All for Joomla All for Webmasters

ने.सं. ११३६ यंलागा अष्टमी

आप्रवासन नीतिया आवश्यकता

नेपाःगाः अर्थात स्वनिगः । अले स्वनिगः दुनेया स्वंगू ऐतिहासिक शहरत येँ, यल व ख्वप । ऐतिहासिकताया ल्याखं स्वनिगःया महत्व तसकं तःधंसां थनया स्वगुलिंं जिल्लाया क्षेत्रफल मात्र ८९९ वर्ग किलोमिटर । क्षेत्रफलया हिसाबं छुं नं थाय् चीधं वा तःधं जुइगु स्वाभाविक खत । मू खँ अन च्वंपिं मनूत व अनया सभ्यतां यानाः उगु थाय्यात तःमि याइगु खः ।स्वनिगःया सन्दर्भय् पाय्छि अथे हे ।

स्वनिगः क्षेत्रफलया ल्याखं मेमेगु शहर स्वयां चीधं जूसां मुक्कं देय्या म्हसीका क्वबुयाच्वंगु थाय् खः । ऐतिहासिक कालंनिसें छगू सभ्य समाज कथं परिचित स्वनिगःया सभ्यता नेपाःया न्हाय् धस्वाकेगु निंतिं तिबः बियाच्वंगु जुल ।शदिऔं न्ह्यवंनिसें सुरु जूगु थनया कला, संस्कृति, जात्रा, संस्कार नापं शहरया वनोट व बसोबास यायेत तयार यानातःगु पूर्वाधारत नीछगू शताब्दीया वैज्ञानिक युगया स्वयां कम मजूगु यथार्थ खः ।

तर वहे नाप नापं मेगु यथार्थ नं दु, अज्याःगु सभ्यता आः बुलुहुँ न्हना वनाच्वन । नेपाःया न्हाय् धस्वाकाच्वंगु सभ्यता झीगु मिखाया न्ह्यःने, झीसं खंक खंक हे सिना वनाच्वंगु दु । झीसं गर्व यानाच्वनागु स्वनिगःया रुपरेखा न्हियान्हिथं भयावह अवस्थाय् लानाच्वंगु दु ।स्वनिगःया भूगोल, थनया क्षेत्रफल अले थनया सभ्यताया विकासक्रम नाप तप्यंक स्वापू दुपिं धाइगु थनया स्थानीय वासिन्दात खः ।

स्थानीयतय्सं हे थनया भूगोल, क्षेत्रफल व जनसंख्याया आधारय् स्वनिगःया सभ्यता विकास याःगु खः । छगू निश्चित व चीधंगु भूगोल दुगुलिं स्वनिगः दुनेया विकासय् मू लिच्वः लाकीगु धाइगु थनया जनसंख्यां हे खत । न्हापा म्हो जक मनूत व स्वनिगलं थेगे याये फइगु जक जनसंख्या दुगुलिं स्वनिगःया सभ्यताय् अपाय्सकं खतरा मजू ।

आः वयाः स्वनिगःया जनसंख्या थुलिभनं अप्वः जुया वनाच्वंगु दु कि स्वनिगः दुनेया सभ्यता जक न्हना वनाच्वंगु मखु कि स्वनिगःया वातावरण नापं भूमि तकं तहसनहस जुयाच्वंगु दु ।स्वनिगलय् सन् २०११या जनसंख्याया ल्याखं स्थायी जनसंख्याया ल्याः नीन्यागू लख थ्यंगु दु । अले लजगाः, ब्वनेगु निंतिं वासः याकेत वइपिं नापं मेमेगु ज्याखँया निंतिं वइपिं मनूतय् ल्याः थ्यंमथ्यं मेगु नीन्यागू लख ।

सन् २००१ या जनगणना कथं स्वनिगःया जनसंख्या झिंखुगू लख जक दुगु खः । लिपांगु जनगणना जूगु खुदँ जुइधुंकूगु ल्याखं आः स्वनिगःया जनसंख्या खुदँ न्ह्यः स्वयां गाक्कं अप्वयेधुंकूगु झीसं अःपुक अनुमान यायेफु । स्वनिगः दुने अप्वयाच्वंगु जनसंख्याया ल्याखं आःया प्यदँ लिपा जुइगु मेगु जनगणना तकया दुने थनया जनसंख्या मेगु झिगू लखं अप्वः जुइगु अनुमान यानातःगु दु ।

थुकिं नं अनुमान यायेफु स्वनिगलं ल्ह्वनाच्वंगु भारया मात्र तसकं अप्वया वनाच्वंगु दु । छुं नं निश्चित थासय् लः मदुसा अन मेगु शहर वा मेगु जिल्लां लःया व्यवस्था याये जिउ, खाद्य वा इन्धनया अभाव जूसा उकियात पिनें आयात याये जिउ तर जब थाय्या हे अभाव जूसा अन मेगु भूमि स्वाये हयेगु सम्भावना दइ मखु । स्वनिगःया आः जुयाच्वंगु नं थथे हे खः ।

