All for Joomla All for Webmasters

ने.सं. ११३६ यंलागा अष्टमी

विनाशय् वनाच्वनापिं स्वनिगःवासी

थौंकन्हय् बरसातया मौसम । ईया थाःगाः हे मदयेक वा वयेगु यानाच्वनीसा वा वक्वपतिकं येँया सतकय् लः मुनाः मनूत न्यासि हे वने मजीका बी । यातायातया साधन अथे मुनाच्वंगु लःया कारणं हे थःगु गतिइ न्ह्याये मफयाः ट्राफिक जाम जुया बी । ट्राफिक जामया लिच्वःकथं हरेक गतिविधि प्रभावित जुइधुंकी । सतकय् मुनाच्वंगु लः पिहां मवनेवं मनूत अनं न्यासि वने फइ मखुसा अज्यागु लः पसः, अफिसय् दुहां वनाः धन सम्पत्तिया नाश यानाच्वनी ।

छम्ह साधारण नागरिकं थुकिया फुक्क दोष महानगरपालिकायात खंकी । महानगरपालिकां धः सफा मयाःगु कारणं लः पिहां वनेमफुत धकाः बिचाः यानाच्वनी । स्थानीय निकायया निर्वाचन लिपा न्हूम्ह मेयर वा वडा अध्यक्षत थःपिनिगु कर्तब्यप्रति जिम्मेवार मजूगु खँ नं कनाच्वनी । लः धःया थज्याःगु समस्याया समाधान जुइमाःगु खँय् विवाद मदुसा थुकिया योजना दयेकाः कालान्तर तक समस्या मवइकथं ज्या जुइमाः ।

थ्व स्थानीय तहया निकायतय्सं यायेमाःगु ज्या नं खः । तर थुकिया समस्या गनं शुरु जुल, थुकिया समाधान स्थानीय तहया निकायया हैसियत दुने दु कि मदु धयागु चिन्तन नं जुइमाः । येँ लगायत स्वनिगःया दकले तःधंगु समस्या धयागु हे थन पिनें वयाः वसोवास याः वयाच्वंपिनिगु अनियन्त्रित हूल खः । थुकियात नियन्त्रण यायेगु योजना वा नीति आः तक सरकारं बिचाः तकं याःगु मदुनि ।

आः मुलुक संघीयताय् दुहां वन धकाः धाःसां गबले तक केन्द्रीयस्तरं स्थानीय आवश्यकतायात स्वयाः नीति निर्माण व योजनात दयेकी मखु, थन छुं नं कथंया समस्या समाधान जुइगु स्थिति मदु, अःखतं समस्या झन हे जक अप्वया वनाच्वनीगु निश्चित दु ।
स्वनिगःया वातावरण स्यना वनाच्वंगु, सम्पदा नष्ट जुयाच्वंगु, लः धः व सतकया समस्या धयागु हे थन अनियन्त्रितरुपं मनूत वयाः वसोवास याना वयाच्वंगुलिं खः ।

उकथं हे विकासया नामय् थनया क्षमतायात स्वयाः नीति योजना मदयेकूगु कारणं हरेककथंया समस्या ब्वलना वयाच्वंगु खः । न्हापा न्हापा गकलें मजूनिकथंया समस्या आः स्वनिगः लगायत येँ देशय् खने दया वयाच्वंगु दु । आःया निंतिं छगू सामान्य दसिकथं वा वइगु इलय् सतकय् मुनीगु लःयात कयाः जक नं आपालं खँ थुइके फइ ।न्हापा न्ह्याथेंजाःगु घनघोर वर्षा जूसां घौपलख लिपा हे सतक सफा जुयाः लः सतकय् ममुनीगु दृश्य झीसं स्वया हे वयाच्वनागु खः ।

थुकिया मू कारण धयागु आकाशं गाइगु वा जमिनं साला कयाः जमीन दुने हे दुहां वनीगुलिं खः । थौंकन्हय् हितिं लः मवःसां जमिनय् पाइप दुछ्वयाः साला कयाच्वंगु दु । अज्याःगु हे लः मुनाः जमीन दुने भण्डारण जुयाच्वंगु खः । थुज्वःगु हे लः ल्वहंहितिं हाइगु, गाःहिति, बुंगाःचां वइगु लः खः । तर थन पिनें वयाः बसोवास याःवःपिं मनूतय्त सरकारं न्ह्यःने लाः थे छेँ दयेकेत अनुमति बीवं थनया चकं ख्यः नाश जुयावन ।

