All for Joomla All for Webmasters

ने.सं. ११३६ यंलागा अष्टमी

येँया अस्तव्यस्त यातायात : समाधान छु ?

येँ सहरया यातायात अवस्था विकराल जुया वनाच्वंगु वास्तविकता आः संचार माध्यमय् पिदनाच्वंगु थीथी समाचारं पुष्टि याइ । सडक व्यवस्थापन व्यवस्थित जुइ मफुगु व न्ह्यःनेलाःथे सडक निर्माणया कारणं हे थ्व समस्या तच्वया वयाच्वंगु खः । स्वनिगलय् यातायात व्यवस्थापन यायेत हे धकाः थनया आदिवासी रैथानेतय्गु छेँ थुनाः सतक तब्या यात ।

तर सतक तब्या यायेवं व स्थानीयवासीतय्गु छेँ थुनेवं थ्व समस्याया समाधान जुइ मखु धयागु खँ वर्तमान सतकय् खने दयाच्वंगु यातायात अस्तब्यस्ततां प्रमाणित याना बिउगु दु । वर्तमानय् सतकया थुज्वःगु अस्तव्यस्तता वास्तविकरुपय् हे बिना योजना सतक तब्या यायेगु ज्या न्ह्याकाच्वंगुलिं खः । सरकारी विभागतय् दथुइ मदयाच्वंगु असमझदारीया कारणं तब्या जुइधुंकूगु सतक तकं ब्यवस्थित जुइ फयाच्वंगु मदु ।

छगू सरकारी निकायं याःगु ज्यायात मेगु सरकारी निकायं स्वामित्व काये मफुगु कारणं थ्व समस्या झन झन हे तच्वया वनाच्वंगु खः । समाधानया लँपु गनं खने दयाच्वंगु मदु । सतक तब्या यायेगु नामय् निजी स्वामित्वया छेँ पुलिस प्रशासन लगे यानाः जबर्जस्ती थुनेगु ज्या जुल । डकैटी शैलीं डोजर आतंक ब्वलंकाः स्थानीय वासिन्दातय्गु उठिवास यात । छेँबुँ बिहिन याना बिल । बीमाःगु मुआब्जा तकं बीगु क्षमता सरकारं क्यने मफु ।

मेखे स्ववासीतय्गु छेँ थुनाः तब्या याःगु सतकया स्थिति स्वयेबलय् अन आः नं न्हापा दयाच्वंगु बिजुलीया थां, तब्या यायेमाःगु ताँ व अज्याःथाय् दयाच्वंगु सरकारी स्वामित्वया अनेक भौतिक संरचनात अथें लानाच्वंगु दनि । स्थानीय स्ववासीतय्त छेँबुँ बिहिन यायेधुंकाः नं सरकारी स्वामित्वय् दयाच्वंगु संरचना, पःखाः अथें ल्यनाच्वनीगु धयागु हे सरकारी निकायतय् दथुइ समन्वय मदुगुया प्रमाण खः ।

जनताया सम्पत्ति जबर्जस्ती ध्वस्त यायेगु खँय् सरकारी निकाय न्ह्यःने तर थःपिनिगु हे स्वामित्वय् दुगु संरचना चीकेगुपाखेया उदासिनतां सरकारं नं थनया रैथानेतय्त न्ह्याथे यानाः नं विस्थापित यायेगु रणनीति कयाच्वंगु जकं मखु धकाः गथे धाये फइ ?
सतकय् यातायात जाम जुइगुया मेता कारण आः नं ट्राफिक पुलिसं सवारी साधनयात ल्हाःया इशारां हे नियन्त्रण यायेगु यानाच्वंगुलिं नं खः ।

निश्चित हे रुपं आःया परिमार्जित सडक नियमकथं लेन अनुशासन थेंजाःगु नियमया कडाई वास्तविकरुपं हे सतक यातायातया सुधारया पक्ष खः। तर थुकिया माःकथंया शिक्षा यातायात साधन न्ह्याकीपिंथाय् थ्यनाच्वंगु मदु । छुं नं कथंया सवारी नियम माने मयाइपिंत ट्राफिक ब्यवस्थापनं जरिवाना पुइकेगु चलन यानाच्वंगु दु । अझ छुं छुं गम्भीर कथंया ट्राफिक नियम पालना मयाइपिंत घौछिया क्लास कायेगु नं यानाच्वंगु दु ।

तर थ्व अभ्यास सफल जुयाच्वंगु खंके मफु । छगू हे प्रकृतिया गल्तिइ छम्ह हे मनू हाकनं हाकनं कारवाहीलय् लाइगु धयागु वयात सतक यातायातया शिक्षा गतिलाक बीमफुगुया चिं खः । थ्व इलय् अत्याधुनिक स्रोत साधन नं उपलब्ध जुइधुंकूगु सन्दर्भय् यातायात नियन्त्रणय् ल्हाःया इशारां यानाच्वंगु यातायात साधन नियन्त्रणयात पाय्छि धाये फइगु स्थिति मदु ।.