त्वनेगु लः मदयाः मेलम्चीं हयेगु व्यवस्था यानाच्वंगु दु, आपालं खाद्य वस्तु तराई वा मेमेगु पहाडी जिल्लां वयाच्वंगु दु, इन्धन भारतं वयाच्वंगु दु । तर भूमि झीसं गनं हयेगु ? न थुकियात स्वाये जिउ, न स्वनिगःयात ल्ह्वनाः मेगु तःधंगु भूमि दुगु थासय् स्थानान्तरण यायेगु हे सम्भावना दु । सम्भव दुसा केवल थनया जनसंख्या नियन्त्रण यायेगु ।

जनसंख्याया ल्याखं स्वनिगःया भार तसकं अप्वयेधुंकल, थनया थाय् उगु जनसंख्याया निंतिं तसकं चीकू जुइधुंकल । उकिं थुकिया छगूयां छगू जक उपाय धइगु जनसंख्या नियन्त्रण यायेगु व उकिया निंतिं आप्रवासन नीतिया व्यवस्था यायेगु ।
आःया अवस्थाय् वयाः आप्रवासन नीति धइगु केवल नेवाःतय् सरोकारया विषय जक मखेधुंकल ।

स्वनिगलय् स्थायी रुपं वसोवास यानाच्वंपिं नीन्यागू लख मनूतय् हे सरोकारया विषय खः, जनसंख्या नियन्त्रण व आप्रवासन नीति । नेवाःत थनया आदिवासी नापं सभ्यता नाप भावनात्मक रुपं स्वापू दुगु ल्याखं अप्वः सरोकार जुइगु थःथगु थासय् दु । नेवाःत थनया आदिवासी जूगु व थनया सभ्यता विकासय् नेवाःतय् महत्वपूर्ण विकास दु ।

थ्व ल्याखं नेवाःतय्सं थ्व विषय ल्ह्वनेमाःगु प्रमुख कारण धइगु थःगु सभ्यता, थःगु आदिभूमि व थःगु पहिचान ल्यंकेगु निंतिं खः ।मेखे, स्वनिगः दुने च्वनाच्वंपिं स्थायीवासी जुइधुंकूपिं आम स्वनिगःवासीतय् नीतिं नं थ्व विषय उलि हे सरोकारया विषय जुइ । छाय्धाःसां अप्वः जनसंख्या जूगुलिं स्वनिगः अव्यवस्थित व वातावरणीय ल्याखं प्रदुषित जुयाः स्वनिगःया अस्तित्व तकं तना वनाच्वंगु दु ।

थनया गैर नेवाः स्थानीयतय् निंतिं थः च्वनाच्वंगु थाय्या विकास यायेत, स्वच्छ व सफा यानाः सुन्दर शहर दयेका तयेत जनसंख्या नियन्त्रणया माग यायेमाःगु आवश्यकता उलि हे दु । अझ तचाःगु घेरां स्वयेगु खःसा स्वनिगलय् आप्रवासन नीति लागू यायेमाः धइगु मुक्कं नेपाःमितय् सरोकारया विषय तकं जुइफु । देय् संघीय प्रणालीइ वनेधुंकूगुलिं विकास निर्माण नापं जनसंख्याया ‘फ्लो’ छथाय् हे मजुसें फुक्क थाय् जुइमाःगु खः ।

आः स्वनिगलय् जनसंख्या नियन्त्रण यायेगु नीति हयेवं उकिया विकल्पया निंतिं मेगु शहरय् भौतिक पूर्वाधारंनिसें लजगाः, शिक्षा, स्वास्थ्य आदिया विकास यायेत बाध्य जुइ । स्वनिगःयात केन्द्रित यानाच्वंगु ज्याखँत मेगु शहरय् केन्द्रित जुइवं अन विकास निर्माणया ज्या न्ह्याइ । उकिं मेगु प्रमुख शहरवासीतय्सं नं स्वनिगलय् आप्रवासन नीतियात लागू यायेत बः बीगु धइगु थःपिनि शहरया विकास यायेगु लँपु चायेकीगु खः ।

मूल रुपं स्वनिगःया मू आज्जु धाइगु थनया पहिचानयात ल्यंकाः छगू यचुपिचुगु शहर दयेकेगु खः । थ्व मुक्कं स्वनिगःवासीतय् मू जनसरोकारया विषय जुयाबिउगु दु । थज्याःगु इलय् स्वनिगःया जनता थःपिनिगु निंतिं ज्या याये धकाः वयाच्वंपिं जनप्रतिनिधितय्सं थुगु विषययात गुकथं सम्बोधन याइ धकाः पियाच्वंगु दु ।

Rate this item
(1 Vote)
Login to post comments
Go to top

Copyright © 2016  nepalbhasa.com. All rights reserved.