मेखे लँ यचुपिचु यायेगु नामय् सतकय् पीच यायेगु, गल्ली गल्ली तक ल्वहं लायेगु ज्या यानाहःगु कारणं अथे आकाशं गाइगु वा जमिन दुने दुहां वने मफइगु वा जमिनं सोसे यानाः काये मफुगु कारणं जमिन दुने लःया भण्डारण म्हो जुयावंगु व अज्याःगु लः सतकय् हे थानाच्वनीगु कारणं सतक सतकय् आः पुखू थें हे लः मुनेगु याना वयाच्वंगु खः ।

आकाशं गाइगु वाया बेग अप्वः जुइगु व सतकय् दयेकातःगु धः नियमित रुपं सफा मजूगु कारणं धःया पूर्ण क्षमतां लः पिहां वने मफुगुलिं सतकय् लः मुनेगु याना वयाच्वंगु खः । मेखेर सकसिनं सिउगु खँ खः कि छगू इलय् स्वनिगः लखं जायाच्वंगु पुखू खः । थनया ततःधंगु खुसि बागमति, विष्णुमति छगू इलय् तब्या जुइक न्ह्यानाच्वंगु खःसा आः वयाः तिनि बुलुहुँ बुलुहुँ चिब्या जुजुं वनाच्वंगु खः ।

तर अथे खःसां न्हापा तब्या जुइक न्ह्यानाच्वंगु थुपिं खुसितय्गु धार आः नं जमिन दुने दुनें निश्चित लँपुइ न्ह्यानाच्वंगु दु । थुकिं यानाः थुकिया द्यःने दयेका तःगु लँ, पिच दुनें दुनें न्ह्यानाच्वंगु लखं अझं चुइका यंकाच्वंगु दु । लिच्वःकथं द्यःने न्ह्याथें जाःगु लँ दयेकूसां अज्याःगु लँ भासे जुइगु जुयाच्वंगु दु । थुकिया समाधान आवश्यक जू ।

थुज्वःगु संगीन थासय् आः हाकनं थुगु हे शहर जःखः स्मार्ट सिटी, मेघा सिटी व बाह्य चक्रपथ निमार्णया खँ सरकारं हयाच्वंगु दु । थज्याःगु निर्माणं थन विकास मखु कालान्तरय् विनाश हइगु निश्चित दु । आःया विकसित विश्वय् न्ह्याथेंजाःगु भविष्यवाणीया नं सम्भव दयाच्वंगु इलय् थज्याःगु विकासया नामय् विनाशया परिकल्पना जक मखु, यथार्थयात नं अःपुक हे थुइकेफु ।

थनया सत्ता शासकतय्सं सत्ताय् च्वनाः न्ह्याथें ज्याःगु योजना नं हयेगु मानसिकता व विकासया नामय् छुं नं कथंया पंगः झीसं तये मजिउ धयागु मानसिकतायात झीसं थुइके मफुत धाःसा झीगु विनाश सुनिश्चित धयागु खँ नं वाःचायेकेमाः । देय्या राजधानी सुविधासम्पन्न जुयाः राजनीति यानाच्वंपिसं झीगु मर्मयात थुइकी मखु, वा थूसां उकियात वास्ता याइ मखु ।

आःया इलय् झीगु कला, सम्पदा जक नष्ट जुयाच्वंगु यथार्थ मखु आः स्वनिगः लगायत येँ देय्या भविष्य हे सुनिश्चित धयागु अनेक दृष्टान्त खना नं थनया आदिवासीत पियाच्वनेगु धयागु थःपिनिगु असमायिक काल पियाच्वनेगु बाहेक मेता मखु धयागु खँ झी सकसिनं वाःचायेकेगु ई वःगु दु ।

Rate this item
(0 votes)
Login to post comments
Go to top

Copyright © 2016  nepalbhasa.com. All rights reserved.