All for Joomla All for Webmasters

ने.सं. ११३६ यंलागा अष्टमी

ख्वपय् तलेजु देगः दनेथाय् पंगः

ख्वपया लाय्कू लागाय् लानाच्वंगु तलेजु लागाया ९९ चोक दुने हे देगः निर्माणय् पंगः ब्वलंगु दु । लाय्कू लागा दुने तलेजुया उत्तर पश्चिम कुनय् च्वंगु दोय्माजु देगः दयेकेगु ज्याय् थथे पंगः ब्वलंगु खः । सिम्रौनगढं हयातःम्ह धाइम्ह थ्व द्यःया देगः दनेगु ज्याय् नापसं च्वंगु पद्म हाइस्कूलं पंगः थनाच्वंगु खँ पुरातत्व विभागं धाःगु दु ।

ख्वपया तलेजु स्वयां नं पुलांगु धयातःगु उगु दोय्माजुया देगः थुगुसी पुरातत्व विभाग अन्तर्गत ख्वपय् च्वंगु स्मारक संरक्षण तथा दरवार हेरचाह कार्यालयं दयेकेगु सुरु याःगु खः । तर उगु देगःया पलिं चीगु इलय् उत्तरपाखे लाइगु पलिया पाखा स्कुलया जग्गाय् लाइगु धासें पद्म स्कूलं देगःया पुनःनिर्माण ज्याय् पंगः थनाच्वंगु खँ इन्जिनीयर मोहनकृष्ण श्रेष्ठं कनादिल ।

तलेजु द्यः दुगु मूल चुकं पश्चिमय् लानाच्वंगु पुखू नापं उत्तर पश्चिम लागाय् न्हापांनिसें हे खुल्ला जुयाच्वंगु थुगु थासय् मिस्तय्सं चाःहिले मजिउ धाइम्ह थ्व दोय्माजु द्यः स्थापना यानातःगु खः । तलेजु लागाय् दनातःगु पःखाः दुने हे लानाच्वंगु थुगु देगः दनेवं उकिया उत्तरी पाखा स्कूल परिसरया जग्गाय् हाइगु जुइवं थ्व पंगः थनेगु ज्या जूगु खः ।

थ्व बारे खँ ब्याकेत स्कूलया प्रिन्सिपल राम हाडा बारम्बार खँ जूसां नं सहमति जुइ मफयाच्वंगु खँ विभागं धाःगु दु ।स्कूलया जग्गाय् पःखाः व पलिया लः लाइगु जूगुलिं देगलय् पलिं हे चिके मबिसे पंगः ब्वलंका बिउगु खँ धाःगु दु । उगु देगः तलेजु लागाया ९९ चोक मध्ये नं दोय्माजु चोकय् लानाच्वंगु खः । पद्म हाइस्कूल स्वयम् नं ९९ चोक दुने हे लानाच्वंगु थाय् खः ।

अन हे मल्लकालीन नौतले दरवार दुगु खँ पुरातत्व विभागं धाःगु दु ।पद्म हाइस्कूलय् दुहां वनेगु मुख्य प्रवेशद्वार नापं जवं खवं उग्रचण्डी भगवती व भैरबया उत्कृष्ट प्रस्तरया मूर्ति उकिया हे अवशेष जुयाच्वंगु खँ नं थ्व खँ स्पष्ट जुयाच्वंगु दु । तर पद्म हाइस्कुलं आः आधुनिक निर्माणया लागिं उगु मू ध्वाखा धाःसा पूवंक हे बन्द याःगु दु ।

स्मारकं थःपिंके छुं हे सल्लाह मयासे स्कूलया पःखालय् हे दीगु यानाः पलिं चिना हःगुलिं थथे देगः दयेकेगु ज्याय् पंगः ब्वलंकेत बाध्य जूगु खँ उगु स्कूलया प्रिन्सिपल राम हाडां कनादिल ।स्मारक संरक्षण कार्यालयं दोय्माजु देगः दयेकेत नीन्यागू लाख दां तुइगु इष्टिमेट यानातःगु दु । म्हिगः असार मसान्तकुन्हु हे ठेक्का पूवनीगु यानाः २१ लाख १७ हजार तकां ठेक्का बिउगु उगु देगः थथे पंगः ब्वलंगु कारणं तयारी अवस्थाय् धाःसा थ्यंकेफुगु मदुनि ।

Rate this item
(0 votes)
Login to post comments
Go to top

Copyright © 2016  nepalbhasa.com. All rights reserved.