाःगु जक मखसे राज्यं यानाच्वंगु थज्याःगु विदेभकारी नीति व योजनाया विषयय् थः हे आन्दोलित जुयाच्वंम्ह ब्यक्ति खः ।

स्वनिगः नेवाःतय्गु मूल वस्ति व नेवाःत थनया आदिवासी जनजाति जूगु कारणं वर्तमान परिपेक्षय् पहिचान सहितया जीवन यापन जुइमाःगु व थनया भाषा, कला, सम्पदा, संस्कृति संरक्षित जुइमाः धयागु आन्दोलन व अभियानया अभियन्ता नं खः । स्वनिगलय् अनियन्त्रितरुपं मनूत बसोबास याः वयाः थन आप्रवाशनया कारणं ब्वलनाच्वंगु हरेक समस्याया भुक्तभोगी नं खः ।

अज्याःम्ह ब्यक्ति देय्या रक्षाया निंतिं भाला कयातःगु मन्त्रालयया मन्त्री जुइवं सकल स्वनिगःवासीत अज्याःगु स्थितिया अन्त्य मजूसां नियन्त्रण जुइ धयागु खँय् आशावादी जुइगु स्वाभाविक हे खः । भीमसेनदास प्रधान येँया ६ नम्बर क्षेत्रं निर्वाचित न्हापा सभासद, आः सांसद नं खः ।

वय्कः जनतापाखें निर्वाचित जुइवं हे मेमेपिं येँ निर्वाचित जुयादीपिं सांसदत मुनाः स्वनिगःयात व्यवस्थित सहर दयेकेगु व थन छुं नं क्षेत्रपाखें नियोजित योजना लागू याये दइमखु धयागु अभियानय् न्ह्यचिलादीम्ह व्यक्ति खः । विशेषकथं येँ महानगरपालिकां थनया पुलांगु बस पार्कय् २९ तल्लाया भवन दयेकेगु योजना सार्वजनिक यासांनिसें उगु भवन निर्माणया ठेक्का बिउगु इलंनिसें हे उकिया विरोधय् जुयाच्वंगु आन्दोलनया नेतृत्व यानादीम्ह ब्यक्ति खः ।

येँ महानगरपालिकाय् तारान्तार आन्दोलनरत पुचःया प्रतिनिधि मण्डलया नेतृत्व यानाः उगु ठेक्का रद्द यायेमाःगु माग न्ह्यब्व वनादीम्ह ब्यक्तित्व खः । उगु इलय् येँ महानगरपालिकाया कार्यकारी अधिकारीं बस पार्कय् भवन निर्माणया ठेक्का आधिकारीकरुपं हे सम्झौता जुइधुंकूगुलिं उकियात पने फइमखु धयागु लिसः न्यनाच्वंम्ह ब्यक्ति नं खः । आः स्थिति हिलावने धुंकूगु दु ।

स्वय्म येँ महानगरपालिकां भवन निर्माणया उम्ह ठेकेदारं सम्झौताकथं ज्या मयाःगुलिं ठेक्का रद्द याइगु समाचार पिदनाच्वंगु दु । ठेकेदारं सम्झौताकथं ज्या मयाःगुलिं सम्झौताकथं हे ठेक्का रद्द जुइगु स्थिति दु । तर अय्नं ठेकेदारं सम्झौताया इलय् हे ज्या क्वचाइ धकाः धायेवं कर्मचारीत सुम्क च्वनाच्वंगु खनेदु । अन हाकनं मेगु चलखेलया आशंका आम जनतां यानाहःगु दु ।

येँ दुने खुल्ला थाय्या संरक्षण जुइमाः धकाः अभियान न्ह्याकाच्वंम्ह आःया रक्षा मन्त्री भिमसेनदास प्रधान आः थःम्हं न्ह्याकागु आन्दोलनयात निर्णय यायेगु थासय् थ्यनाच्वंगु दु । खय्त ला आःया इलय् थ्व मुद्दा थःगु मन्त्रालयया कार्यक्षेत्रय् मलाः धकाः लिचिले फइगु बहाना नं दु । तर समग्र रुपं देय्या भिं व अधिकारया निंतिं सः तइपिनिगु निंतिं थुकथं व वा थ्व बहाना तयाः लिचिलि मखुला धयागु विश्वास आम जनतां यानाच्वंगु दु ।

वंगु निदँ न्ह्यः नेपालय् विनाशकारी भुखाचं अपार जनधनया नोक्सानी यायेवं येँ दुने खुल्ला थाय्या संरक्षण जुइमाः धयागु अभियानं बल काःगु खः । तर आःया इलय् स्वय्म नेपाली सेनां चीधंगु तिंख्यः थःपिनिगु नियन्त्रणय् तयाः अन थीथीकथं भौतिक निर्माण यानाच्वंगु दु ।

येँ दुने निर्माण जुयाच्वंगु अज्याःगु निर्माणयात अबैध धकाः धासें येँ महानगरपालिकां नक्सा तक हे पास मयासे, येँ महानगरपालिकायात जानकारी तकं हे मबिसे एक तर्फीरुपं निर्माण ज्या यानाच्वंगु दु धकाः संचार माध्यमय् सः थ्वयाच्वंगु दु । शक्तिया लिधंसाय् स्वनिगःया जनता उत्पीडनय् लानाच्वंगु थ्व नं छगू ज्वलन्त उदाहरण खः ।

थःगु मातहतया निकायं कानूनयात वास्ता मयासे ज्या यानाच्वंगु खःसा उकियात कानूनकथं हे समाधान यायेगु लोकतान्त्रिक अभ्यास खः । थुकी सुयागुं शक्तीया लिधंसाय् लिचिलेमाःगु आवश्यकता मदु । आन्दोलनया माध्यमं थःपिनिगु माग पूवंकेमाः धकाः सः तयाच्वंम्ह ब्यक्ति हे आः उकिया निर्णायक स्थानय् थ्यनेवं, निर्णय यायेगु हैसियत दयेधुंकाः अज्याःगु माग पूवनी व वंकेमाः धयागु मान्यता सकसियां दयाच्वनी ।

पुलांगु बस पार्कय् निर्माण जुइ धयातःगु अब्यवहारिक भवन निर्माण न्ह्याब्लेंया निंतिं रोक्का याना छ्वयेगु खःसा मन्त्रिपरिषदया निर्णयं थ्व संभव दु । न्हापा न्ह्यानाच्वंगु आन्दोलन वास्तविक रुपं हे स्वनिगःवासीया भावनाय् म्हितेगु ज्या जक यानामच्वंगु खःसा आःया इलय् क्याविनेट मन्त्रीं थःगु हरेक ब्यवहारीक माग पूवकेगु निंतिं राज्यया शक्तिशाली निकाययात छ्यलेफु ।

थःगु स्थापित मान्यतायात निर्णायक तहलय् यंकाः थःगु सिद्धान्त प्रतिस्थापन यायेफु । मखु थःम्ह हे ल्ह्वनाच्वनागु अज्याःगु आन्दोलनया माग राष्ट्रया स्तरय् न्यून वा गौण खः धकाः पदय् थ्यनेवं सुना नं बिचाः यात धाःसा सलसं दँ राज्यं हे उत्पीडनय् लाकातःपिं नेवाःतय्गु निंतिं वय्कःया मन्त्री पद नं छुं न्हूगु खँ जुइमखु ।

 

Rate this item
(0 votes)
Login to post comments
Go to top

Copyright © 2016  nepalbhasa.com. All rights reserved.