हालय् तिनि कोटेश्वरंनिसें सूर्यविनायक तकया सवारी यातायात ब्यवस्थापन सन्तोषजनक मजुयाः अनया पूरा ट्राफिक टिमयात हे लित सःतूगु नं समाचार वःगु दु । थुकिं छु सी दु धाःसा ट्राफिक यातायात ब्यवस्थापनय् अझं दक्ष व सक्षम शक्तिया अभाव जुया हे च्वंगु दनि । सतकय् यातायातया साधन जाम जुइगुया मेता कारण सतकया स्थिति नं खः । प्रत्येक सतकया स्थिति दुर्भाग्यपूर्ण खनेदु ।

खराब सतकया कारणं सवारी साधनया दुर्घटना ला जुया हे च्वंगु दु, मेखे सतकया थासंथासय् गाः दयाच्वनीगु कारणं यातायात साधनत सहज गति न्ह्याये फयाच्वंगु मदु । सतकयात सहज व सरलरुपं यातायात साधन न्ह्याये फइगु स्थिति तयेगु जिम्मेवारी सतक विभागया खः । सतकया दुरावस्थाया कारणं यातायात साधन सहजकथं न्ह्याये मफुगु व अनाहक रुपय् हे यातायात साधनया गति अवरोध वयाच्वनीगु कारणं सतकया अवस्था नं ठीक जुयाच्वनेमाःगु अपरिहार्य दु ।

सतकय् यातायात न्ह्याइगु खँय् सम्बन्धित सरकारी निकाय् फुक्कसिया हे समन्वय व सहकार्य दत धाःसा आःया यातायात सम्बन्धी समस्या अःपुक हे ज्यंके फइगु विश्वास याये फइ । उकथं हे राजधानी थेंज्याःगु महानगरय् गुलि यातायात साधनं सडकया भार फये फइ धयागु अध्ययन यानाः उकिया कार्यान्वयन यायेमाः । अनियन्त्रित रुपं जुयाच्वंगु यातायात साधनया आयात दिकेमाः ।

आः हे नं भुखाचं पीडित जूपिंत इना बिउगु ट्याक्सीया संचालन गन गुकथं जुइगु खः अध्ययन जुइमाः । ट्राफिक नियमत नं वैज्ञानिक व व्यवहारिक जुइमाः । आःया इलय् स्वनिगलय् यातायात साधनया हर्न निषेधित यानातःगु दु, थ्व बांलाःगु पक्ष खःसां यातायात साधनया हर्नं स्वयां नं अप्वः सः यातायात साधनया इन्जिनं पिकाइगु नं सतकय् खने दु । उकिया समाधान छु खः ?

सतक व्यवस्थित याये थें थुकिया नियम कानून नं व्यवस्थित जुइमाः । छगू इलय् ट्राफिकतय्सं काइगु जरिवानाया छुं प्रतिशत दां स्वयम् ट्राफिक कार्यालय यंकाः इना बीगु ब्यवस्था नं दुगु खः । तर उकियात आः चीकल धयागु खँ दु । थ्वया लगतै येँ सहरया ट्राफिक ब्वयस्थापन झन हे अप्वया वंगु खँ दु ।

सतकय् न्ह्याइगु यातायात साधनयात सहजकथं वये–वने याकेगु खःसा सवारी चालकतय्त हे शिक्षित व दीक्षित यायेमाःगु आवश्यकता दु । थीथी सरकारी निकाय दथुइ समन्वय आवश्यकता दु । मात्र जरिवाना व स्थानीय मनूतय्गु छेँ थुनाः सतक तब्या यायेवं छुं मजुइगु आःया परिस्थितिं कनाच्वंगु दु ।

Rate this item
(0 votes)
Login to post comments
Go to top

Copyright © 2016  nepalbhasa.com. All rights reserved.